Jĭ xăh tơring 3 mơmat tat dêh hlŏh, anih jang kơmăy kơmŏk tơ̆ xăh Đam Rông 4, dêh char Lâm Đồng oei tŏk pran 'lơ̆ng. Kơmăy điên thoăi rơgei đei yoa hơnơ̆ng lơ̆m rim pơlei bơngai kon kông. Ưh lăp đe mơlôh đĕch, roi đunh roi đei dơ̆ng lơ bơngai hơmuh, ƀât lăp đei hloi bơngai kră iŏk yoa điên thoăi rơgei vă mơ̆ng, lăng rim tơdrong kơtơ̆ng ang.

'Nhŏng Liêng Hót Ha Ngát, tơ̆ plei Mê Ka, xăh Đam Rông 4, ăn tơbăt, lơ ư̆ng yŭng lơ̆m kơmăy điên thoăi rơgei đei kon pơlei iŏk yoa lơ̆m tơdrong arih xa, jang xa rim năr: “Điê̆n thoăi rơgei jĭ minh tơmam ‘lơ̆ng, dang ei đei yoa hơnơ̆ng bơih. Tơdrong đei khul mơlôh hŏk iŏk tôch kơ hrĕnh. Grŭp jang kơmăy sô̆ tơ̆ pơlei pơla vang tơgŭm kon pơlei kai VneiD, đơ̆ng noh kla jên ưh kăl yua jên măt păng chă pơm bơ̆n hla ar trư̆k tuyên”.

Vă tơdrong tơplih hăm kơmăy sô̆ lơ̆m tơpôl, mă loi tơ̆ dôm pơlei pơla tơ̆ tơring hơtăih yăih, tơring kon pơlei kon kông kơ dêh char gơ̆h đei yoa tơpă, dêh char Lâm Đồng hlôi pơjing hloh 2.650 Grŭp jang kơmăy sô̆ tơ̆ pơlei pơla hăm hloh 16.300 bơngai jang. Tơdrong kăp gĭt hlŏh jĭ kơhrĕng ‘nu bơngai đei kon pơlei lui yom tơ̆ dôm pơlei pơla jĭ dôm bơngai vang jang lơ̆m grŭp jang kơmăy sô̆ âu ngăl. Hăm bưng ai tih păng đon jang tơnăp, hơnơ̆ng tơƀôh trong chong glung, yak hloh dôm tơdrong găn trong hăm bơngai kră mưh iŏk yua kơmăy kơmŏk, dôm bơngai đei kon pơlei lui yom lơ̆m pơlei pơla tơ̆ Lâm Đồng adrin krao hơvơn kon sâu, kon pơlei iŏk yua điên thoăi rơgei vă chă hơlen tơdrong roi tơbăt, hŏk pơhrăm trong jang xa păng jang kiơ̆ khoa hŏk ki thuơ̆t. Sơnăm ‘nâu đĭ hloh 72 sơnăm bơih, păng đei hloh 650 ŭnh hnam kon pơlei lơ̆m pơlei lui yom găh jơhngơ̆m đon adrin hŏk pơhrăm găh kơmăy kơmŏk kŭm nhen iŏk yoa điên thoăi rơgei lơ̆m tơdrong arih xa, ƀok Ntơ Ha Krong, bơngai đei kon pơlei lui yom tơ̆ plei Đạ Nhinh, xăh Đam Rông 4, tơroi:

“Ba chă lăng tơdrong kơtơ̆ng ang, ba gơ̆h băt truh tơdrong lơ̆m apŭng plĕnh teh. Mă 2 'noh lơ̆m điên thoăi đe sư roi tơƀôh anih tĕch phŏng. Khei yơ săy 'noh ba răt pơlong năng. Khoa hŏk ki thuơ̆t, yua 'long 'nâu, 'long to bơ̆n athei lăng năng, bơ̆n jang. Tơdrong 'lơ̆ng hloh jĭ điên thoăi. Tơmam 'nâu nhen thoi bơngai pơtho lơ̆m hnam. Ba chă hơlen lăng anih 'nâu, lê̆ hơlen lăng anih glăi. Tơdrong tơroi lơ̆m âu đei yua, ưh đei yua mă lei trong trŏ 'noh ba athei năm kiơ̆".

Đơ̆ng chă đŏk lăng tơdrong tơroi truh răt tơmam, kơmăy sô̆ tŏk bŏk oei pơm tơplih tơdrong juăt kơ kon pơlei tơ̆ tơring hơtăih yăih, tơring kon pơlei kon kông dêh char Lâm Đồng. Tơ̆ plei Đam Pao, xăh Phú Sơn Lâm Hà, tơdrong răt, tĕch tơmam kiơ̆ mạng tơpôl jing juăt hăm lơ kon pơlei. Pơlei đei hloh 225 unh hnam bơngai K’Ho Cil, vei kơjăp tơdrong tanh brai vai khăn, lơ̆m noh lơ unh hnam hlôi iŏk yua mạng vă roi tơƀôh, tĕch tơmam păng pơm kiơ̆ minh ƀar tơdrong pơyua ăn tơdrong tanh brai kŭm nhen tơdrong arih xa rim năr.

'Nhŏng Hoàng La Nhất Duy, bơngai chă ba tơmam ăn đe tơ̆ plei Đam Pao, tơroi: “Năr yơ ĭnh kŭm năm ba tơmam tơ̆ plei Đam Pao âu. Dang ei kon pơlei răt tơmam mă lơ 'nŏh răt lơ̆m Tiktok, Facebook đơ̆ng đe tĕch live. Kon pơlei dang ei tơmam xa 'nŏh đe răt tơ̆ anih tĕch mơdro ngăl, oei hơbăn ao 'nŏh đe răt lơ̆m mạng, hui bơngai lĕch tơ̆ 'ngoăih chă rơih răt”.

Jang kiơ̆ trong “Năm jơ̆p trong, drong rim unh hnam”, dôm bơngai jang lơ̆m Khul jang kơmăy sô̆ kơ pơlei pơla tơ̆ dêh char Lâm Đồng oei pơtho ăn kon pơlei iŏk yua VNeID, nôp hô sơ trư̆k tuyê̆n, kla jên ưh đei yua jên măt păng iŏk yua dôm tơdrong kăl đơ̆ng kơmăy sô̆. Mă tơpă ăn ƀôh, tơplih hăm kơmăy sô̆ tơ̆ tơring kon pơlei kon kông dêh char Lâm Đồng ưh lăp gơnơm lơ̆m tơdrong hŏk iŏk kơmăy kơmŏk đĕch, mă oei kăl đei dôm bơngai gơ̆h pơma xa, đei kon pơlei lui yom vang pơtho păng pơchoh trong ăn kon pơlei iŏk yua kơmăy mă trŏ hai.

Hăm xăh mơmat tat dêh hloh, đei hloh 96% kơsô̆ kon pơlei jĭ bơngai kon kông, Sơn Điền chih hơdăh hơtŏk hơnăp jang đơ̆ng bơngai đei kon pơlei lui yom jĭ mĭnh lơ̆m dôm trong jang vă hơnhăk tơdrong tơplih hăm kơmăy sô̆ truh jê̆ ƀiơ̆ hăm kon pơlei.

Ƀok Vũ Đức Nhuần, Kơdră vei lăng kon pơlei xăh Sơn Điền, pơma hơdăh: “Tơdăh 'mĕh tơplih hăm kơmăy sô̆ lơ̆m tơpôl 'nŏh athei bơngai đei bưng ai tih vang mât lơ̆m Grŭp jang kơmăy sô̆ kơ tơpôl. Mưh mă tơlĕch dôm tơdrong hơgăt rơih bơngai đei bưng ai tih, đei kon pơlei lui yom 'nŏh nhôn chih hơdăh bơngai ‘nŏh athei hlôh vao găh kơmăy kơmŏk păng đei đon hơdrin iŏk yoa kơmăy kơmŏk. Vă akhan, dôm bơngai đei kon pơlei lui yom lơ̆m tơpôl athei gơ̆h iŏk yoa kơmăy điên thoăi rơgei vă roi tơƀôh, pơtho ăn đe kon mon lơ̆m unh hnam, lơ̆m tơpôl. Iŏk bưng ai đơ̆ng kơdih pơlung kon mon, tơpôl pơm kiơ̆ tơdrong tơplih hăm kơmăy sô̆”.

Kơchăng hŏk pơhrăm, iŏk yua kơmăy kơmŏk păng tơƀôh trong chong glung, arih xa tơpăt ‘lơ̆ng, dôm bơngai đei kon pơlei lui yom kơ dêh char Lâm Đồng oei jing gơng tơƀưh hơnhăk tơdrong tơplih hăm kơmăy sô̆ truh jê̆ ƀiơ̆ hăm rim unh hnam, rim pơlei pơla. Kŭm hăm dôm Grŭp jang kơmăy sô̆ kơ tơpôl, dôm bơngai đei kon pơlei lui yom oei tơgop gĭt kăl vă tơplih hăm kơmăy sô̆ gơ̆h mơ̆t lơ̆m tơdrong arih xa tơpă./.