Đơ̆ng năr 30/9 truh năr 6/10, đơ̆ng kon pơlei tơ̆ tơring chă tơroi, Khul K52 hlôi akŏm chă hơlen lăng păng sir kôch đei 5 kơ̆l kơting linh lôch tang tơ̆ Campuchia. Lơ̆m noh, 1 kơ̆l kơting tơ̆ dêh char Rattanakiri, 2 kơ̆l kơting tơ̆ dêh char Stung Treng păng 2 kơ̆l kơting tơ̆ dêh char Preah Vihear. Tơ̆ dôm hơnih sir kôch đei, khul jang akŏm đei lơ tơmam yua kơ ƀô̆ đô̆i nhen ca-men, unh tơneh, kơ-'lŏ pơgang Penicillin, mơnhan mam B52, nut ao linh, tơsi, pơnĭl...

Khul K52 hlôi pơtơm iŏk kơcheh kơting ou vă 'măn ăn tơdrong pơkăp ADN sơkơ̆t hơdah hơnăn pơlei pơla kơ linh lôch tang ou. Hăm tơdrong jang chơ chă lơ̆m teh đak, Khul K52 hlôi sir kôch đei atăm 3 kơ̆l kơting linh lôch tang tơ̆ pơlei Bi, xah Ia Dom, dêh char Gia Lai. Tơdrong tơroi đơ̆ng ƀok Siu Bích (rơneh sơnăm 1952, oei tơ̆ tơring) gah pơsat đei ƀŭ lơ̆m pơgar hnam, khul jang hlôi sir kôch keh kong đei 2 kơ̆l kơting linh lôch tang ah năr 5/10 păng 1 kơ̆l kơting ah kơsơ̆ năr 7/10.