‘Măng hop akŏm mă 10 gô pơgơ̆r blŭng a lơ̆m năr 20/10 păng tơchĕng hơlou pơtôch lơ̆m năr 12/12. Hop akŏm ou Kuô̆k hô̆i gô lăng hơlen, tơchơ̆t: 45 tơdrong vă pơjing khôi luơ̆t, tơdrong tơchơ̆t bơ̆ jang pơjing khôi luơ̆t; 13 khul tơdrong găh jang mŭk drăm-tơpôl, kon jên bơ̆ jang teh đak, bơ̆ jang dăr lăng păng tơchơ̆t rim tơdrong kăl anai kơ teh đak; adoi, đei 13 khul tơdrong jang rim hơnih bơ̆ jang pơtruh ăn vă Kơdră tang măt Kuô̆k hô̆i lăng hơlen.

Thủ tướng Teh đak Phạm Minh Chính akhan, tơdrong tơ iung pơjing khôi luơ̆t ‘moi kiơ̆ trong bơ̆ jang teh đak pháp quyền xã hội chủ nghĩa kơ kon pơlei, kơ yuơ kon pơlei, yuơ kon pơlei, lăng kon pơlei ‘noh tơm hloh. Thủ tướng teh đak athei ƀar hơnih jang tơbăt dih băl, iung jang hơdoi kơjăp; rim hơnih tơm, hơnih jang kăl iung jang hơdoi hăm Mặt trận Tổ quốc ‘moi kiơ̆ bơ̆ jang ‘lơ̆ng vă mơ̆ng nơ̆r tơgop đơ̆ng kon pơlei, khul joăt jang, bơngai khoa hŏk; tơdrong jang kiơ̆ ưh kơ tôm tong, ưh kơ hăt hot, sơđơ̆ng ăn ƀlep trong tơlĕch ăn, mĭnh păh pơjing đei bơ̆ jang ‘lơ̆ng, mĭnh păh pơm hơtŏk jang keh đang tĕnh koăng. ‘Ngoăih kơ ‘noh, bơ̆ jang hơmet ăn rim tơdrong vă pơjing khôi luơ̆t kăl hơlen mă brĕ, iung jang hơdoi kơjăp, ‘lơ̆ng hơ iă ƀar păh rim hơnih bơ̆ jang; iung bơ̆ jang đĭ jơhngơ̆m đon, adoi iok yoa hloi bơ̆ jang hăm kmăi kmŏk gơ̆h hơgei. Thủ tướng Teh đak Phạm Minh Chính pơma hơdăh:“Hơnơ̆ng tơplih jơhngơ̆m đon tơchĕng, atŏk kơtang hơmet pơ ‘lơ̆ng rim tơdrong tơchơ̆t khôi luơ̆t, tơplih jơhngơ̆m đon bơ̆ jang lăng kăl lơ̆m vei lăng jing jơhngơ̆m đon pơchoh trong păng pơvih pơvăn. ‘Nou jing mĭnh trong pơkoăl kơtang hloh lơ̆m chăl hrei ou. Lăng kơjăp jang kiơ̆ đơ̆ng tơdrong yan ou, yom kiơ̆ lơ̆m tơdrong yan ou păng iŏk tơdrong jang ƀôh hơdăh yan ou pơm kơnăl. Trong tơchĕng kơ bơ̆n kăl tơplih ƀơ̆t dou. Ĭnh tơbăt ăn kơ bơ̆n lơ lou, tơdrong đei iŏk đơ̆ng tơchăr, hơyak pran đei đơ̆ng tơplih ‘nao, jơhngơ̆m pran đei đơ̆ng kon pơlei. Kơna tơdrong pơjing khôi luơ̆t tơ iung pơjing khôi luơ̆t ‘noh bơ̆n jei chă tơchĕng hơlen păng tơlĕch jang kiơ̆ kơjăp trong tơchơ̆t ou”.

         Lăp đon hăm nơ̆r pơma pơtôch đơ̆ng Thủ tướng teh đak Phạm Minh Chính, Kơdră chĕp pơgơ̆r Kuô̆k hô̆i Trần Thanh Mẫn tơbăt dơ̆ng, jơ ‘năr đơ̆ng dang ei truh ‘măng hop akŏm pă đunh bơih, mă kăl lơ̆m khei ‘năr đei lơ tơdrong kăl nhen hơmet ăn Hop akŏm tih kơ Đảng lơ̆m teh đak ‘măng mă 14, pôk rơ̆ih Kơdră tang măt Kuô̆k hô̆i jăl 16 păng Jơŭm vei lăng kon pơlei rim hơnih jăl jang 2026-2031. Mă lei, Kuô̆k hô̆i, Khul kơdră chĕp pơgơ̆r teh đak oei vă hơmet ăn ‘lơ̆ng ‘măng hop akŏm mă 10, ‘măng hop akŏm tuch luch kơ jăl jang Kuô̆k hô̆i jăl 15.

Kơdră chĕp pơgơ̆r Kuô̆k hô̆i pơkă, rim hơnih pơm tơlĕch kăl jang kiơ̆ ƀlep khôi luơ̆t pơm tơlĕch hla bơar tơchơ̆t khôi luơ̆t, rim tơdrong tơchơ̆t, tơdrong pơkăp hlôi đei tơ iung pơjing. Đơ̆ng rŏng hop akŏm ou, Tổng thư ký Kuô̆k hô̆i iung jang hơdoi hăm Kơdră chĕp pơgơ̆r Hơnih bơ̆ jang ăn Khul kơdră chĕp pơgơ̆r teh đak hơmet ăn trong jang lơ liơ mă trŏ ƀlep hăm khei ‘năr pơgơ̆r rim ‘măng hop akŏm kơ Đảng. Ƀar păh kăl hơnơ̆ng iung jang hơdoi tĕnh koăng hloh dơ̆ng tơdrong hơmet ăn hla bơar hop akŏm, chih tơmơ̆t lơ̆m APP Kuô̆k hô̆i vă rim Kơdră tang măt Kuô̆k hô̆i lăng hơlen. Kơdră chĕp pơgơ̆r Kuô̆k hô̆i tơbăt, ‘moi kiơ̆ tơlĕch jang kơtang, tơ̆ ‘măng hop akŏm ou, Kuô̆k hô̆i păng Khul kơdră teh đak drơ̆ng minh nơ̆r ưh kơ pơdơ̆h lon năr lơ̆m ‘măng hop akŏm:“Kuôk hô̆i jei ưh kơ pơgơ̆r apĭnh jet mă lei tơplih hăm trong, Khul kơdră chĕp pơgơ̆r teh đak tơroi tơbăt tôm tong vă Kuô̆k hô̆i pơma dơnuh lơ̆m mĭnh hơyuh. Hơnih bơ̆ jang pơtruh ăn tơdrong bơ̆ jang kăl proh hơmet tôm tong tơdrong vă tơroi tơbăt đĭ đăng dôm nơ̆r tơbăt đơ̆ng Kơdră dơnơm, Kơdră chĕp pơgơ̆r hơnih jang tang măt tơdrong jang ‘noh tơroi ăn hơdăh. Kơ yuơ trong jang kăl, kơna ‘măng hop akŏm Kuô̆k hô̆i ‘măng mă ou bơ̆n gô klăh asong khul chă pơma dơnuh dih băl. ‘Moi kiơ̆ chă pơma dơnuh kiơ̆ kơ khul jang mŭk drăm, khul jang tơpôl, khul jang đơ̆ng khôi luơ̆t khoa hŏk kmăi kmŏk vei lăng sơđơ̆ng teh đak, sơđơ̆ng tơpôl bơ̆n tơklăh jing khul khôi luơ̆t pơma dơnuh dih băl”.

Kơdră chĕp pơgơ̆r Kuô̆k hô̆i athei rim Kơdră dơnơm, Kơdră chĕp pơgơ̆r Jơnŭm vei lăng kon kông, rim Kơdră hơnih bơ̆ jang kăl iung jang tơnăp rim trong vă pơjing Khôi luơ̆t kơ yuơ hơnih bơ̆n pơm tơlĕch, pơtruh ăn, lăng hơlen dĭng truh Kuô̆k hô̆i pơdrơ̆ng kiơ̆. Atŭm hăm ‘noh, rim Kơdră dơnơm kăl pơrô̆ pơrô̆p hơnih bơ̆n atŏk kơtang iung jang kiơ̆ kmăi kmŏk kơtơ̆ng ang, tơplih kơsô̆, mă kăl jang kiơ̆ kmăi kmŏk gơ̆h hơgei lơ̆m tơdrong dăr lăng hơlen khôi luơ̆t so, trong vă pơjing khôi luơ̆t hle vă tơ iung pơjing keh đang hrôih, jơnei. Kơdră chĕp pơgơ̆r Kuô̆k hô̆i Trần Thanh Mẫn lăp đon hăm  Thủ tướng teh đak Phạm Minh Chính mưh akhan, ƀar păh kăl iung jang hơdoi kơjăp iăp kơtang mĭnh nơ̆r ƀơ̆r đon, pơma hơdăh, ‘măng hop akŏm ‘noh jơnei atŭm kơ Khul kơdră chĕp pơgơ̆r teh đak, Kuô̆k hô̆i hăm trong chĕp pơgơ̆r đơ̆ng Khul kơdră chĕp pơgơ̆r Trung ương Đảng, Hơnih tơm Chinh trĭ, Ban Bí thư păng Tổng Bí thư Tô Lâm.