Tơ̆ hơnih Hnam phak Thành Diên Khánh, đơ̆ng rŏng kơmăi kôch teh tơ̆ kơpal, khul chơ chă yua 'nhik, kơƀênh, ƀei păng sơdruih iĕ, kơchăng tak tăl teh vă hơlen lăng. Lơ kơting hlôi bŭk, lŭk lơ̆k hăm teh, noh rim kơcheh kơting, hơnenh dah mă tơmam iĕ ioch ayơ đei ƀôh adoi hơlen mă hơdah.

Vă sơkơ̆t hơdah dôm hơnih đei ƀŭ, khul chơ chă kiơ̆ tơdrong tơroi đơ̆ng dôm bơngai hlôi hơrih păng pơm jang tơ̆ pơlei tơm so Diên Khánh. Minh lơ̆m kơsô̆ noh đei linh so Đinh Thanh Nhật, 63 sơnăm, đei hloh 50 sơnăm hơrih tơ̆ tơring ou. Sơ̆ ƀok bơ̆ng pang dôm tơdrong tơblah tơ̆ pơlei tơm so păng dôm bơngai linh hlôi lôch tang: “Ah kơmăng ƀĭch tep, inh oei ƀôh bang tơdrong mă 'noh, khul linh yaih phŏng vih truh, đe met ou hrŭk hơbăn kăl sŏng đĕch, hơkou jăn pik ƀenh kơ đak găm. Mơnat dêh, Ah lôch 'noh hơkou oei tôm, khul linh chăl so sơ̆ 'nhăk klơ̆m ah gơng, đei hơkou linh ƀơm min đôh pă đei tôm hơkou, 'noh đe sư sir hơlŭng ƀŭ. Ưh kơ băt hơdah pơsat ah yơ, ƀôh lôch ƀơ̆t yơ đe sư ƀŭ ƀơ̆t doh hloi. Ƀlŏk đei yă kiơ noh inh gô tơroi ăn hơnih juăt jang kơpal mă noh”

Ƀok Huỳnh Bửu Đông, 62 sơnăm, đei hloh 40 sơnăm tơguăt hăm Hnam phak Thành Diên Khánh. Hloh 20 sơnăm hơdrol ki, ah oei pơm jang lơ̆m Kŏng ang, ƀok ƀôh đang măt tơdrong sir kôch đei 2 kơ̆l kơting lơ̆m 'măng kôch teh ming man păng atŭm hăm khul jang 'nhăk ƀŭ tơ̆ pơsat ƀlŏk tơbăt. Dang ei pơtơm Tơdrong jang 500 măng năr chơ chă, sir kôch akŏm kơting linh lôch tang, ƀok chôt vih tơ̆ hơnih đei kơting bơngai sơ̆ vă tơroi tơbăt găh dôm tơdrong băt đei. Tơ-oei ah hơnih sir kôch, ƀok Đông hơlen lăng rim hlak teh đei kôch păng tơƀôh ăn dôm hơnih mă kơdih po oei hơdơ̆r: “Hơdrol ki, hơnih ou tơjê̆ hăm chơnĕng hnam phak, hơnih jang nhôn ưh đei pơm kiơ ôh, hơdrô̆ pơtăm 'nhot đĕch. Đơ̆ng rŏng noh, ah mă hơnih jang man hnam, ah sir teh vă man jrăng hnam, inh ƀôh đei 1 kơ̆l kơting. Sir kôch 'noh tơ̆ hơla đei minh kơ̆l kơting dơ̆ng, hơkŏp noh đei 2 kơ̆l kơting”

Ƀok Lê Văn Thành, 70 sơnăm, hơrih tơjê̆ Hnam phak Thành Diên Khánh đơ̆ng iĕ. Dôm tơdrong mă ƀok băt gah hnam phak ou noh jing dôm tơdrong kăp gĭt, tŏk bŏk đei tơroi tơbăt ăn khul chơ chă sir kôch tơ̆ ou: “Hnam phak ou đei đơ̆ng chăl Phalăng sơ̆, đơ̆ng rŏng 'noh truh chăl Ngụy, phơ phŏ pơkăp phak pơlôch, đe sư pơnah pơlôch kơtă hloi. Hnam phak ou kron dôm bơngai jang Kăch mang dah mă nhôm unh hnam đei bơngai jang Cộng sản, đe sư rôp teh tôn, apinh jet, păng pơkăp tơdrong yoch”

Đơ̆ng hơtuch khei 8, tơdrong chơ chă sir kôch đei pơtơm, tơ̆ 5 hơnih ƀôh đei kơting păng tơmam yua. Đơ̆ng rŏng kơ noh, teh sir kôch đei pơih să lơ̆m dang 300 met vuông, rim năr đei hloh 70 'nu bơngai jang, Kơmăi hơdrô̆ kôch teh ah kơpal; sir jrŭ hloh noh khul jang chă sir hăm ti, vă hơlen lăng hăm rim hlak teh. Hơnih jrŭ hơnơ̆ng noh đơ̆ng 2 truh 2,5 met. Đơ̆ng rŏng lơ sơnăm, kơting hlôi bŭk, noh tơdrong sir athei kơchăng vă hơlen lăng mă hơdah. Ah hơnê̆ teh găm đei ƀôh gru. Kơdră khul jang hơkŭnh kơ̆l hơlen lăng đang kơ noh akhan:  “Oaih ƀôh hơnenh bơih ou, kăp gĭt tơpă yang ăi! Iŏk hla kơ 'nhăk tơ̆ ou oh ăi!”

Minh pôm hla kơ đei chŭt ah hơnih ƀôh đei. 'Nhik, kơƀênh đei pơtăl hăm kơƀei, sodruih iĕ. Teh jŭm dăr hơnih đei kôch mă kơchăng vă gơh đei iŏk tôm kơcheh kơting oei đei.

Yă Ngô Thị Xuân, ƀă noh linh lôch tang Ngô Quang Trung lôch hơchăng tơ̆ pơlei tơm so Diên Khánh, adoi năm truh tơ̆ hơnih chơ chă sir kôch. Hloh tong hơnê̆ anglŏ sơnăm kơ ou, unh hnam adoi tam mă chă đei kơting ƀok. Yă tơroi gah dôm bơngai pơnă kăch mạng hlôi ƀŭ khul grŭp po kơdih tơ̆ ou:  “Hơdrol sơ̆, inh kŭm chă hơlen lăng, dôm bơngai jang vei hnam phak chă asong akhan, mưh đei bơngai lôch noh 'nhăk tơ̆ hơnih ou, sir teh vă ƀŭ. Tang găn đe ayăt 'nhăk atou tơhiu tơ̆ đak krong Cái, hli đak krong jroh hoch. Khul grŭp lơ̆m hnam phak hli kơ hiong atou noh tơtông năm ƀŭ. Tơdrong chă sir teh ƀŭ ưh đei jrŭ ôh, đunh sơnăm kơyuơ đe tuh teh noh hăp jing jrŭ hloh. 15 'nu hiong lơ̆m hơnih ou”.

36 hơnih đei ƀôh kơting, mă lei gah 15 'nu hiong tơ̆ Hnam phak Thành Diên Khánh tŏk bŏk oei đei hơlen băt. Hloh tong hơnê̆ anglŏ sơnăm kơ ou, teh klơ̆p pơm hiong gru grua, mă lei đon hơdơ̆r kơ dôm bơngai hlôi lôch tang adoi oei tơ̆ noh. Đơ̆ng nơ̆r tơroi kơ dôm bơngai oei hơrih, khul jang chơ chă pơtoi chă sir kiơ̆ rim tơdrong băt tơ̆ hơnih teh kơ pơlei tơm so Diên Khánh, hăm tơdrong hơpơi 'meh ƀônh hiôk đĕch mă lei akŏm ƀenh tơdrong kăp gĭt: hơnhăk dôm bơngai hlôi lôch tang băt hơdah hơnăn măt, gơh chôt vih hăm pơlei pơla, unh hnam păng khul grŭp.