Pơm kiơ̆ Tơdrong jang 500 măng năr chơ chă, sir akŏm păng sơkơ̆t hơdah hơnăn măt ăn kơting linh lôch tang, khul jang kơ Jơnŭm vei lăng khul linh xah Ba Động, dêh char Quảng Ngãi jang atŭm hăm dôm khul juăt jang kơ xah pơih să hơnih chơ chă tơ̆ bro tu đak glung Nước No, thôn Ba Liên, xah Ba Động păng ƀôh đei  3 kơ̆l kơting linh lôch tang.

Đơ̆ng chơ chă, sir kôch kơting linh lôch tang, khul juăt jang ƀôh đei minh ƀar tơmam drăm yua tơrĕk hăm ƀô đô̆i nhen nut ao, tăng, dĭng dŭng, tơlei yu. Dôm tơmam drăm ou đei akŏm, vei lăng atŭm hăm kơting kiơ̆ trŏ tơchơ̆t tơlĕch, vă 'măn ăn tơdrong sơkơ̆t hơdah hơnăn măt, atŭm hăm noh vei sơđơ̆ng 'lơ̆ng tơdrong kŭp jom hăm đe linh hlôi lôch tang.