Iung pơma pơrô̆, Kơdră chĕp pơgơ̆r Kuô̆k hô̆i pơma hơdăh, mĭnh khôi luơ̆t ‘lơ̆ng kăl “kơjăp đơ̆ng trong bơ̆ jang, trei lơ̆m tơchơ̆t, drơ̆ng mĭnh nơ̆r lơ̆m đĭ đăng, jang kiơ̆ kơjăp ‘lơ̆ng”. ‘Nou jei jing trong tơlĕch ăn vă bơ̆ jang pơjing khôi luơ̆t roi năr roi kơjăp trŏ lăp hăm tơdrong hơrih sa, hăm dôm tơdrong kon pơlei păng hơnih mơdro sa tŏk bŏk lăng kơjăp.

Kiơ̆ đơ̆ng Kơdră chĕp pơgơ̆r Kuô̆k hô̆i Trần Thanh Mẫn, prăt khei ‘năr pơjing khôi luơ̆t mă blŭng iung jang đơ̆ng trong bơ̆ jang ‘lơ̆ng, ưh khan găh lơ apăng. Mĭnh tơdrong khôi luơ̆t kăl pơm hơdăh tŏk bok xek tơlang đei tơdrong yă kiơ kơ tơdrong yan ou, kơ yuơ kă kiơ mă vă hơmet ming khôi luơ̆t, trong tơchơ̆t ‘nao pơjing đei tơdrong hơ iă yă kiơ, đei ƀơm truh tơ̆ bu, kon jên jang kiơ̆ lơ liơ, khul bơ̆ jang đơ̆ng yơ păng hơnih bơ̆ jang ayơ chiu pŭ.

Mă kăl, rim kơdră tang măt kăl akom pơma dơnuh dôm tơdrong tơchơt oei đei nơ̆r tơgop phara dih băl, dôm tơdrong đei ƀơm truh kơtă hăm kon pơlei, hơnih mơdro sa; dôm tơdrong tơchơ̆t ‘nao tim lăh đei dăh mă tim mă đei jang pơlong năng hơdăh. Kơdră chĕp pơgơ̆r Kuô̆k hô̆i Trần Thanh Mẫn athei bơ̆ jang pơjing khôi luơ̆t kăl kăl tơƀôh hơdăh jơhngơ̆m đon hlôh vao ‘nao, lơ̆m ou khôi luơ̆t akŏm lơ̆m dôm tơdrong găh gơh jang kơ Kuô̆k hô̆i, đei tơchơ̆t kơjăp păng sơđơ̆ng. Khôi luơ̆t gơh kơđeh ƀiơ̆ mă lei ưh kơ gơh tŏsĕt tơdrong tơchơ̆t; tơdrong tơchơ̆t tŏ sĕt ƀiơ̆ mă lei tơdrong chiu pŭ kăl hơdăh hloh. Khôi luơ̆t kăl druh kiơ̆ tom tơdrong hơrih, mă lei ưh khan hăm trong hơnơ̆ng hơmet ming khôi luơ̆t.“Dôm tơdrong đei ƀơm truh tơdrong pơm tơm kơdih kon bơngai, pơm tơm kơ kon pơlei, găh tơdrong mơdro sa, klăh asong kon jên jang, hơnih bơ̆ jang păng hơnăp jang kơ hơnih bơ̆ jang Teh đak đei tơchơ̆t hơdăh hloh lơ̆m khôi luơ̆t. Hơdrơ̆k dơ̆ng, ưh kơ gơh tơnơ̆t lơ̆m khôi luơ̆t tôch kơ lơ trong kih thuơ̆t bơ̆ jang dăh mă dôm tơdrong hơnơ̆ng tơplih. Khôi luơ̆t kơđeh mă lei ưh kơ gơh tŏsĕt tơdrong tơchơ̆t; tơdrong tơchơ̆t tŏ sĕt ƀiơ̆ mă lei tơdrong chiu pŭ kăl hơdăh hloh; sơđơ̆ng hloh mă lei kăl tôm tong trŏ lăp hăm yan ou. Khôi luơ̆t kăl druh kiơ̆ tom tơdrong hơrih, mă lei drŭh kiơ̆ ưh khan lei lăi hăm tơdrong druh kiơ̆ lơ̆m tơdrong hơrih sa kiơ̆ trong hơmet ming khôi luơ̆t hơnơ̆ng”.

Hăm bơngai tăh hla, tơdrong ‘lơ̆ng kơ mĭnh khôi luơ̆t ưh khan tơƀôh hơdăh dôm chăl apăng đei Kuô̆k hô̆i pơdrơ̆ng kiơ̆, mă kăl hloh ‘noh mưh hlôi đei tơlĕch jang kiơ̆, khôi luơ̆t hăm tơpă xek tơlang kĕ dom tơdrong dăh mă ưh, tơdrong pơm tơm păng đei iŏk yoa trŏ lăp kơ kon pơlei hăm đei vei lăng ‘lơ̆ng dăh mă ưh. Kơdră chĕp pơgơ̆r Kuô̆k hô̆i Trần Thanh Mẫn athei kăl dăr lăng mă hơdăh lơ̆m tơdrong jang kiơ̆ khôi luơ̆t; sơđơ̆ng trŏ lăp hăm trong bơ̆ jang khul kơdră chĕp pơgơ̆r tơring ƀar kâp păng tơdrong pơkoel hơnơ̆ng atŏk kơtang klăh asong pơjao jang. Klăh asong ưh khan pơjao gơh jang mă lei kăl đei hloi khul jang, yưh lĭu păng hơnăp jang.“Kuô̆k hô̆i pơjing khôi luơ̆t vă xek tơlang dôm tơdrong kơ yan ou, vei lăng năng tông tơdrong pơm tơm păng đei iŏk yoa trŏ lăp kơ kon pơlei, hơmet pơ ‘lơ̆ng tơhlăk tơhlĭn, pơjing ‘lơ̆ng khul jang, pơih trong ăn atŏk tơ iung. ‘Long pơtŏ tuch luch ưh khan pơdrơ̆ng kiơ̆ đei dôm yơ khôi luơ̆t, mă lei lăp đơ̆ng rŏng khôi luơ̆t đei tơlĕch jang kiơ̆, khul chĕp pơgơ̆r jang hăm ‘lơ̆ng dăh mă ưh, kon pơlei hăm hơnih mơdro sa hăm đei rơvơn hloh ưh, khul jang tơpôl hăm đei hơmet pơ ‘lơ̆ng ưh, tơdrong chĕp pơgơ̆r teh đak hăm đei hơtŏk ‘lơ̆ng ưh. Mĭnh khôi luơ̆t ‘lơ̆ng kăl “kơjăp đơ̆ng trong bơ̆ jang, trei lơ̆m tơchơ̆t, drơ̆ng mĭnh nơ̆r lơ̆m đĭ đăng, jang kiơ̆ kơjăp ‘lơ̆ng”.

Kơdră chĕp pơgơ̆r Kuô̆k hô̆i hơpơi ‘meh vă mĭnh nơ̆r tơgop đơ̆ng bơngai tang măt tơ̆ hop akom ưh khan pơdơ̆h ƀơ̆t dôm nơ̆r, mă lei iŏk đơ̆ng chă lăng hơlen hô sơ, pơtêng se le hăm yan ou păng lăng pơđĭ lơ̆m dôm khôi luơ̆t. Dôm tơdrong vă pơjing khôi luơ̆t tim mă sơđơ̆ng trong bơ̆ jang, hơlen đei ƀơm truh, dôm tơdrong đei ƀơm truh hăm rim khôi luơ̆t anai dăh mă dôm tơdrong vă jang kiơ̆ ‘noh kăl hơnơ̆ng pơm pơkeh. Hăm bơngai tăh hla, ‘nou jĭ ‘long pơtŏ gĭt kăl hloh kơ tơdrong bơ̆ jang pơjing khôi luơ̆t. Mĭnh khôi luơ̆t tơpă đei ‘lơ̆ng mưh tơgŭm đei khul chĕp pơgơ̆r iŏk đei jơnei, kon pơlei păng hơnih mơdro sa rơvơn hloh, khul jang tơpôl đei hơmet pơ ‘lơ̆ng păng tơdrong kĕ chĕp pơgơ̆r teh đak đei hơtŏk kơtang jang ‘lơ̆ng hloh..