VOV4.Bahnar - Anih jang kơ Khul kơ dră tĕh đak ‘nao tơ lĕch hla ar roi tơ băt nơ̆r pơ ma đơ̆ng Phó Thủ tướng Trương Hòa Bình tơ̆ hop akŏm Anih pơ gơ̆r jang kơ Trung ương Tơ drong tơm kơ tĕh đak atŏk tơ iung mŭk drăm tơ pôl tơ̆ tơ ring kon kông păng groi kông đơ̆ng 2021-2030. Kiơ̆ kơ ‘nŏh, dôm anih tơm, anih jang kơ pal păng tơ ring athei jăh jang ‘lơ̆ng rim tơ drong hơ met vă gơ̆h tơ lĕch jang đei yoa tơ drong jang tơm ‘nâu đơ̆ng khei 10/2021.

‘Nâu jĭ 1 lơ̆m 3 tơ drong jang tơm kơ tĕh đak đơ̆ng sơ năm 2021 - 2025, hlôi đei Kuô̆k hôi kĭ tơ lĕch trong tơ mât jên jang. Tơ drong ‘nâu tôch gĭt kăl hăm tơ drong jang atŏk tơ iung mŭk drăm tơ pôl kơ tĕh đak, tơ gŭm tơ drong jang xa păng vei lăng ‘lơ̆ng tơ drong arih xa ăn kon pơ lei tơ̆ tơ ring kon kông oei păng tơ ring groi kông – dôm tơ ring oei mơ mat tat hlŏh lơ̆m tĕh đak.

Dơ̆ng: Tơ blơ̆