Klo kăn mŏ Lâm Thị Ngọc Hoa, unh hnam dơnuh hin bơngai Khmer oei tơ̆ ấp Xẻo Cóc, xah Lai Hòa, pơlei tơm Cần Thơ, ‘nao âu đei hơlen tơgŭm tơdrong jang rong pơbe nhen 1 “hơgơ̆r văh jang sa”, pơih ăn tơdrong hiôk yak tŏk sơđơ̆ng tơdrong hơrih sa. Mŏ Lâm Thị Ngọc Hoa tơbăt:

Ƀôh bơnê ưh kơ kĕ đĭ hloi, sơnăm ‘nâu đei tơgŭm 2 tŏ pơbe yŏng. Dang ei hơdrin vei lăng vă đơ̆ng rŏng âu hơtŏk lơ  pơbe, đei mŭk drăm sơđơ̆ng, ‘măn pơđom man hnam. Dang ei, inh năm yuă ‘ngĕt rim năr, oei klo inh năm vei hơdang ăn kơ đe, mưh tơ̆ hnam ‘noh pơdŏng inh vei lăng pơbe.

Ƀok Diệp Phước Nghĩa, phường Mỹ Xuyên, gơnang đơ̆ng đei tŏk iŏk jên tơgŭm 50 triệu hlak jên hloh 2 ‘măng tŏk iŏk, hlôi tơmơ̆t jên jang pơtăm bơ̆n ‘nhot, ƀum hơƀo pro hơhmrĕ lơ̆m hơgăt teh 4 sao. Ƀok oei tơmơ̆t jên jang răt kơmăy tơruih ‘mơ ‘met, iŏk yua khoa hŏk ki thuơ̆t păng kơmăy kơmŏk lơ̆m jang sa, kơna iŏk yua đei hloh 50 triệu hlak jên rim sơnăm. Đơ̆ng tơdrong tơgŭm đơ̆ng teh đak kŭm hăm đon hơdrin yak tok kơdih, ƀok hlôi man đei hnam kơjăp ‘lơ̆ng păng pơtơm klăih đơ̆ng dơnuh hin lơ̆m sơnăm 2024:

Dang ei pơtăm bơ̆n ‘nhot, ƀum hơƀo pro hơmrĕ ưh pă hoach lơ kŏng jang mưh tơmơ̆t yua kơmăy pruih đak, yua mô-tơ ƀôm tơruih, ‘mơ ‘met đei lơ jên jang. ‘Ngoăih kơ ‘noh trong nơnăm đei man truh tơ̆ mir kơna bơngai mơdro sa mơ̆t răt hiôk. Kon pơlei đei teh tơ jê̆ băl kŭm krao hơvơn băl vang vei lăng vă iŏk đei pơyan jang đei lơ.

Pơlei tơm Cần Thơ đơ̆ng rŏng kơ tơmơ̆t hơdai đei vă jê̆ 495.000 ‘nu bơngai kon kông, lơ̆m noh lơ hloh ‘noh jĭ bơngai Khmer hăm hloh 411.000 ‘nu. Lơ̆m sơnăm âu ki, pơlei tơm hlôi tơlĕch jang đei yua Tơdrong jang tơm kơ teh đak hơtŏk tơiung mŭk drăm - tơpôl tơring kon pơlei kon kông, hăm akŏm jên jang hloh 305 ti hlak jên. Kiơ̆ đơ̆ng noh, lơ tơdrong jang trong nơnăm, pơtho pơhrăm, pơgang đei tơmơ̆t jên jang, hnam oei păng jên asong tŏk iŏk đei tơgŭm, tơgŭm kon pơlei hơtŏk tơiung jang sa, ƀrư̆ ƀrư̆ hơtŏk ‘lơ̆ng tơdrong hơrih sa păng jơhngơ̆m đon. Truh dang ei, kơsô̆ unh hnam dơnuh hin lơ̆m kon pơlei Khmer kơ pơlei tơm jur oei pă vă jê̆ 1.900 unh hnam. Ƀok Lê Trung Tuấn, Phŏ Kơdră Anih vei lăng kon pơlei xăh Thạnh Thới An, pơlei tơm Cần Thơ tơbăt:

Hơdai hăm tơdrong tơlĕch jang dôm tơdrong tơgŭm hăm kon pơlei kon kông, xah oei lăng kăl tơdrong jang pơtho pơhrăm tơdrong jang ‘moi kiơ̆ dôm lăm pơhrăm ki thuơ̆t vei rong, pơtrŭt choh jang sa, pơtho tơdrong jang... Kiơ̆ đơ̆ng noh tơgŭm kon pơlei hơtŏk ‘lơ̆ng jang hơgei, pơyua ăn hơtŏk tơiung mŭk drăm dăh mă vang bơ̆jang tơ̆ dôm kŏng ti vă hơtŏk iŏk yua ăn unh hnam.

Tơ̆ hơnăp kơnh, pơlei tơm Cần Thơ gô bơ̆jang kiơ̆ hrơ̆ch dôm hơnăp jang, trong jang hơtŏk tơiung mŭk drăm - tơpôl; tŭn hrĕnh dôm tơdrong jang găh dôm tơdrong jang tơm kơ teh đak; vei sơđơ̆ng kon pơlei đei sa yua tôm, tơtom dôm tơdrong jang tơgŭm kiơ̆ tơdrong hơgăt, kiơ̆ đơ̆ng noh ƀrư̆ ƀrư̆ hơtŏk ‘lơ̆ng tơdrong hơrih sa.