VOV4.Bahnar – Bơ̆n hơmet yak truh ‘năr tôm kon pơlei năm pôk rơih vă rơih dôm bơngai rơgei hloh tang măt ăn nơ̆r pơma đơ̆ng kon pơlei tăh hla lơ̆m anih jang Kuôk hô̆i, anih jang Hô̆i đŏng kon pơlei dôm jăl. Minh tơdrong mă kon pơlei hơnơ̆ng pơngơ̆t kơ đon, noh đơ̆ng rŏng kơ đei pôk jang, bơngai tang măt gô pơm kiơ̆ nơ̆r pơkăp po hăm kon pơlei tăh hla thoi yơ, tơdrong hơlen jang kiơ̆ nơ̆r pơkăp đơ̆ng bơngai jang tang măt thoi yơ.  

Jơva pơlŭk pơlăk đơ̆ng tơdrong hri karaoke, tơdrong pơre nơ̆r đơ̆ng kơthŭng tĕch kẹo kĕo rơ ông rơ ang đei Kơdră Anih jang Măt trâ̆n tôh kuôk plei tơm Hô Chĭ Minh akŏm iŏk đơ̆ng nơ̆r tơgop đơ̆ng kon pơlei tăh hla păng tơbang ăh ‘măng hop akŏm mă  20 kơ Hô̆i đŏng kon pơlei plei tơm Hô Chĭ Minh jăl 9 hlôi pơjing hê̆ tơdrong apinh jet gia pơma dơnuh hăt hot hloh. Ƀok Nguyễn Thành Phong – Kơdră Anih vei lăng kon pơlei plei tơm Hô Chĭ Minh păng jing bơngai jang tang măt lơ̆m Hô̆i đŏng kon pơlei jăl 9 duh đei iŏk nơ̆r pơtruh kơtă đơ̆ng kon pơlei tơroi găh tơdrong pơngơ̆t kơ đon tơ̆ kơpal. Ƀok Phong ăn tơbăt, ăh đei iŏk tơdrong pơtruh đơ̆ng kon pơlei, ƀok hlôi pơtruh ăn khul kơpal dôm tơring vă hơlen lăng păng xek tơlang. Plei tơm Hô Chĭ Minh duh tenh kuăng đei minh tơdrong jang hơdăh vă tang găn tơdrong hri karaoke, aloa pơre nơ̆r kẹo kĕo... rơ ông rơ ang pơrăm truh kon pơlei. Kiơ̆ kơ ƀok Nguyễn Thành Phong, ƀok hơnơ̆ng adrin xek tơlang rim tơdrong lơ̆m tơpang ti po, ưh đei lê̆ đơ̆ng rŏng kơ noh kon pơlei athei tơbăt pă ‘măng dơ̆ng:  “Hơnơ̆ng ăh akŏm pơma dơnuh hăm kon pơlei noh kiơ̆ đơ̆ng nơ̆r kon pơlei tơgop, đơ̆ng rŏng kơ noh anih jang kơpal hlôi chih akŏm păng pơtruh nơ̆r tơgop đơ̆ng kon pơlei ăn rim anih jang, rim jơnŭm kơpal kơ tơring vă xek tơlang; mă yơ oei lơ̆m tơpang po păng tơdrong tơgŭm đơ̆ng kơpal noh gô đei tơl nơ̆r păng xek tơlang hloi vă ăh ‘măng akŏm pơma dơnuh hăm kon pơlei đơ̆ng rŏng kơ noh pă đei jâu truh tơdrong đei ƀôh adrol kơ noh”.

Noh jing minh lơ̆m dôm nơ̆r pơkăp đơ̆ng bơngai jang tang măt hăm kon pơlei đei jang tơnăp. Mă lei duh oei đei lơ nơ̆r pơkăp pơdui đunh. Dôm jĭt xơnăm kơ âu, unh hnam yă  Phạm Thị The tŏk bŏk oei erih xa lơ̆m tơring pơkăp vă jang  Bình Quới - Thanh Đa. Unh hnam yă ưh gơh hơmet ming hnam, ưh gơh tĕch hnam dăh mă ưh gơh chă axong ăn ‘nhŏng pơmai oh, ưh gơh pơm dôm hla bar đei pơkăp đơ̆ng khôi luơ̆t. Kiơ̆ yă The, tơdrong mă âu đei tơbang lơ̆m lơ ‘măng akŏm pơma dơnuh đơ̆ng bơngai jang tang măt hăm kon pơlei tăh hla mă lei truh dang ei đe xư đei iŏk tơtă nơ̆r pơkăp đĕch. Yă The păng kơ rơbâu unh hnam kon pơlei tơ̆ âu hơpơi ‘moih jơnŭm pơgơ̆r tơring xek tơlang tơtenh tơdrong pơkă vă xơđơ̆ng tơdrong erih.

Hăm kon pơlei tăh hla, tơdrong mă đe yĕt pơngơ̆t kơ đon noh, kơlih kiơ lơ bơngai tang măt tơlĕch nơ̆r pơkăp mă lei truh ăh đĭ jăl jang noh ưh đei pơm kiơ̆ nhen tơdrong tơbang pơkăp ăh lĕch măt tơgar. Găh tơdrong hơlen nơ̆r pơkăp đơ̆ng bơngai jang tang măt, kiơ̆ Luơ̆t sư Trương Thị Hoà – jang lơ̆m Măt trâ̆n tôh kuôk Việt Nam plei tơm Hô Chĭ Minh noh mă lơ kiơ̆ đơ̆ng tơroi lơ̆m dôm ‘măng akŏm pơma dơnuh hăm kon pơlei. Tơroi tơgŭm kon pơlei băt đei nơ̆r pơkăp đơ̆ng bơngai jang tang măt hlôi pơm jang truh dang yơ, tơhlăk ăh anih yơ kơlih ưh kơxĭ nơ̆r pơkăp yơ duh gơh jang keh kong, ưh kơxĭ nơ̆r pơkăp yơ duh jang keh đang hrôih ôh. Mă lei, tơdrong âu lơ̆m ‘măng akŏm pơma dơnuh hăm kon pơlei tam mă đei pơm jang tơnăp: Hơlen noh kơchĕng mưh bơ̆n pơkăp tơbang thoi yơ lơ̆m ‘măng akŏm pơma dơnuh hăm kon pơlei. Noh bơ̆n tơroi akhan pơtêng hăm tơdrong pơm jang noh bơngai jang tang măt hlôi jang đei yă kiơ? Noh inh ƀôh tơdrong kăl lơ̆m dôm ‘măng akŏm pơma dơnuh hăm kon pơlei ưh kơ măh jơ ‘năr dăh mă thoi yơ mă tam đei tơdrong âu. ‘Nguaih akŏm pơma dơnuh hăm kon pơlei duh athei đei trong jang vă bơngai tang măt jang đei yă kiơ, tơroi ăn kon pơlei băt. Bơ̆n tam mă pơm trong hiôk.

Ƀok Trần Việt Anh – jang lơ̆m Trung ương Măt trâ̆n tôh kuôk Việt Nam ăn tơbăt: Măt trâ̆n tôh kuôk Việt Nam dôm jăl jang atŭm hăm dôm anih jang tang măt ăn kon pơlei kơ Kuôk hô̆i păng tơring hơnơ̆ng xơkơ̆t dôm tơdrong jang đơ̆ng rim bơngai tang măt. Mă lei, ƀok Trần Việt Anh tơlĕch hơdăh hăm tơchơ̆t păng hơlen jang kiơ̆ luơ̆t dôm nơ̆r pơkăp. Kĕ đei thoi noh mă gơh tơgŭm răh kon pơlei băt đei nơ̆r pơkăp đơ̆ng bơngai tang măt hlôi jang đei thoi yơ păng hơlơ̆k kơ noh bơngai jang tang măt duh athei ăn kon pơlei băt, nơ̆r pơkăp kơ po oei tơhlăk dôm tơdrong kiơ: Luơ̆t đei chih akŏm kiơ̆ đơ̆ng tơdrong jang đơ̆ng bơngai tang măt ăn Kuôk hô̆i păng jang tang măt lơ̆m Hô̆i đŏng kon pơlei. Noh krao luơ̆t pơm jang kơ bơngai tang măt ăn kon pơlei. ‘Nâu jing tơdrong inh kơchĕng kăl đei, mă lei adrol hloh noh athei đei pơkăp găh pơm jang păng dôm tơdrong tơchơ̆t âu athei pơm kiơ̆ ƀlep nhen minh tơdrong mă kơdih athei pơm jang.

Tơlĕch tơdrong pơm kiơ̆ pơkăp hăm tơdrong hơlen nơ̆r pơkăp đơ̆ng bơngai tang măt, Tiê̆n sih Vũ Trung Kiên – Phŏ Kơdră khoa Hơlen Pơ ‘lơ̆ng Đảng- Hŏk viê̆n Chĭnh trĭ tơring 2 akhan, tơdrong hơlen đơ̆ng kon pơlei noh kăp gĭt hloh. Mưh kon pơlei tơrĕk noh gô apinh jet bơngai tang măt; pơkăl athei tơroi tơdrong apinh jet lơ̆m akŏm pơma dơnuh hăm kon pơlei ‘măng nai: Bơ̆n nĕ hơpơi ‘moih kon pơlei chăm hăm chĭnh trĭ, mă lei bơ̆n ‘moih minh ƀar bơngai nai nhen dôm bơngai pơdơh hưu, đe linh sih kuan, dôm bơngai hŏk kơjung, đe linh xo... adrin vă hơlen kiơ̆ rim bơngai tang măt păng apinh jet rim bơngai jang tang măt.

Jăh vă akhan, bơngai jang tang măt mă kon pơlei pôk rơih jing graxia tih tên hăm rim bơngai yơ, kơlih đe xư jing bơngai mă kơ trĭu măt kon pơlei lui yom, iŏk pơm bơngai tang măt ăn tơdrong hơpơi ‘moih kơ kon pơlei; tang măt ăn kon pơlei pơm jang xơnong kơpal đơ̆ng Teh đak. Tơchơ̆t rơih iŏk tơnăp kơjăp, tơdrong kăl hloh noh athei chĕp vei đon bơnôh rơngei hiôk hian lơ̆m anih jang, lơ̆m tơpôl kon pơlei vă rơih iŏk dôm bơngai tơpă tơgăl; dôm bơngai tơpă pơm jang kơyuơ kơ kon pơlei, kơyuơ teh đak.      

Lan chih păng pơre nơ̆r