Hrei ‘nâu dêh char Đắk Lắk đei hlŏh 252.000 ‘nu tơmoi đei tŏk iŏk jên đơ̆ng Anih mong jên tơgŭm tơpôl, hăm kơsô̆ jên đei asong tŏk iŏk hlŏh 14.500 ti. Dôm bơngai đei tŏk iŏk ‘nŏh jĭ: unh hnam tơnuh, vă jê̆ tơnuh, unh hnam đei kŏng, kon pơlei kon kông, hŏk tro – sinh viên; dôm unh hnam kăl đei tơgŭm vă jang xa, tĕch mơdro, man hnam, pơm anih pơtruh đak…  Jên đei tŏk iŏk âu vang găn ƀiơ̆ tơdrong kon pơlei năm tŏk iŏk jên đe tơ̆ ‘ngoăih hăm jên kon tôch lơ tơ̆ tơring hơtăih yăih; vang tơgŭm ăn lơ tơring jang đei tơdrong pơjing tơring tơrang ‘nao, kiơ̆ đơ̆ng noh vei lăng 'lơ̆ng tơdrong sơđơ̆ng chinh trĭ, sơđơ̆ng lơ̆m tơpôl tơ̆ tơring. Mă lei, tơdrong tơlĕch jang kiơ̆ tơdrong Hơgăt 78 truh dang ei oei đei 1,2 tơdrong tam mă hơiă nhen: jên asong tŏk iŏk tŏ sĕt; 1,2 tơdrong jang ưh pă lăp hăm yăn âu; jên tŏk iŏk vă năm tơ̆ teh đak oei tŏ sĕt; jên kon asong tŏk iŏk hăm 1,2 tơdrong jang oei lơ…

Tơ̆ jơ bơ̆ jang, lơ nơ̆r pơma, athei đơ̆ng dêh char jŭm dăr tơdrong hơtŏk kơsô̆ jên asong tŏk iŏk hăm hŏk tro – sinh viên truh 100 triu 1 unh hnam; jên tŏk iŏk vă jang xa, tĕch mơdro truh 200 triu hăm unh hnam tơnuh; pơdui khei 'năr kla hăm bơngai ‘nao brŏk đơ̆ng hnam phak đơ̆ng 5 truh 10 sơnăm; atŭm hăm 'nŏh pơih xă bơngai asong tŏk iŏk vă năm jang tơ̆ teh đak đe. Khul dăr lăng chih akŏm tôm nơ̆r pơma apinh đơ̆ng Đắk Lắk, păng ăn tơbăt vă tơchĕng hơlen vă jăh đei trong tơgŭm lăp 'lơ̆ng hăm rim khul bơngai 'mĕh tŏk iŏk lơ̆m teh đak. Atŭm hăm 'nŏh, gơ̆h tơchĕng hơlen trong jang, tơdrong tơgŭm hơdrô̆ hăm dêh char Đắk Lắk, nhen tơdrong iŏk yoa jên tơring vă asong tŏk iŏk hăm jên kon tŏ sĕt.