Đơ̆ng nơ̆r roi tơbăt đơ̆ng kon pơlei teh đak buăl Campuchia, Khul K51, Anih chĕp kơ̆l pơgơ̆r khul linh dêh char Đắk Lắk hlôi sir chă, kôch iŏk đei mĭnh kơ̆l linh lôch tang ăn teh đak tơ̆ plei Vai Yoong, xăh Busara, apŭng Bétchanđa, dêh char Mondulkiri. Kơting linh lôch tang ăn teh đak đei chă ƀôh jê̆ thong đak Đắk Đam, kŭm hăm lơ tơmam nhen kơdŭng kơsu, ƀlak ao ƀô đô̆i, pơnhan pơsei B52 păng kơchai pơgang. Tơdrong sir chă, kôch iŏk đei kơting linh lôch tang ăn teh đak kơtă ƀât dôm năr blŭng bơ̆jang kiơ̆ tơdrong jang pơyan phang 'noh jĭ tơdrong đei jơnei đơ̆ng chă chih iŏk, hơlen lăng păng tơblang hơdăh rim nơ̆r tơroi đơ̆ng kon pơlei.

Tơdrong jơnei ‘nâu hơnơ̆ng tơƀôh hơdăh đon pơhnŏng đơ̆ng kăn ƀô̆, khŭl lĭnh Khŭl K51, Anih chĕp kơ̆l pơgơ̆r khŭl lĭnh dêh char Đắk Lắk mưh bơ̆ jang tơdrong jang sir chă, kôch iŏk kơting linh lôch tang ăn teh đak; hơdai hăm tơgop jơhngơ̆m bơ̆ jang Tơdrong jang 500 măng năr, adrin sir chă, kôch iŏk kơting dôm bơngai kon hlôi lôch tang yua kơ tơdrong rơngei, hiôk hian kơ teh đak, vă chơ ba đe sư vih dơ̆ng hăm pơlei pơla, hăm ŭnh hnam.