VOV4.Bahnar – Năr 12/11/2020, Thủ tướng Teh đak hlôi tơlĕch Tơchơ̆t  33/2020/QĐ-TTg găh pơkăp tơring kon pơlei kon kông păng groi kông kiơ̆ tơdrong hơtŏk tơ iung lơ̆m jăl xơnăm 2021 - 2025. ‘Nâu jing tơdrong kăp gĭt vă dôm tơring tơlĕch pơkăp dôm trong jang trŏ ƀlep păng jang đei jơnei hăm rim tơring kon pơlei kon kông, jang trŏ tơdrong kăl đei ƀôh lơ̆m tơring.

Kiơ̆ Tơchơ̆t, dôm thôn đei pơkăp tơnap tap hloh lơ̆m tơring kon pơlei kon kông păng groi kông noh jing thôn athei đei kơsô̆ unh hnam kon pơlei kon kông lơ̆m kơsô̆ kon pơlei erih xơđơ̆ng jing tơpôl đơ̆ng 15% tŏk tơ̆ kơpal păng đei nhen  1 lơ̆m 2 tơdrong pơkăp: Đei kơsô̆ unh hnam hin dơnuh đơ̆ng 20% tŏk tơ̆ kơpal (hăm tơring Tơmăn đak krong Cửu Long đei kơsô̆ unh hnam hin dơnuh đơ̆ng 15% tŏk tơ̆ kơpal dăh mă đei hloh 30 unh hnam hin dơnuh noh unh hnam bơngai kon kông hin dơnuh); Đei kơsô̆ unh hnam hin dơnuh đơ̆ng 15% truh hơla 20% (găh tơring Tơmăn đak krong Cửu Long đei kơsô̆ unh hnam hin dơnuh đơ̆ng 12% truh hơla 15%).

Hăm pơkăp mă 2, kăl đei 1 lơ̆m 3 pơkăp (đei hloh 60% kơsô̆ unh hnam hin dơnuh noh unh hnam bơngai kon kông lơ̆m kơsô̆ unh hnam hin dơnuh kơ thôn; tam mă đei trong nơnăm đơ̆ng thôn truh anih jang xăh dăh mă đei trong mă lei vih vơ̆t tơnap tap, mă hăt noh ăh pơyan ‘mi; tam mă đei unh hơyuh teh đak dăh mă hlôi đei mă lei hloh  30% kơsô̆ unh hnam tam mă đei yua unh hơyuh teh đak).

Tơdrong pơkăp thôn tơnap tap hloh kiơ̆ tơdrong hơtŏk tơ iung jing tơdrong tơm xơkơ̆t bơngai, tơring vă tơlĕch pơm kiơ̆ dôm tơdrong pơkăp jang ăn bơngai kon kông đơ̆ng  Đảng păng Teh đak kiơ̆ rim jăl, vei xơđơ̆ng trŏ ƀlep hăm tơdrong kĕ đei kơ tơring. Kiơ̆ đơ̆ng noh, rim anih jang tơm păng rim tơring tơlĕch pơm jang đei jơnei pơkăp tơjur hin dơnuh kơjăp xơđơ̆ng lơ̆m tơring “hin dơnuh tơm” đei tơdrong jang mŭk drăm – tơpôl tơnap tap.

Pơtih nhen đơ̆ng dêh char Thái Nguyên. Kiơ̆ hơnăn kĭ pơkăp thôn tơnap tap hloh tơring kon pơlei kon kông păng groi kông jăl xơnăm 2021-2025, Thái Nguyên đei 50 thôn tơnap tap hloh lơ̆m 22 tơring kơ 5 apŭng noh: Võ Nhai, Định Hóa, Đồng Hỷ, Phú Lương, Phú Bình. Lơ̆m kơsô̆ dôm xăh, thôn, kueng ƀôt klaih đơ̆ng tơnap tap hloh kơ dêh char Thái Nguyên, đei lơ tơring hlôi keh đang tơdrong pơjing tơring pơxĕl ‘nao. Tơdrong âu kĕ đei gơnơm đei tơdrong tơguăt hơbĕch hơbal jơhngơ̆m jang, jên axong jang ăn dôm tơring âu, lơ̆m noh athei jô̆ truh dôm tơdrong jang pơjing tơring pơxĕl ‘nao, tơdrong jang 135, tơdrong jang 2037, đơ̆ng noh hlôi tơplih tôm mŭk drăm – tơpôl tơring kon pơlei kon kông, tơplih đon kơchĕng kơ jơnŭm pơgơ̆r tơring, duh nhen kơ kon pơlei. Ƀok Nguyễn Thái Nam, Kơdră Anih jang găh bơngai kon kông dêh char Thái Nguyên ăn tơbăt: “Hăm pơkăp tơnăp đơ̆ng dôm jăl pơgơ̆r tơring, truh xơnăm 2025, bơ̆n gô tơjur tong anê̆ kơsô̆ tơring tơnap tap hloh, adrin truh xơnăm 2030, Thái Nguyên gô pă đei oei tơring tơnap tap hloh bơih”.

Tơchơ̆t pă đei oei tơring tơnap tap hloh jing minh xơnong jang tơm lơ̆m pơkăp jang kon kông, duh nhen lơ̆m tơdrong jang hơdăh Tơchơ̆t hop akŏm Anih jang Đảng dêh char Thái Nguyên kơ jăl jang ‘nao. Kơsô̆ thôn, xăh xut hơnăn đơ̆ng pơkăp tơring tơnap tap hloh lơ̆m dêh char Thái Nguyên tơjur noh ưh adrô̆ minh tơdrong đei ƀôh lơ̆m jang mŭk drăm – tơpôl mă oei jing trong vă pơjing păng tơlĕch jang kiơ̆ dôm tơdrong pơkăp jang găh bơngai kon kông lơ̆m jăl jang đơ̆ng rŏng. Ƀok Đỗ Danh Huân, Phŏ Kơdră Anih vei lăng kon pơlei apŭng Đồng Hỷ, Thái Nguyên ăn tơbăt găh trong jang kơ tơring: “Nhôn akŏm lơ̆m tơplih đon kơchĕng kơ kon pơlei, găh tơdrong xut lê̆ pơngot tơjur hin dơnuh kơ kon pơlei, hơtŏk tơdrong erih ăn kon pơlei, jang atŭm tơnăp dôm kơsô̆ jên jang păng pơlan xă lơ̆m tơpôl vă pơkăp jang xut lê̆ pơngot tơjur hin dơnuh”.

Kiơ̆ tơroi đơ̆ng dôm tơring găh tơdrong pơkăp tơring kon pơlei kon kông păng groi kông đei pơkăp lơ̆m Tơchơ̆t kơsô̆ 33/2020/QĐ-TTg đơ̆ng Thủ tướng Teh đak, Anih jang găh bơngai kon kông hlôi akŏm hơnăn thôn tơnap tap hloh vă tơlĕch Tơchơ̆t pơm trong pơkăp jang, iŏk jang đei jơnei dôm trong pơkăp đei tơrĕk lơ̆m jăl xơnăm  2021-2025.

‘Nao âu, ăh năr 16/9/2021, Ƀô̆ trưởng, Kơdră Anih jang găh bơngai Kon kông hlôi kĭ Tơchơ̆t kơsô̆ 612/QĐ-UBDT kĭ tơchơ̆t hơnăn 13.222 thôn tơnap tap hloh, đei: 11.179 thôn kơ xăh tơring III; 736 thôn kơ xăh tơring II; 1.184 thôn kơ xăh tơring I păng 123 thôn kơ dôm xăh đei thôn lơ̆m tơring kon pơlei kon kông păng groi kông păng groi kông lơ̆m tơring kơ 41 dêh char, plei tơm lơ̆m Trung ương. Lơ̆m tơdrong pơgơ̆r jang, mưh đei tơklăh pha, tơmơ̆t jing minh, tơklăh dăh mă tơplih hơnăn, Anih vei lăng kon pơlei dêh char pơgơ̆r dôm anih juăt jang chă hơlen xơkơ̆t kiơ̆ pơkăp păng chih hô sơ kiơ̆ pơkăp lơ̆m Tơchơ̆t kơsô̆ 33/2020/QĐ-TTg năr 12/11/2020 đơ̆ng Thủ tướng Teh đak pơtruh ăn Anih vei jang găh bơngai Kon kông akŏm, xơkơ̆t păng tơchơ̆t hơmet akŏm. Tơchơ̆t âu đei iŏk yua jô̆ đơ̆ng ‘năr kĭ tơbang păng pơtăl kơ Tơchơ̆t kơsô̆ 433 năr 18/6/2021 đơ̆ng Ƀô̆ trưởng, Kơdră Anih jang găh bơngai Kon kông păng Tơchơ̆t hơnăn thôn tơnap tap hloh kơ tơring kon pơlei kon kông păng groi kông jăl xơnăm 2021-2025.

Lan chih păng pơre nơ̆r