Tổng Bí thư tơƀôh đon bơnê tôch ai hăm kŏng tih tên đơ̆ng dôm bơngai hlôi chu hŭt hơkâu, plang pơyơ̆r ăn tơdrong rơngei kơ hơdrĕch hơdrung. Tổng Bí thư pơma hơdăh, Đảng, Teh đak păng kon pơlei ling lang năng bơngai đei kŏng jĭ tơmam kăp gĭt kơ hơdrĕch hơdrung, jĭ um ai tôch sĭt găh jơhngâm đon ‘mêm kơ teh đak păng tơdrong juăt ‘lơ̆ng đơ̆ng Việt Nam.

Tơdrong “Tơgŭm ăn bơngai đei kŏng”, “Nhă đak ƀlŏk kơtu” ưh lăp jing trong jang tih đĕch mă oei jing hơnăp jang chinh trĭ păng jơhngâm đon ‘lơ̆ng hơiă dơ̆ng. Tổng Bí thư athei Anih vei rong hơnơ̆ng jang hơdoi hăm dôm anih jang kơpal vă sek tơlang tơtom, tôm tơdrong tơgŭm hăm bơngai đei kŏng, linh jĭ rơka, linh jĭ jăn kiơ̆ tơdrong hơgăt đơ̆ng luơ̆t, vang tơgop vei lăng ‘lơ̆ng ƀiơ̆ tơdrong arih xa găh tơmam drăm păng jơhngâm đon ăn đe sư.