Tơ̆ tơring groi kông păh Pơmơ̆t dêh char Gia Lai đei lơ kon kông hơrih sa, rim tơdrong atŏk tơ iung muk drăm, pơm hơtŏk tơdrong hơrih sa păng tơmơ̆t jên jang ming man trong hnam kăl đei bơngai tăh hla lăng kơjăp. Lơ̆m rim ‘măng pơgơ̆r tơƀơp pơma dơnuh hăm bơngai tăh hla hơdrol kơ pôk rơih hăm dôm bơngai pơjei pơm kơdră tang măt Kuô̆k hô̆i, lơ nơ̆r tơgop athei hơnơ̆ng lăng truh tơmơ̆t jên jang ăn tơring hơtăih yaih vă rim tơring atŏk tơ iung đei lei lăi dih băl. Mŏ Plai, oei tơ̆ pơlei Tơ Bla, tơring Kong Chiêng tơbăt, atŭm hăm tơmơ̆t jên ming man trong ou to, kăl đei trong jang tơgum djru choh jang sa, pơjing đei tơdrong jang sa kơjăp ‘lơ̆ng vă kon pơlei hơrih sa sơđơ̆ng.“Lăp đơ̆ng rŏng mơ̆ng rim bơngai pơjei pôk rơih tơroi tơbăt găh tơdrong vă jang đơ̆ng kơdih ‘noh ba ƀôh dôm tơdrong jĭ tôch trŏ lăp hăm yan ou, trŏ lăp hăm kon pơlei nhen găh ŭnh hơyuh, trong nơnăm, hnam trương, hnam pơgang. Tơdăh đei mơ̆t jang pơm kơdră tang măt lei hơpơi ‘meh vă rim kơdră tang măt lăng ba kơtang hloh dơ̆ng truh tơring Kông Chiêng păng rim tơring hơtăih yăih.”

Bơngai tah hla tơring hơtaih yaih dêh char Gia Lai jei hơmŏ rim bơngai pơjei lăp đơ̆ng rŏng đei pơm kơdră tang măt gô hơnơ̆ng lăng kơjăp hơmet pơ ‘lơ̆ng tơdrong tơnap tap lơ̆m atŏk tơ iung mŭk drăm-tơpôl, mă kăl ‘noh tơgŭm djru kon pơlei tơplih trong jang sa, pơm hơtŏk jang sa iŏk yoa kơjăp păng pơjing đei tơdrong jang ăn hơdruh tơdăm tơring kon kông. Bơngai tah hla Hlây, pơlei Đak Jă, tơring Mang Yang pơma:“Rim bơngai đei hơnăn pơjei pơm Kơdră tang măt Kuô̆k hô̆i tơdăh đei pôk tơmơ̆t lei hơnơ̆ng lăng ba tơ iung pơjing lơ trong atŏk tơ iung mŭk drăm, đơ̆ng noh pơjing trong jang sa hơdoi, pơjing rơvơn ăn kon pơlei atŏk tơ iung mŭk drăm kiơ̆ trong pơtho ăn kon pơlei găh khoa hŏk kih thuơ̆t vă choh jang sa đei iŏk yoa lơ, atŏk tơ iung mŭk drăm.”

Tơ̆ tơring păh Hơlĕch dêh char Gia Lai, bơngai tah hla lăng kơjăp găh tơdrong pơchoh hoch đak hơbông păng trong atok tơ iung kơ dêh char lơ̆m jăl jang kơnh. Tơ̆ tơring Tuy Phước, bơngai tah hla Man Đức Thuận, tơbăt, tơring ou đei lăng jĭ “tơring đak hơbông pơrăm kơtang hloh” kơ Gia Lai. Đơ̆ng rŏng đak hơbông đak lip kơtang lơ̆m hơtuch sơnăm sơ̆, tơdrong hơrih sa kơ kon pơlei roi năr roi sơđơ̆ng ƀiơ̆, mă lei tơdrong hơmơt đak lip tơ̆ng kơtang rim ‘măng pơyan ‘mi truh rŏ năng oei hơnơ̆ng đĕch. Bơngai tăh hla Man Đức Thuận pơma tơbăt nơ̆r tơgop:“Tơring Tuy Phước găh pơbăh đak kroong Kôn păng đak kroong Hà Thanh, rim sơnăm đak lip lơ̆p kơtang hơnơ̆ng. jăl truh ou kơnh, ĭnh hơpơi ‘meh vă dôm bơngai đei pôk tơmơ̆t pơm kơdră tang măt ‘noh chă apĭnh Kuô̆k hô̆i proh hơmet kon jên vă ming man pơnơ̆ thoong hơboong đak ou to vă pơchoh đak hơbông, veh ver hiong răm kơ yuơ ‘mi hơbông pơrăm ăn kon pơlei”.

Jei vă atok tơ iung mŭk drăm tơter đak dơsĭ, bơngai tăh hla Nguyễn Thanh Phương, koeng kơphô̆ 5, phương Quy Nhơn Bắc, akhan, dêh char kăl đei hơyak pran tŏk mŭk drăm ‘noh rim hơnih jang mŭk drăm chăl hle gơh hơgei păng atok tơ iung mŭk drăm đak dơsĭ kiơ̆ trong kơtang, kơjăp ‘lơ̆ng.“Kiơ̆ kơ ĭnh ưh khan lăp atok tơ iung kmăi kmŏk gơh hơgei mă lei tơ̆ ou kăl atŏk tơ iung găh kmăi kmŏk bán dẫn, chip vă pơm lơ liơ đei atŏk tơ iung kơtang hloh. Mă ƀar ‘noh atŏk tơ iung mŭk drăm đak dơsĭ ‘noh mĭnh lơ̆m dôm tơdrong đei ‘lơ̆ng hơ iă kơ Gia Lai lei jei kăl atŏk tơ iung mă tôm tong ưh khan lăp tơdrong năm dăng rôp, rong ka hơdang mă lei atok tơ iung dôm tơdrong jang đei ƀơm truh tơ̆ đak dơsĭ hloi”.

Lơ̆m ‘măng pôk rơih ‘măng mă ou, dêh char Gia Lai đei 28 ‘nu bơngai pơjei vă pôk rơih iŏk đei 16 ‘nu bơngai kơdră tang măt Kuô̆k hô̆i jăl XVI.  ‘Moi kiơ̆ rim ‘măng pơgơ̆r tơƀơ̆p pơma dơnuh hăm bơngai tăh hla hơdrol kơ pôk rơih , lơ kon pơlei jei pơma tơbăt lui kơjăp lơm trong vă iung jang đơ̆ng rim bơngai pơjei.

Ƀok Siu Trung, Kơ iĕng Kơdră chĕp pơgơ̆r Hơnih jang MTTQ Việt Nam dêh char Gia Lai tơbăt, bơngai tah hla tơring tôch hơmĕng, hơpơi ‘meh vă rim bơngai đei pơm kơdră tang măt Kuô̆k hô̆i jăl XVI gô tơgop atŏk kơtang atŏk tơ iung mŭk drăm-tơpôl păng pơm hơtŏk tơdrong hơrih sa ăn kon pơlei.“Hloh đơ̆ng tơƀơ̆p pơma dơnuh hăm bơngai tăh hla, găh lơ bơngai tah hla tôch lăp đon adoi nhen lui kơjăp lơ̆m dôm nơ̆r pơma pơkăp ‘noh păng hơpơi ‘meh vă dôm bơngai đei pôk tơmơ̆t pơm kơdră tang măt Kuô̆k hô̆i gô jang kiơ̆ ƀlep nơ̆r pơkăp tơ̆ hơnăp kon pơlei, tơjê̆, mơ̆ng kiơ̆ kon pơlei tơgop nơ̆r adoi nhen tơroi tơbăt ăn Kuô̆k hô̆i, Khul kơdră teh đak vă xek tơlang rim tơdrong mă bơngai tah hla hơpơi ‘meh vă.”

Năr 15/3, atŭm hăm bơngai tăh hla lơ̆m teh đak, bơngai tăh hla dêh char Gia Lai hlôi vang năm năr lêh pơđĭ kon pơlei năm tăh hla, rơih bơngai tang măt đei jơhngơ̆m đon ‘lơ̆ng, bơ̆ jang hơgei, tang măt ăn nơ̆r pơma, jơhngơ̆m đon hơpơi ‘meh vă đơ̆ng Kon pơlei tơ̆ Hơnih Hop akŏm Kuô̆k hô̆i. ‘Nou jei jing jơ ‘năr vă kon pơlei tơƀôh hơdăh hơnăp jang păng sơnong jang kơ bơngai kon pơlei, tơgop lơ̆m tơ iung pơjing hơnih bơ̆ jang kon pơlei pôk tơmơ̆t roi năr roi pran kơjăp iăp kơtang, trŏ lăp hăm tơdrong ‘meh vă atŏk tơ iung kơ teh đak păng kơ tơring lơ̆m chăl hle.