Đơ̆ng rŏng lơ giĕng yuk yak tơ̆ đak dơsĭ, duk ka kơ Đỗ Văn Tiến, phương Hoài Nhơn Đông, dêh char Gia Lai chôt vih dơ̆ng tơ̆ dơnŏk duk sơđơ̆ng, trŏ tơchơ̆t hăm duk ‘măn ƀenh ka. Kiơ̆ kơ ƀok Tiến, tơdrong jang ka đak dơsĭ dang ei roi năr roi kơhret. Dôm tơdrong pơm nhen rôp you ưh đei hla bar phep, rôp you glăi tơring, glăi tơdrong jang, găn hloh pơkăp asong; ưh đei kơmăi tơroi tơbăt vă hơlen tơdrong vih vơ̆t; ưh đei chih akŏm dah mă chih ưh kơ trŏ gah tơdrong rôp you; iŏk yua dôm tơmam rôp you đe kơ̆m dah mă chă rôp you tơ̆ tơring đak dơsĭ teh đak đe... adoi ƀơm phak hrŭ kơ dêh. Kơyuơ noh, tơdrong băt hơdah dôm tơchơ̆t hlôi jing kăp gĭt hăm rim ‘măng năm rôp you ka tơ̆ đak dơsĭ:  “Khul kơdră teh đak tơlĕch lơ tơdrong Tơchơ̆t, khul linh vei lăng đak dơsĭ ‘noh rim khei tơlĕch chă tơroi ăn kon pơlei jang ka băt hơdah. Hơpơi ‘meh tôm kon pơlei pơm kiơ̆ trŏ, đei tôm hla bơ-ar pơkăp, rôp you ka athei trŏ tơchơ̆t, vă Việt Nam bơ̆n dah tơtĕnh đei pơih lê̆ "The dreng" vă tĕch ka hơdang ăn teh đak đe gơh ‘lơ̆ng hloh”.

Adoi nhen lơ bơngai jang ka 'nao, bơngai jang ka Nguyễn Hữu Kính, kueng 3, Bãi Xếp, phương Quy Nhơn Nam hlôi tơguăt hăm đak dơsĭ đĭ jơhnơr hơrih, noh tơdrong pơm kiơ̆ trŏ khôi luơ̆t tơlĕch ưh hơdrô̆ tang găn tơdrong phak hrŭ mă oei vei vêr kơdih po păng vei vêr trong jang xa đunh khei năr:  “Nhôn đei khul vei lăng đak dơsĭ tơroi pơtho gah khôi luơ̆t, pơtho gah dôm tơdrong tơlĕch lơ̆m đak dơsĭ vă kon pơlei băt hơdah păng pơm kiơ̆ trŏ, ưh đei pơm yoch tơchơ̆t. Đơ̆ng duk jang rôp ka adoi pơm kiơ̆ trŏ khôi luơ̆t đei pơtho ăn. Hmach bơnê kơ hơnih linh vei lăng đak dơsĭ hlôi pơtho nhôn lơ lĕ dôm tơdrong tơchơ̆t atŭm ăn kơ nhôn pơm kiơ̆”.

Đại úy Lê Văn Hòa, Kơdră Hơnih jang hơlen Khul linh vei lăng đak dơsĭ Mũi Tấn ăn tơbăt, truh ou kơnh Tơchơ̆t  246 đơ̆ng Jơnŭm pơgơ̆r teh đak gah phak hrŭ pơm glăi hanh chĭnh lơ̆m tơdrong jang rôp you ka gô đei iŏk yua păng tơplih hăm dôm Tơchơ̆t so hơdrol ki. Kơyuơ noh, khul linh vei lăng dơsĭ hơnơ̆ng tơroi tơbăt ăn kon pơlei jang ka hlôh vao hơdah ah mă đe sư pơm hla bar ăn duk ka mơ̆t lĕch tơ̆ dơnŏk dơ̆ng:  “Hăm tơchơ̆t ‘nao gah sek phak pơm yoch hành chính lơ̆m IUU ‘noh hơnih jang hlôi chă tơroi ăn kon pơlei jang ka băt hơdah đơ̆ng rŏng kơ rôp you ka vih akŏm ah hơnih dơ̆ng ‘măn ka. Hăm dôm bơngai pơm glăi tơchơ̆t noh hơnih jang gô sek phak kiơ̆ tơchơ̆t đơ̆ng khôi luơ̆t, atŭm hăm ‘noh tơroi truh khul kơdră tơring băt vă atŭm vei lăng kon pơlei jang ka pơm glăi, tơgop jang ‘lơ̆ng ăn tơdrong pơih the dreng kơ Việt Nam”.

Oei hăm Hơnih linh vei lăng ‘Măng sơlam kơ Dơnŏk duk Quy Nhơn, hơnih linh ưh hơdrô̆ tơroi tơbăt tơ̆ dơnŏk duk, hơnih dơ̆ng oei mă oei pơgơ̆r lơ ‘măng tơroi pơtho gah khôi luơ̆t tơ̆ rim pơlei jang ka. Akŏm pơtho gah tơchơ̆t sek phak atăm hăm dôm tơdrong pơm glăi pơkăp lơ̆m Tơchơ̆t 246. Trung tá Vũ Đức Tuệ, Kơdră Hơnih linh vei lăng ‘Măng sơlam kơ Dơnŏk duk Quy Nhơn ăn tơbăt:  “Đơ̆ng rŏng rim ‘măng tơroi pơtho ‘noh gô tơgŭm ăn kon pơlei jang ka băt hơdah hloh dôm tơdrong tơchơ̆t đơ̆ng khôi luơ̆t, đơ̆ng noh pơm kiơ̆ trŏ ƀlep păng tơroi pơtho ăn ‘nhŏng oh lơ̆m unh hnam athei pơm kiơ̆. Kiơ̆ đơ̆ng pơtruh thơ điện tử, mã QR mă nhôn hlôi pơtruh ăn kon pơlei, ‘noh hơpơi ‘meh kon pơlei chih tơroi lơ̆m mã QR ‘noh nhôn gô pơtrruh khul pơm jang dăr lăng, sek tơlang kiơ̆ tơchơ̆t tơlĕch”.

Gia Lai dang ei đei  3.147 tong duk lơ̆m kơsô̆ 3.152 tong duk ka pơm jang tơ̆ đak dơsĭ hlôi pơlăp kơmăi hơlen lăng tơdrong vih vơ̆t trŏ nhen tơchơ̆t.

Ƀok Nguyễn Anh Dũng, Phŏ Kơdră Jơnŭm vei lăng Dơnŏk duk dêh char Gia Lai, ăn tơbăt, tơdrong tơroi tơbăt đei pơm jang hơnơ̆ng, đơ̆ng mă duk hơmet lĕch đơ̆ng dơnŏk truh ah mơ̆t dơ̆ng. Gơnơm đơ̆ng noh, bơngai jang ka roi năr roi kơchăng hloh tơdrong pơm kiơ̆ trŏ tơchơ̆t gah rôp you ka, mă kăl noh dôm tơchơ̆t gah tơjră rôp you IUU:  “Lơ̆m khei năr tơlĕch jang, kon pơlei băt hơdah gah IUU noh ah vih truh dơnŏk ka, ‘noh pơm kiơ̆ ‘lơ̆ng tơdrong jang rôp you ka, vei trŏ hăm tơdrogn tơchơ̆t tơlĕch. Truh dang ei, tôm duk jang ka adoi pơm kiơ̆ trŏ ‘lơ̆ng, khei năr truh nhôn hơdrin hloh dơ̆ng tơdrong jang hơdoi hăm dôm hơnih jang nai, pơtho ăn kon pơlei chă chih tôm tơdrong jang lơ̆m thơ điện tử, vă kon pơlei hlôh vao hơdah hloh gah tơplih kơmăi kơsô̆ păng rim tơdrogn tơchơ̆t tơlĕch đơ̆ng dêh char”.

Tơchơ̆t 246/2026/NĐ-CP gô iŏk yua đơ̆ng năr 18/8. Tơdrong hơtŏk chă tơroi tơbăt, dăr hơlen păng sek tơlang tơdrong pơm glăi đei khŭl jang kơpal sơkơ̆t hơdah jĭ trong jang kăp gĭt vă hơtŏk pơm kiơ̆ trŏ khôi luơ̆t tơlĕch ăn kon pơlei jang ka, tang găn tơdrong rôp you IUU, tơgop jơhngơ̆m atŭm hăm teh đak pơklaih tơdrong  “the dreng” mă Hơnih jang châu Âu pơkăp hăm tơdrong jang ka hơdang kơ Việt Nam.