Sơnăm hŏk 'nao 2026 - 2027, hơnih jang pơtho pơhrăm dêh char Lâm Đồng gô vă iŏk yua 250 lăm hŏk, lơ̆m noh đei 200 lăm hŏk kiơ̆ môn păng 50 hnam bơ̆ jang. Atŭm hăm noh đei cham tơplŏng kơdou, hơnih hŏk hôp, brư̆ brư̆ man keh đang hnam trưng, lăm hŏk kiơ̆ trŏ todrong kăl hŏk pơhrăm kơ đe hŏk tro.

Atŭm hăm ming man hnam trưng lăm hŏk, tôm tơmam drăm pơtho pơhrăm, hla bơ-ar hŏk ăn hŏk tro, mă kăl noh hŏk tro tơ̆ tơring tơnap tap đei lăng jĭ tơdrong jang kăl hloh lơ̆m sơnăm hŏk 'nao. Tơ̆ hơnăp Hơnih jang Pơtho Pơhrăm Lâm Đồng hlôi asong 49,7 ti hlj vă răt hla bơ-ar hŏk 'măng mă 1 ăn hŏk tro tơ̆ dôm hnam trưng kon kông teh đak rong 'me; hŏk tro tơ̆ 5 xah sơlam teh, tơring tơm Phú Quý păng dôm xah tơnap tap kơ dêh.

Tơ̆ dôm hơnih pơtho pơhrăm, tơdrong akŏm hơtuh săch atŭm, hơnih vei hla bơ-ar hŏk, hơvơn asong păng tơplih hla bơ-ar hŏk đơ̆ng dôm khuă hŏk pơtoi đei hơtŏk jang kơtang. Rim hnam trưng pơtoi tơgŭm ăn hŏk tro kon kông, hŏk tro hin đơnuh, hŏk tro hơve hơvo jo jăn, mơti mĕ ƀă, kiơ̆ đơ̆ng noh vei sơđơ̆ng 'lơ̆ng ăn tôm hŏk tro đei mah hla bơ-ar vă chă hŏk pơhrăm, ưh đei lê̆ tơdrong tơnap tap pơgăn lê̆ tơdrong năm hŏk tơ̆ trưng. Ƀok Nguyễn Văn Quang, Phŏ Kơdră Hơnih jang vei lăng kon pơlei xah Đam Rông 4, dêh char Lâm Đồng ăn tơbăt, tơdrong jang hơmŏ ăn sơnăm hŏk 'nao kơ xah hlôi keh đang, kơchăng sơng hloh 4.300 hŏk tro truh hŏk tơ̆ hnam trưng:

“Hnam trưng, lăm hŏk, nhôn asong jên hơmet đang bơih. Rim tơmam pơtho pơhrăm nhôn răt hơmŏ đei tôm. Truh dang ei lu kơƀang tang dŏ jô̆ hloi hla bơ-ar hŏk ăn rim hnam trưng tơ̆ Đam Rông 4 hlôi đei tôm. Tơdrong iŏk hŏk tro năm hŏk tôm 100% đe mon adoi đei truh hŏk tơ̆ hnam trưng. Nhôn kŭmg hơdrin pơm jang 'lơ̆ng hloh vă tơgŭm ăn hŏk tro hin dơnuh, tơnap tap păng kon pơlei kon kông”