Đơ̆ng rŏng hơgrop, dêh char Đắk Lắk đei hơgăt teh să hloh 18.096 km², măt bơngai kon pơlei hloh 3 triu 300.000 ‘nu bơngai, 102 hơnih bơ̆ jang tơring; đei tơring sơlam tơ̆ groi teh hăm teh đak Campuchia păng cham char đak dơsĭ. Lơ̆m cham char atŏk tơ iung ‘nao hăm groi kông, đak dơsĭ păng tơring sơlam teh đak, dêh char đei dơ̆ng lơ groi teh choh jang sa, hơnih jang kmăi kmŏk pơm tơlĕch tơmam drăm, logistics, mŭk drăm đak dơsĭ păng mŭk drăm ‘măng sơlam teh đak. Mă lei, ‘nou jei jing tơring tơlĕch ăn pơkoel pơtang găh vei lăng sơđơ̆ng dơ̆ng kơjăp tơring Teh đak.

Tơ̆ jơ bơ̆ jang, rim bơngai tang măt akŏm pơma dơnuh găh trong iung jang jơnei dôm tơdrong đei ‘nao kơ dêh char mă lei kăl tơmơ̆t kơjăp hăm trong pơkoel vei lăng sơđơ̆ng dơ̆ng kơjăp teh đak tơring, mă kăl tơ̆ rim tơring kăl, tơring sơlam teh đak păng dôm hơnih ming man, trong nơnăm gĭt kăl. Thượng tướng Trần Việt Khoa, Kơdră jang lơ̆m Trung ương Đảng, Kơdră chĕp pơgơ̆r Học viện Quốc phòng, pơkă Đắk Lắk kăl iung jang ‘lơ̆ng dôm tơdrong rơvơn găh choh jang sa păng đak dơsĭ vă pơm hơtŏk ‘lơ̆ng tŏk mŭk drăm, lơ̆m ou lăng kơjăp pơm tơlĕch tơmam drăm păng khul bơ̆ jang:“Đắk Lắk dang ei đei đak dơsĭ jrŭ mă lei ưh kơ đei dơnŏk đak dơsĭ tih ‘noh tơpă mơ̆n tôch tơnap tap lơ̆m jang kiơ̆ dơnŏk đak dơsĭ păng logictic; mă ƀar ‘noh groi teh bazan tôch kơ ‘lơ̆ng hloh lơ̆m plei teh, đei lơ ‘nhot plei ‘long gĭt kăl kơ choh jang sa mă lei tă ưh kơ đei hơnih pơm tơlĕch tơmam drăm ‘lơ̆ng. Đơ̆ng ou bơ̆n ƀôh đei dôm tơdrong, dang ei pơm lơ liơ Đắk Lắk kĕ atŏk tơ iung choh jang sa, kăl atŏk tơ iung pơm tơlĕch tơmam drăm ‘lơ̆ng mă kĕ xak tơlang đei tơdrong tŏk mŭk drăm găh choh jang sa.”

Mĭnh tơdrong đei pơma hơdăh lơ̆m jơ bơ̆ jang ‘noh atŏk tơ iung mŭk drăm kăl yak hơdoi hăm tơ iung pơjing tơring tang găn hơlou păng hơmet pơ ‘lơ̆ng “jơhngơ̆m đon kon pơlei”. Kiơ̆ kơ ‘noh, pơm hơtŏk tơdrong hơrih sa, tơjur dơnuh, vei lăng sơđơ̆ng tơring, pơjing tơdrong jang sa kơjăp ăn kon pơlei, mă kăl tơ̆ tơring sơlam teh đak păng tơring kon kông, ưh khan lăp tơdrong jang atŏk tơ iung mă oei tơgop lơ̆m pơm sơđơ̆ng dơ̆ng kơjăp đơ̆ng tơring hloi. Hăm dôm tơring kăl, tơdrong tơmơ̆t jên jang pơm trong nơnăm, logistics, atŏk tơ iung mŭk drăm ‘măng sơlam teh đak, tơgoăt tơƀưh hăm Campuchia păng trong lăng truh đak dơsĭ jei đei tơlĕch ăn lơ̆m trong pơkoel vei lăng sơđơ̆ng dơ̆ng kơjăp tơring teh đak. Atŭm hăm ‘noh pơm hơtŏk bơ̆ jang tơdra hơdrol, tang găn hơlou, iung tơjră tang găn hăm tŏ ‘mi kial pơrăm, tơdrong sar bar păng dôm tơdrong hơmơt đei ưh sơđơ̆ng joăt joe sơ̆ ki. Ƀok Lương Nguyễn Minh Triết, Kơdră jang lơ̆m Trung ương Đảng, Bí thư Đảng dêh char Đắk Lắk sơkơ̆t hơdăh:“Nhôn sơkơ̆t hơdăh tơmơ̆t hơgrop trong pơprŏ jang mŭk drăm tơpôl hăm trong pơprŏ vei lăng sơđơ̆ng dơ̆ng kơjăp đơ̆ng blŭng hloi mă kăl ‘noh hăm rim tơdrong vă jang tih, dôm trong tơm, rim tơring kăl păng ling lang lăng kơjăp trong tơlĕch ăn ‘noh atŏk tơ iung vă sơđơ̆ng păng sơđơ̆ng vă atŏk tơ iung. Mă ƀar ‘noh nhôn akom hơnơ̆ng tơ iung pơjing vei lăng sơđơ̆ng dơ̆ng kơjăp đơ̆ng lơ̆m kon pơlei tơgoăt hăm vei lăng sơđơ̆ng kon pơlei păng vei lăng sơđơ̆ng jơhngơ̆m đon kon pơlei, mă kăl lăng kơjăp truh tơring sơlam teh đak, tơring kon kông păng dôm tơring kăl hloh.”

Đơ̆ng groi kông truh tơ̆ đak dơsĭ, đơ̆ng dôm pơlei pơla hơtăih yăih truh tơring sơlam Teh đak, Đắk Lắk ling lang tơlĕch ăn trong tơlĕch jang atŏk tơ iung kơjăp ‘lơ̆ng tơgoăt hăm mĭnh Tây Nguyên sơđơ̆ng dơ̆ng kơjăp.