Mă hơdăh, dêh char Lâm Đồng tơlĕch bơ̆ jang truh sơnăm 2030 hơdrin đei đơ̆ng 15 truh 16 tơring păng 117 pơlei tơring kon kông, groi kông yak hloh tơdrong tơnap tap hloh. Vă jang keh đang trong tơlĕch jang ou, Lâm Đồng gô tơlĕch jang hrơ̆ch mĭnh ‘măng rim trong jang atŏk tơ iung mŭk drăm tơpôl, lơ̆m ou lăng kơjăp găh tơmơ̆t jên jang dôm tơdrong kăl tơgŭm djru choh jang sa, pơjing đei tơdrong jang sa kơjăp ăn kon pơlei. Atŭm hăm ‘noh pơm hơtŏk jang ‘lơ̆ng pơtho pơhrăm, vei lăng jơhngơ̆m pran jăng grăng akou, atŏk tơ iung khul jang păng vei răk tơdrong oei sa joăt joe ‘lơ̆ng rŏ sơ̆ ki. ‘Ngoăih kơ ‘noh, dêh char jei gô lăng kơjăp hơvơn rim khul tơpôl, atŏk kơtang iung jang kơtă, đơ̆ng noh hơmet pơ ‘lơ̆ng tơdrong hơrih sa, pơjing đei tơplih hơdăh ăn rim tơring oei đei lơ tơdrong mơmat tat.