VOV4.Bahnar - Tơ̆ dêh char Kon Tum, atŭm hăm tơdrong adrin đơ̆ng jơnŭm pơgơ̆r tơring, anih jang kơpal lơ̆m tơdrong vei hơlen bri, noh tơdrong pơyua găh mŭk drăm đơ̆ng tơdrong pơkăp kla jên vei lăng bri tŏk bŏk oei tơgop ăn bri đei hơmet ‘lơ̆ng păng hơtŏk tơ iung kơjăp.  

Găn hloh dôm hơgăt teh phui phang nhen đe hơna yuơ ƀơm tô̆ pơđang lơ̆m khei phang tô̆ kơtang, nhôn phiơk kơ jơhngơ̆m ƀơ̆t dơ̆ng tơ̆ hơla yơp ‘long hơngo pêng hla tŏk 7 xơnăm. ‘Nhŏng Giáp Văn Thạch, Kơdră Anih mir đak lar  Đăk Ruồng, Anih jang găh bri Kon Braih ăn tơbăt, ‘long hơngo âu xă jê̆ 200ha. Đang kơ noh chro ti găh anih jơk đơ̆ng ataih, ‘nhŏng Thạch tơroi, âu noh hloh 400ha ‘long hơngo 3 hla 5 xơnăm kơ Anih jang. Tôm hơgăt teh hloh 600ha ‘long hơngo 5 păng 7 xơnăm adoi đei Anih jang pơtăm đơ̆ng jên mong vă pơtăm bri tơ ‘măl, kiơ̆ đơ̆ng Anih Mong jên Vei lăng păng Hơtŏk bri dêh char Kon Tum. Tơpă ăn ƀôh ‘long hơngo tŏk giơ̆ng ‘lơ̆ng: “Truh khei dang ei noh ‘long hơngo âu trŏ ƀlep hăm hơgăt teh tơ̆ tơring. Tơdrong giơ̆ng lơ̆m hơgăt bri pơtăm dang ei noh 1.100 tơm lơ̆m 1ha. ‘Long hơngo giơ̆ng ‘lơ̆ng, hơtŏk pran hloh pơtêng hăm dôm hơdrĕch ‘long bri nai”.

Vă pơtăm đei hloh 600ha ‘long hơngo 3 hla tŏk giơ̆ng pran nhen dang ei, Anih jang găh ‘long bri Kon Braih hlôi hăt hot chă hơvơn tơroi păng iŏk đei tơdrong drơ̆ng nơ̆r đơ̆ng kon pơlei xăh Đăk Kôi, apŭng Kon Braih. Tơpă ăn ƀôh, tôm hơgăt teh pơtăm ‘long hơngo adoi jing teh bri ưh giơ̆ng dăh mă teh kon pơlei pơm mir đei iŏk yua tŏ xĕt. Ƀok Lê Viết Bẩy, Kơdră Anih jang găh ‘long bri Kon Braih ăn tơbăt, truh dang ei hơgăt teh ‘long hơngo âu hlôi đĭ khei năr vei hơlen ‘nao pơtăm, Anih jang tŏk bŏk pơtoi tơlĕch dôm trong jang kăl nhen: tang găn păng pĭt unh xa; vei hơlen; choh chong ‘nhĕt uh tăp dăr... Chơt hơ iă noh tôm hơgăt jê̆ 200ha pơtăm ăh xơnăm 2014 rim xơnăm hlôi pơtơm đei yua jên kla vei lăng bri păng pơyua lơ tơdrong kăp gĭt nai: “Tôm hơgăt bri pơtăm tơplih ăh xơnăm 2014 hlôi đei xa jên hơpăh vei lăng bri. Minh păh hơgăt pơtăm kơ xơnăm 2016 vei xơđơ̆ng jên huach vă tơmơ̆t hơpăh jên vei lăng bri. Mă mônh noh găh mŭk drăm hlôi pơtăm ‘long bri tŏk giơ̆ng ‘lơ̆ng tôm hơgăt teh mă adrol âu ki noh phui phang tơnang kŏ ưh kĕ hơtŏk jing bri. Mă ƀar noh minh păh pơyua đơ̆ng jên kla vei lăng bri ăn Anih jang. Mă pêng noh pơyua kăp gĭt găh cham char duh nhen axong tơdrong jang ăn kon pơlei tơ̆ tơring đơ̆ng chă pơtăm bri, tơdrong vei lăng bri rim xơnăm duh nhen tơdrong jang tang găn păng pĭt unh xa bri păng pơkă vei lăng bri ăn kon pơlei”.

Dang ei atŭm hăm vei lăng tơnăp hloh 600.000ha bri oei đei, duh tŏk bŏk đei minh hơyak ‘nao lơ̆m tơdrong jang vei lăng păng hơtŏk bri tơ̆ dêh char Kon Tum. Blŭng xơnăm âu, Anih vei lăng kon pơlei dêh char Kon Tum hlôi pơjao hơgăt teh pơtăm bri hơdăh ăn rim tơring hăm tơchơ̆t pơtăm ‘nao 3.000ha bri lơ̆m pơyan ‘mi. Ƀok Nguyễn Tiến Dũng, Phŏ Kơdră Anih vei lăng kon pơlei apŭng Ia H’Drai ăn tơbăt, jơnŭm pơgơ̆r tơring hlôi kơdih jang kơjăp kiơ̆ pơkăp pơtăm ‘nao 200ha bri kơ dêh char: “Anih vei lăng kon pơlei dêh char pơjao ăn apŭng Ia H’Drai đơ̆ng xơnăm 2021-2025 pơjao ăn kơ nhôn 1.400ha. Lơ̆m noh xơnăm  2021 gô pơtăm 200ha. Kiơ̆ tơdrong kơchĕng pơkăp âu nhen kơ pơkăp tơ ‘nhur, jơnŭm pơgơ̆r tơring athei adrin pơm kiơ̆ păng athei yak hloh tơchơ̆t tơlĕch. Tơdrong jang hơtŏk bri jing minh xơnong jang đei jơnŭm pơgơ̆r tơring, apŭng Ia H’Drai tơrĕk kăp gĭt”.

Tơchơ̆t Hop akŏm Đảng ƀô̆ dêh char Kon Tum ‘măng mă 16 tơlĕch pơkăp truh xơnăm 2025 gô pơtăm ‘nao đei 15.000ha bri. Ƀôh hơdăh minh jăl ‘nao lơ̆m tơdrong jang vei lăng păng hơtŏk bri kơjăp xơđơ̆ng tơ̆ dêh char Kon Tum hlôi đei pơtơm iŏk jang hăm tơchơ̆t tơnăp hloh.

Vă tơ drong kla jên mưh vei lăng bri brăh roi đei yoa, vang vei lăng păng atŏk tơ iung bri ‘long kơ jăp, anih jang kơ pal tơ̆ Kon Tum vă tơ lĕch tơ drong jang yă kiơ tơ̆ hơ năp kơnh? Nhôn đei jơ pơ ma nuh hăm ƀok Hồ Thanh Hoàng, Kơ dră Anih mong jên vei lăng păng atŏk tơ iung bri dêh char Kon Tum găh tơ drong vă jang lơ̆m jăl khei mă II păng dôm trong jang mă Anih mong jên vei lăng păng atŏk tơ iung bri dêh char Kon Tum vă bơ̆ jang lơ̆m sơ năm ‘nâu.

- Ƀok ăi, jăl khei mă 2 sơ năm 2021 Anih mong jên vei lăng păng atŏk tơ iung bri dêh char Kon Tum vă bơ̆ jang dôm tơ drong jang tơm kiơ? 

 - Ƀok Hồ Thanh Hoàng: Hăm Anih mong jên vei lăng păng atŏk tơ iung bri dêh char Kon Tum lơ̆m jăl khei mă II sơ năm 2021, Anih mong jên vă bơ̆ jang dôm tơ drong jang tơm thoi âu:

Mă 1 hơ nơ̆ng mong akŏm jên thu đơ̆ng anih jang iŏk yoa cham char bri brăh. Anih mong jên vei lăng păng atŏk tơ iung bri dêh char Kon Tum hơ nơ̆ng dăr lăng, chih jô̆ tơ drong nôp jên đơ̆ng dôm anih jang đei iŏk yoa cham char bri brăh. Chih jô̆ jên hre đơ̆ng iŏk yoa cham char bri brăh vă gơih hla ar athei dôm anih jang oei hre jên đơ̆ng iŏk yoa cham char bri brăh, jô̆ hloi jên kon đơ̆ng ưh jăh nôp jên iŏk yoa cham char bri brăh jăh nôp ăn Anih mong jên vei lăng păng atŏk tơ iung bri dêh char Kon Tum.

Tơ drong mă 2 hơ nơ̆ng kla jên vei lăng cham char bri brăh sơ năm 2020 ăn dôm tơ ‘ngla bri ‘nŏh jĭ khul grŭp; dôm Dơ nŏ anih vei lăng kon pơ lei xăh, thĭ trơ̆n; dôm unh hnam, rim bơ ngai, tơ pôl kon pơ lei; jang hơ doi hăm Anih mong jên Bưu điện Liên Việt- tơ̆ dêh char Kon Tum kla jên vei lăng cham char bri brăh ăn dôm unh hnam, rim bơ ngai đei tĕh đak pơ jao tĕh, pơ jao bri tơ̆ dêh char Kon Tum.

Tơ drong mă 3 ‘nŏh roi tơ băt, hơ tŏk đon hlôh vao găh trong jang kla jên mưh iŏk yoa cham char bri brăh hơ dai hăm tơ drong vei lăng bri. Tơ drong ‘nâu Anih mong jên vei lăng păng atŏk tơ iung bri dêh char oei hơ nơ̆ng bơ̆ jang roi tơ băt trong jang kla jên mưh iŏk yoa cham char bri brăh hơ dai hăm vei lăng bri nhen thoi âu:

Pơ gơ̆r hop akŏm roi tơ băt trong kla jên mưh iŏk yoa cham char bri brăh hơ dai hăm tơ drong vei lăng, iŏk yoa jên vei bri tơ̆ xăh, tơ chĕng adrol lơ̆m jăl khei mă  II sơ năm 2021 nhôn vă pơ gơ̆r đang 40 ‘măng hop akŏm roi tơ băt tơ̆ xăh.

Nhôn vă pơ gơ̆r dăr hơ len, vei lăng, iŏk yoa jên đơ̆ng vei lăng cham char bri brăh. Lơ̆m jăl khei mă II nhôn vă chih tơ lĕch trong jang, vang jang hơ doi hăm Anih vei lăng choh jang xa păng atŏk tơ iung tơ ring tơ rang dêh char, dôm Dơ nŏ anih vei lăng kon pơ lei apŭng tơ lĕch trong dăr lăng, hơ len năng tơ drong iŏk yoa jên đơ̆ng vei lăng bri tơ̆ dôm tơ ‘ngla bri ‘nŏh jĭ khul grŭp, dôm Dơ nŏ anih vei lăng kon pơ lei xăh, thĭ trơ̆n lơ̆m dêh char.

Nhôn hơ nơ̆ng chă hơ len năng dôm anih jang ‘nao iŏk yoa cham char bri brăh vă chih tơ lĕch trong pơ ma nuh, bơ̆ jang, pơ ma đam kĭ pơ kăp hla ar kla jên đơ̆ng iŏk yoa cham char bri brăh vă mong akŏm tơ tom jên đơ̆ng iŏk yoa cham char bri brăh.

- Bĭ dôm tơ ‘ngla bri, ƀơm truh tơ drong jang kiơ̆ trong kla jên mưh iŏk yoa cham char bri brăh, dôm anih jang lơ̆m jăl khei mă 2 âu vă bơ̆ jang dôm tơ drong jang tơm kiơ hă ƀok?

- Ƀok Hồ Thanh Hoàng: Hăm dôm anih jang tơ ‘ngla bri, inh tơ chĕng rim tơ ‘ngla bri đei tơ drong jang pha ra băl mă lei kiơ̆ inh 1,2 tơ drong jang atŭm kăl bơ̆ jang ‘nŏh thoi âu:

Mă 1 akŏm jơ hngâm pơ gơ̆r dăr joang, vei lăng, sek tơ lang mă ưh ‘nŏh vang sek tơ lang dôm bơ ngai pơm glăi Luơ̆t vei lăng bri ‘long tơ̆ tơ ring bri ‘long kơ dih vei lăng.

Mă 2 iŏk yoa mă ‘lơ̆ng jên đơ̆ng đe kla mưh iŏk yoa cham char bri brăh vă pơ yoa ăn tơ drong vei lăng păng atŏk tơ iung bri.

Mă 3 chih hơ dăh, kla jên vei bri ăn dôm bơ ngai iŏk vei lăng bri ‘long mă tôm, tơ tom păng rơ đăh rơ đong.

Mă 4 pơ gơ̆r pơ tăm bri kiơ̆ trong jang đơ̆ng anih jang, đơ̆ng tơ ring păng tơ dỏng hơ găt pơ tăm bri đơ̆ng anih jang kơ pal pơ jao.

- Ih tơ roi mă rơ đăh găh trong jang mă Anih mong jên vei lăng păng atŏk tơ iung bri dêh char Kon Tum vă bơ̆ jang lơ̆m sơ năm 'nâu vă tơ drong kla jên mưh iŏk yoa cham char bri brăh hơ nơ̆ng đei yoa, tơ gop 'lơ̆ng ăn tơ drong vei lăng păng atŏk tơ iung bri Kon Tum kơ jăp 'lơ̆ng năng?

- Ƀok Hồ Thanh Hoàng: Anih mong jên vei lăng păng atŏk tơ iung bri dêh char hơ nơ̆ng tơ lĕch lơ trong jang lơ̆m sơ năm 2021 vă hơ tŏk tơ drong đei yoa đơ̆ng trong jang kla jên mưh iŏk yoa cham char bri brăh tơ gop ăn tơ drong vei lăng păng atŏk tơ iung bri tơ̆ dêh char Kon Tum nhen thoi âu:

Hơ nơ̆ng tơ lĕch trong roi tơ băt vă hơ tŏk đon hlôh vao truh dôm khul kơ dră pơ gơ̆r tơ ring, tơ pôl kon pơ lei păng pơ lei pơ la tơ̆ dêh char găh đon jang tơ năp bơ̆ jang kiơ̆ dôm tơ drong hơ găt đơ̆ng luơ̆t găh tơ drong vei lăng bri pơ ma atŭm păng tơ drong kla jên mưh iŏk yoa cham char bri brăh pơ ma hơ drô̆ kiơ̆ lơ trong.

Kơ chăng, hơ nơ̆ng jang hơ doi hăm dôm anih jang kơ pal roi tơ ƀôh ăn Dơ nŏ anih vei lăng kon pơ lei dêh char lơ̆m tơ drong pơ gơ̆r bơ̆ jang kiơ̆ tơ drong hơ găt đơ̆ng tĕh đak păng lăp hăm tơ drong đei tơ pă tơ̆ yăn âu kơ dôm tơ ring.

Hơ nơ̆ng hơ len năng, pơ ma đam, kĭ pơ kăp hla ar kla jên vei bri hăm dôm anih jang đei iŏk yoa cham char bri brăh; pơ tho tơ bôh, athei dôm anih jang đei iŏk yoa cham char bri brăh bơ̆ jang ‘lơ̆ng hơ năp jang kơ dih, chih tơ roi mă rơ đăh, nôp jên vei bri mă tôm vă mong akŏm tôch ai jên mong vei lăng bri.

Athei dôm anih đei iŏk yoa cham char bri brăh bơ̆ jang ‘lơ̆ng tơ drong nôp jên đơ̆ng iŏk yoa cham char bri brăh; tơ roi ăn anih jang kơ pal sek tơ lang kiơ̆ tơ drong hơ găt đơ̆ng khôi luơ̆t tơ dăh anih iŏk yoa cham char bri brăh pơ rơ̆ng, kuă pơm kiơ̆ dôm tơ drong hơ găt găh kla jên mưh iŏk yoa cham char bri brăh.

Jang hơ doi hăm dôm anih đei ƀơm truh, khul kơ dră tơ ring hơ tŏk tơ drong dăr lăng, vei lăng bơ̆ jang kiơ̆ trong kla jên mưh iŏk yoa cham char bri brăh găh tơ drong vei lăng bri păng iŏk yoa jên.

Jang hơ doi hăm Anih vei lăng bri dêh char, dôm apŭng, plt păng Dơ nŏ anih vei lăng kon pơ lei dôm xăh, thĭ trơ̆n pơ gơ̆r dăr lăng, chih hơ dăh tĕh bri đei lơ̆m tơ drong kla jên mưh iŏk yoa cham char bri brăh đơ̆ng dôm anih tơ ‘ngla bri ‘nŏh jĭ khul grŭp, unh hnam, rim bơ ngai, tơ pôl pơ lei pơ la păng dôm Dơ nŏ anih vei lăng kon pơ lei xăh, thĭ trơ̆n đei tĕh đak pơ jao hơ năp vei lăng bri vă gơ̆h đei trong chih akŏm, jô̆ hơ len, chih hơ dăh jên đei xa đơ̆ng vei bri sơ năm 2021.

- Lei a, bơ nê kơ ih ƀok Hồ Thanh Hoàng, Kơ dră Anih mong jên vei lăng păng atŏk tơ iung bri dêh char Kon Tum ‘măn jơ pơ ma nuh hăm nhôn!

Lan hăm Dơ̆ng: Tơ blơ̆