Năr 21/5, Kơdră Kuô̆k hô̆i Trần Thanh Mẫn pơm jang hăm Hơnih jang gah bơngai Kon kông. Kơdră Kuô̆k hô̆i ră hơdah, hăm tơdrong pơkăp roi năr roi kơhret, Hơnih jang găh bơngai Kon kông athei tơplih trong pơm jang 'nao kiơ̆ pơkăp tenh kuăng, khua hŏk, tơpă; rim sơnong jang athei đei khei năr pơkă, tơmam drăm đei hơdah păng bơngai chiu pŭ sơnong hơdah.

Kơdră Kuô̆k hô̆i pơtruh nơ̆r hăm Hơnih jang găh bơngai Kon kông kơchăng băt hơdah tơdrong, tơtom tơgŭm ăn kơ Đảng, Teh đak gah dôm tơdrong đei tơrĕk truh tơring kon pơlei kon kông păng groi kông. Atŭm hăm noh, athei jang hơdoi kơjăp hăm dôm hơnih jang kơpal kiơ̆ sơnong chă hơlen lăng tơdrong jang mŭk drăm – tơpôl, vei sơđơ̆ng tơdrong hơrih tơ̆ tơring sơlam, tơring kăp gĭt; hơtŏk tơdrong tơguăt hăm tơring, kơchăng tơlĕch trong jang vă hơtŏk tơdrong tơguăt tơguăl tôm kon pơlei, vei sơđơ̆ng chinh trĭ - tơpôl.