Kơting atou đei chă ƀôh noh kơting pôih jơ̆ng, kơting kŏng ti, kơting kơ̆l, hơnenh, kơting sơkung, minh ƀar kơting mơnir păng kơting iơ iĕ nai. Atŭm hăm kơting, khul chơ chă ƀôh đei lơ tơmam yua kiơ̆ hơkou, đei minh đôi chơle mah, kơyep kơsu, minh kơ-'lŏ pơgang insulin, 2 đing pơgang, minh pôm pơnĭl dĭl vĭl păng minh ƀar kơcheh hơbăn ao jơk găm.

Dang ei hơnăn măt kơ linh lôch tang tam mă đei sơkơ̆t hơdah. Kơting atou păng dôm tơmam yua lơ̆m hơkou hlôi đei Khul K52 akŏm, vei lăng kiơ̆ tơchơ̆t tơlĕch. Khul jang tŏk bŏk oei jang atŭm hăm rim hơnih jang kơpal sơkơ̆t hơdah tơdrong kăl vă sơkơ̆t hơdah hơnăn măt ăn kơ linh lôch tang ăn teh đak.