Bơngai tang măt Nguyễn Xuân Nghiêm, khul Đà Nẵng akhan, hơgrop jang 4 tơdrong jang tơm teh đak jing 1 tơdrong jang ‘noh mĭnh tơdrong tơplih tih tên ưh khan găh lơ tơdrong jang mă oei tơplih trong pơgơ̆r jang kiơ̆ tơgum djru atŏk tơ iung tơ̆ dôm tơring tơnap tap. Kơ yuơ lơ loh, tơdrong kăl hloh ‘noh hơgrop kăl ‘lơ̆ng hơ iă; ưh kơ pơm tơjur tơdrong tơgŭm hăm dôm tơring, dôm bơngai oei tơnap tap; adoi pơjao jang kăl yak hơdoi hăm tơdrong kĕ jang, khul jang păng jơnei tơdrong jang kăl đei pơtŏ kiơ̆ iung jang đei iŏk jơnei:“Tơdăh hlôi sơkơ̆t hơdăh ‘nou jĭ mĭnh tơdrong jang tơm teh đak kăl hloh lei kăl đei mĭnh trong tơlech jang atŭm, mĭnh lo-gic trong jang tơgum djru lei lăi, mĭnh trong chĕp pơgơ̆r khul jang păng mĭnh trong vei lăng. Kiơ̆ kơ ĭnh hơgrop ưh khan xut xa rim trong tơlĕch jang, rim bơngai đei sa hơpăh dăh mă trong jang kăl kiơ̆ tơdrong jang, hơdrơ̆k dơ̆ng dôm trong jang kăl oei vei kơjăp, dôm trong proh hơmet tơdrong vă jang, pơjao khul jang, pơgơ̆r jang kiơ̆, dăr lăng păng hơlen kăl lei lăi dih băl. Mă kăl hơgrop kăl pơjing đei kĕ chĕp pơgơ̆r ‘lơ̆ng hơ iă ưh khan lăp hơgrop kon jên tơmơ̆t jang đĕch ôh”.

Kiơ̆ đơ̆ng bơngai tang măt Nguyễn Thị Yến Nhi, khul Vĩnh Long, tơdrong tơchĕng kơ tơdrong jang tơm teh đak kăl iung jang kiơ̆ trong Teh đak tơgum djru vă kơdih kon pơlei atŏk tơ iung. Kơ yuơ tơjur dơnuh kơjăp ‘lơ̆ng kăl đei pơtŏ hăm tơdrong jang iŏk đei jơnei (đơ̆ng rŏng tơgŭm djru, kon pơlei đei tơdrong jang dăh mă ưh, jang sa iŏk đei dang yơ, hăm đei tơdrong jang sa sơđơ̆ng ưh păng kơdih kĕ dơ̆ng kơjăp dăh mă ưh?):“Kăl tơlĕch ăn jang hơdrol dôm tơdrong pơjing tơdrong jang, pơm tŏk jang sa iŏk đei, tơgoăt jang hơdoi choh jang sa, pơm tơlĕch, tĕch mơdro, pơtho tơdrong jang kiơ̆ tơdrong ‘meh vă krao tơmơ̆t jang, tơplih kơsô̆, mơdro sa điên tư, atŏk tơ iung tơmam drăm kăl, tơmang pơhiơ̆ pơlei pơla, tơmang pơhiơ̆ choh jang sa, tơmang pơhiơ̆ tơdrong oei sa. Ĭnh apĭnh athei lơ̆m tơdrong lăng hơlen tơdrong jang kăl tơplih mă ‘lơ̆ng, ‘nĕ kơlăng tơlĕch kon jên tơmơ̆t jang dôm yơ vă pơm ‘long pơtŏ tơm hloh ăn tơdrong jang keh đang. Mĭnh tơdrong vă jang tơlĕch kon jên tơmơ̆t jang đei 100% mă lei đơ̆ng rŏng pơtôch kon pơlei oei dơnuh, trong jang ưh kơ đei vei kơjăp lei ‘noh ưh khan iŏk đei jơnei ôh. Hơdrơ̆k dơ̆ng, mĭnh tơdrong vă jang tơgum kon pơlei đei tơdrong jang sa, jang sa iŏk yoa lơ kĕ yak hloh dơnuh hin kơjăp păng gơh jang kiơ̆ kơdih đơ̆ng rŏng tơgŭm djru ‘noh mă jing tơdrong iŏk đei jơnei tơpă”.

Pơma hơdăh, tơdrong jơnei kơ tơdrong jang kăl pơtŏ kiơ̆ pêng tơdrong tơplih ‘noh: Đơ̆ng vei lăng kiơ̆ rim tơdrong jang jing vei lăng hơgrop tơdrong jang; đơ̆ng vei lăng blŭng a jing vei lăng kiơ̆ jang iŏk đei jơnei; đơ̆ng Trung ương tơchơ̆t lơ tơdrong jang hơdăh jing tơring iung jang, chiu pŭ hơnăp jang păng đei vei lăng kiơ̆ tơdrong jang keh đang. Bơngai tang măt Bùi Văn Dũng, khul Thanh Hóa pơma tơbăt nơ̆r tơgop:“Ĭnh lăp đon hăm trong tơring tơchơ̆t, tơring pơgơ̆r jang kiơ̆ păng chiu pŭ găh tơdrong jang ou. Trung ương vei lăng dôm trong tơlĕch jang, tơdrong pơkăp păng dăr lăng hơlen. Mă lei pơjao jang kăl tơpă, pơjao tơdrong jang kăl pơjao hloi gơh tơchơ̆t păng gơh chĕp pơgơ̆r vei lăng khul jang. Kăl tơplih đơ̆ng Trung ương dăr lăng hơlen dôm trong tơlĕch jang jing Trung ương dăr lăng tơdrong jang, tơdrong pơkăp păng jang keh đang. Păng ĭnh apĭnh athei khul kơdră chĕp pơgơ̆r teh đak kăl pơjao hloi ăn mĭnh hơnih bơ̆ jang chĕp kơ̆l pơm tơm vei lăng tơdrong hơgrop jang ou”.

Bơngai tang măt Lý Thị Lan, khul Tuyên Quang athei pơm hơdăh hloh dơ̆ng tơdrong iung jang đơ̆ng tơring lơ̆m rơih trong jang kiơ̆. Mă lei găh gơh jang, kih thuơ̆t mă kâp tơring tim mă kĕ kăl đei trong pơtho ăn, tơgŭm ăn. Găh tơchơ̆t tơring kăl proh hơmet tôm kon jên pơklăp tơmơ̆t jang lơ̆m trong pơprŏ tơmơ̆t jên jang teh đak, trong vă tơlĕch kon jên jang teh đak rim sơnăm kiơ̆ pơkăp kăl, bơngai tang măt pơma hơdăh:“Hăm rim dêh char groi kông, sơlam teh đak, đei lơ kon kông oei tim mă gơh vă proh hơmet pơ ‘lơ̆ng kon jên tơmơ̆t jang. Kiơ̆ kơ ĭnh tơchơ̆t ou kăl đei hơlen mă brĕ, dôm dêh char ou hmă hmă đei bơngai đei iŏk yoa sa hơpăh tôch kơ lơ kơna kon jên Trung ương tơmơ̆t jang tôch kơ lơ. Tơdăh hơlen kon jên pơklăp kiơ̆ kon jên Trung ương pơjao lei ưh kơjor kon jên tơring pơklăp ăn tôch kơ lơ, lơ̆m mă kon jên jang tơring ưh kơ lơ, lei ưh kơjor gô đei tơdrong Trung ương hlôi proh hơmet ăn kon jên mă lei tơring tơnap mă gơh iok yoa pơđĭ kon jên tơmơ̆t jang ou kơ yuơ kon jên vă pơklăp ăn đơ̆ng tơring ưh kơ đei tôm”.

Tơblang hơdăh, pơm hơdăh nơ̆r pơma đơ̆ng bơngai tang măt, Kơdră chĕp pơgơ̆r Hơnih tơm jang jên hu teh đak Ngô Văn Tuấn tơbăt:“Oei vei kơjăp kon jên tơmơ̆t jang mă puăn tơdrong jang hlôi đei Kuô̆k hô̆i kĭ tơchơ̆t. Kon jên Trung ương gô tơgŭm ăn rim tơring ưh kơ đei tôm kon jên vă pơklăp ăn, dăh mă gơh pơklăp ăn mă lei ưh kơ đei tơgop ăn Trung ương. Klăh asong păng tơgum djru đơ̆ng Trung ương kiơ̆ trong hlôi tơchơt, hơlen kiơ̆ lơ̆m tơdrong mơmat tat dang yơ, hơlen kiơ̆ lơ̆m tơdrong dang ei păng trong tơlĕch ăn, lơ̆m ou hơmet pơ ‘lơ̆ng hơlen găh tơdrong tơlĕch kon jên jang dôm yơ, tơdrong vei lăng iŏk yoa kon jên jang lơ liơ. Păng mă kăl Trong vă pơjing Tơdrong tơchơ̆t jei sơkơ̆t hơdăh, lăng kơjăp tơgum djru kơtang ăn kon pơlei kon kông groi kông”.