Tơ̆ pơsat linh lôch tang ăn teh đak Bảo Lộc, hơnih ƀŭ 740 ‘nu linh lôch tang ăn teh đak, lơ̆m noh 102 tŏ pơsat tam mă băt đei hơnăn, khŭl kơdră tơring jang hơdai kơjăp hăm khŭl linh dêh char Lâm Đồng bơ̆jang iŏk kơmâu. Yă Nguyễn Thị Huyền Phương, Phŏ Kơdră Anih vei lăng kon pơlei phường 3 - Bảo Lộc, tơbăt:

“Pơgơ̆r iŏk kơmâu tơ̆ Pơsat linh lôch tang ăn teh đak Bảo Lộc, Anih vei lăng kon pơlei phường hlôi athei Anih pơgơ̆r khŭl linh phường 3 - Bảo Lộc vei sơđơ̆ng anih jang tơmam, đei tôm tơdrong kăl jang hơdai hăm Anih tơm pơgơ̆r khŭl linh dêh char tơlĕch jang iŏk kơmâu kơting linh lôch tang ăn teh đak, tơgop hơlen lăng băt hơnăn đe linh nuih mơng lôch tang ăn teh đak, ba đe sư vih hăm unh hnam, tơƀôh tơdrong joăt joe “Nhă đak ƀlŏk kơ tu” đơ̆ng hơdrĕch hơdrŭng”.

Tơdrong jang đei tơlĕch jang hrơ̆ch ‘lơ̆ng tơ̆ 11 pơsat linh lơ̆m dêh char Lâm Đồng. Mă hơtuch đei, 4.776 tŏ pơsat linh lôch tang ăn teh đak tam mă băt hơdăh hơnăn đei sir kôch, iŏk kơmẫu. Lơ̆m noh, đei 3.625 tŏ pơsat đei kơting oei gơ̆h set hơlen ADN. Đại tá Phạm Văn Soái, Phŏ Kơdră jang Chinh trĭ, Anih chĕp kơ̆l pơgơ̆r khul linh dêh char Lâm Đồng, tơroi:

“Lâm Đồng jĭ mĭnh lơ̆m dôm dêh char jang đang hrôih hloh tơdrong iŏk kơmâu kơting. Tơdrong ‘nâu gơ̆h jang đei gơnơm đơ̆ng tơdrong pơngơ̆t tôch pơneh đơ̆ng Khul kơdră chĕp pơgơ̆r Đảng dêh char, Jơnŭm pơgơ̆r kon pơlei, Anih vei lăng kon pơlei, Anih MTTQ Việt Nam dêh char; mă loi jĭ tơdrong adrin tôch ai đơ̆ng đe kăn ƀô̆, linh găh khul linh ƀô̆ đô̆i dêh char. Mă đơ̆ng tŏ 'mi kial ưh ‘lơ̆ng, oei đei lơ tơdrong pơmat tat, nhôn oei hơnơ̆ng adrin jang đang hrôih tơdrong jang”.

Tơdăh tơ̆ dôm pơsat, tơdrong mơmat 'noh jĭ athei đei trong jang mă kơjăp, jô̆ hloi jơnăr, 'noh tơdrong sir chă kơting linh lôch tang ăn teh đak tơ̆ 'ngoăih roi pơmat hloh dơ̆ng. Đơ̆ng rŏng dôm jĭt sơnăm, teh tơ̆ lơ tơring hlôi đei tơplih; anih ƀŭ hơdrol ki dang ei ƀât lăp đĭ jing bri 'long, teh choh jang sa, tơring kon pơlei oei dăh mă đĭ jing hnam kơmil bơih. Tơdrong kơtơ̆ng ang mă lơ 'noh gơnơm đơ̆ng hla ar hô sơ so, đon oei ƀlŏk đơ̆ng linh so păng kon pơlei, oei bơngai lăng ƀôh ƀât dŏh sơ̆ ‘nŏh roi đunh roi tŏ sĕt. 'Mi pơdui đunh pơm ăn tơdrong năm chă, sir kôch tơ̆ groi kông, teh mir roh roi pơmat tat hlŏh dơ̆ng; đei anih athei hơlen năng lơ 'măng, pơih să dơ̆ng anih sir chă 'mơ̆i mă gơ̆h băt đei anih so.

Hăm đe kăn ƀô̆, khŭl lĭnhnăm bơ̆jang, 'nâu ưh kơsĭ tơdrong jang hmă kiơ mă ‘nâu jĭ hơnăp jang hăm dôm bơngai hlôi plang hơkâu. Thượng tá Phạm Ngọc Khánh, Phŏ Chính ủy Anih chĕp kơ̆l pơgơ̆r khŭl lĭnh vei lăng tơring sơlam 1 Đức Trọng, dêh char Lâm Đồng, tơroi:

“Hăm rim ƀô̆ đô̆i mư̆h đei pơjao tơdrong jang, bu bu kŭm ƀôh chơt hơiă păng băt hơdăh hơnăp jang mư̆h iŏk đei đon lui, pơjao bơ̆ jang 1 tơdrong jang tôch gĭt kăl”.

Yak hlŏh dôm năr 'mi kial, Lâm Đồng hlôi jang đang hrôih ƀiơ̆ dang 3 khei tơdrong iŏk kơmẫu tơ̆ 11 pơsat. 3.625 kơmẫu kơting linh lôch tang ăn teh đak đei pơjao vă pơyua ăn tơdrong set hơlen ADN, pơih dơ̆ng đon hơmĕng chă đei hơnăn ăn dôm pơsat tam mă băt hơdăh hơnăn, atŭm hăm 'nŏh hơnơ̆ng tơgŭm ăn tơdrong jang năm chă, sir iŏk kơting linh lôch tang ăn teh đak oei ƀŭ hŭt tơ̆ bri brăh.

Tơ̆ hơnăp oei đei lơ tơdrong jang, mă lei hăm đon pơhnŏng păng hơnăp jang tơnăp, tơdrong jang chă dơ̆ng hơnăn ăn linh lôch tang ăn teh đak, chơng ba đe sư vih dơ̆ng hăm unh hnam păng pơlei pơla oei hơnơ̆ng đei bơ̆ jang rim năr.