Hloh 70 sơnăm, kră pơlei Ayun Y Hmoan oei tơnăp bơ̆ jang Măt trân tơ̆ ƀuôn Tri Gha, tơring Ea Drăng, dêh char Dak Lăk. Rim năr, ƀok oei hơnơ̆ng năm truh rim ŭnh hnam vă băt hơdăh tơdrong oei sa lơ̆m pơlei, đơ̆ng tơdrong jang sa truh tơdrong jang kơ đe hơdruh tơdăm.

Chă lăng ‘măng pơgơ̆r Hop akŏm tih kơdră tang măt Mặt trận Tổ quốc Việt Nam ‘măng mă XI ‘moi kiơ̆ brŏ tivi ou to, ƀok Y Hmoan hơpơi ‘meh vă, Mặt trận rim kâp jăl jang ‘nao gô akŏm lơ̆m tơplih ‘nao trong bơ̆ jang, pơm hơtŏk jang ‘lơ̆ng bơ̆ jang dăr lăng, tơblang hơdăh tơpôl. Hăm tơring groi kông, tơring hơtăih yăih, tơring kon kông, kăl đei nơ̆r tơblang hơdăh đơ̆ng Mặt trận vă rim tơdrong jang, trong tơgŭm djru tơlĕch jang jơnei, ‘lơ̆ng hơ iă hloh dơ̆ng. Kiơ̆ đơ̆ng kră pơlei Y Hmoan, tơdrong kăl hloh lăng ba lơ̆m jơ ‘năr ou ‘noh tơgŭm djru tơdrong hơrih sa, pơjing tơdrong jang ăn hơdruh tơdăm tơring choh jang sa.“Ba tôch kơ chhôk kơ yuơ kon pơlei jei jang kiơ̆ ‘lơ̆ng rim trong bơ̆ jang đơ̆ng Đảng păng teh đak, gơnơm đơ̆ng noh kơna pơlei pơla đei sơđơ̆ng dơ̆ng kơjăp. Kon pơlei bơ̆n dang ei ‘meh vă hloh ‘noh pơlei pơla sơđơ̆ng, đei tơdrong jang sa, kon sou đei tơdrong jang, jang sa atŏk tơ iung.”

Jĭ tơring gơnang đơ̆ng lơ̆m choh jang sa, kon pơlei dêh char Dak Lăk hơpơi ‘meh vă Măt trân tổ quốc rim kâp đei hơnăp jang tang măt ăn nơ̆r pơma kơ bơngai tăh hla, kon pơlei, gô đei dôm nơ̆r truh ăn trŏ lăp ăn kơ Kuô̆k hô̆u, Khul kơdră teh đak vă đei trong jang ‘lơ̆ng hơ iă găh choh jang sa, kon pơlei choh jang sa păng tơring choh jang sa.

Hăm groi teh să nhen Dak Lăk, choh jang sa oei đei lơ tơdrong hiong răm đơ̆ng tơdrong kơjă tŏk jur păng ‘mi kial tơplih kơtang, mă lei găh tơdrong tĕch răt tơmam drăm choh jang sa, tơdrong lăng tông choh jang sa oei tim mă lăng ba trŏ lăp. Yă H Wơn Kmăn, kơdră chĕp pơgơ̆r ƀuôn Knach, tơring Dak Liêng, dêh char Dak Lăk tơlĕch nơ̆r pơma:“Tơ̆ ou tơdrong hơrih sa kơ kon pơlei oei tơƀơ̆p tôch kơ lơ tơdrong tơnap tap, nhôn jei hơpơi ‘meh vă Mặt trận mơ̆ng nơ̆r tơgop đơ̆ng kon pơlei vă tơroi tơbăt ăn kơdră kơpal, đei trong tơgŭm djru trŏ lăp hăm dôm bơngai đei iŏk yoa ăn teh đak, hăm dôm bơngai kră krŭt pă gan pran jăng, tơgum djru xut xa hnam pơgia, tơgum djru hơdăh ‘long, yŏng kon tơrong vă choh jang sa, atŏk tơ iung mŭk drăm, sơđơ̆ng hơrih sa”.

Atŭm hăm rim tơdrong oei sa, jang sa, hơrih sa, chă lăng hơlen Hop akom tih kơdră tang măt Mặt trận Tổ quốc Việt Nam ‘măng mă XI, rim răih kon pơlei dêh char Dak Lăk hơpơi ‘meh vă, dôm tơdrong hơpơi ‘meh vă đơ̆ng tơring đei chă mơ̆ng mă tôm mă nhên, tơroi tơbăt ăn mă tơpăt, rơhao păng pơjing tơlĕch jang kiơ̆ trŏ lăp hăm yan ou hloi.

Kiơ̆ đơ̆ng ƀok Lương Triều Dương, phương Tuy Hòa, dêh char Dak Lăk, tơdrong kăl hloh oei jĭ khul kang ƀô̆ Măt trân, kang ƀô̆ tơring jang ‘lơ̆ng, tơklep hăm kon pơlei, hlôh vao kon pơlei, mơ̆ng kon pơlei chă pơma.“Ĭnh lăp hơpơi ‘meh vă mĭnh tơdrong ‘noh đe sư pơma gơh ‘noh jang mă gơh hloi, kăl tơklep hăm kon pơlei, hlôh vao kon pơlei, mơ̆ng nơ̆r kon pơlei chă tơgop, kăl iung tơjră tang găn dôm tơdrong sar bar sa pơgơ̆m pơjĭp, bơ̆ jang ưh tơnăp”.

Lơ̆m khei ‘năr tơplih kơsô̆ tơlĕch jang kơtang, tơ̆ lơ tơring ataih yăih kơ dêh char Dak Lăk, rim khul Zalo kon pơlei tŏk bok jing gơng tơroh joăt joe ƀar păh kon pơlei hăm khul kơdră tơring păng Mặt trận tơring. ‘Ngoăih rim ‘măng pơgơ̆r tơƀơp kơtă, lơ nơ̆r tơbăt đơ̆ng kon pơlei đei kơtơ̆ng kiơ̆ điên thoăi, khul tơpôl dăh mă rim hơnih jang kmăi kmŏk kơsô̆. Đơ̆ng tơdrong trong gre hư răm kơtang, ưh kơ măh đak sŏ nhă, tơdrong chă pơm hla bơar, dôm nơ̆r tơbăt hlôi đei pơtruh tĕnh koăng hloh truh hăm khul kơdră tơring.

Kiơ̆ đơ̆ng ƀok Phạm Văn Bảy, Kơ iĕng Kơdră chĕp pơgơ̆r Hơnih bơ̆jang MTTQ Việt Nam dêh char Dak Lăk, tơplih ‘nao trong pơrô pơrôp kon pơlei tŏk bŏk tơlĕch ăn hơdăh hloh hăm khul jang Măt trân rim kâp, mă kăl tơ̆ tơring hơtăih yăih, tơring kon kông. Lơ̆m ou, tơdrong chă mơ̆ng dôm nơ̆r tơgop đơ̆ng tơring păng jang kiơ̆ kmăi kmŏk kơsô̆ ‘noh jĭ tơdrong kăl hloh vă pơm hơtŏk bơ̆ jang ‘lơ̆ng.“Vă jang đei tơdrong ou bơ̆n kăl jang kiơ̆ kmăi kmŏk kơtơ̆ng ang, ư̆ng yŭng kơsô̆ vă rim tơdrong kơtơ̆ng ang, tơlĕch jang tĕnh koăng, tơtom hloh; kơtơ̆ng nơ̆r kon pơlei tơgop, adoi tơlĕch đei tơdrong jang kăl truh hăm kon pơlei vă kon pơlei đei iŏk yoa sa hơpăh dôm tơdrong jang jơnei hloh”.

Tơplih ‘nao trong bơ̆jang kiơ̆ trong tơjê̆ hon pơlei, tơklep kon pơlei, lăng truh tơring păng atŏk kơtang tơplih kơsô̆ tŏk bŏk jing trong tơlĕch ăn hăm Mặt trận Tổ quốc lơ̆m jăl ‘nao. Đơ̆ng jơnei ‘Măng Hop akŏm tih kơdră tang măt Mặt trận Tổ quốc Việt Nam ‘măng mă XI, kon pơlei Dak Lăk hơmŏ nơ̆r pơma đơ̆ng tơring gô hơnơ̆ng đei mơ̆ng tôm tong hloh dơ̆ng, dôm tơdrong tơnap tap lơ̆m hơrih sa đei tơbăt tơtom hloh dơ̆ng păng dôm trong jang tơgŭm djru đơ̆ng teh đak roi năr roi trŏ lăp hăm yan ou hloh dơ̆ng.