VOV4.Bahnar – Tơdrong axong bơ̆ theh Kăng kươk kon pơlei hlôi păng tŏk bŏk đei Anih tơm Kŏng ang, kŏng ang dôm dêh char plei tơm lơ̆m jâ̆p teh đak hăt hot tơlĕch jang, vei xơđơ̆ng truh adrol kơ năr 1/7/2021, keh đang tơdrong axong bơ̆ theh kăng kươk kon pơlei ăn tôm kon pơlei mă ƀlep pơkăp. Tơdrong mă âu pơkăl đei tơdrong tơgŭm đơ̆ng dôm jăl jang, dôm anih jang păng mă kăl noh tơdrong hlôh vao đơ̆ng rim kon pơlei. Vă tơdrong jang bơ̆ theh Kăng kươk kon pơlei gơh trŏ tơlĕch tơchơ̆t noh kon pơlei athei jang xơnong kăl kơ po, pơm kiơ̆ ƀlep dôm tơdrong tơchơ̆t đơ̆ng Luơ̆t Kăng kươk kon pơlei.

Lơ̆m khei năr âu, lơ̆m jâ̆p teh đak, đe kang ƀô̆, khul Kanh sat Vei lăng hanh chĭnh vei xơđơ̆ng tơpôl jang hơtŏk jơ hơnơ̆ng, ưh kơ mơ̆ng măng năr năm truh tơring ataih yaih, năm truh rim unh hnam vă bơ̆ kăng kươk kon pơlei chô̆ chĭp, vă đei jơnei keh kong “tơdrong pơkăp jang” truh khei 7/2021 gô axong bơ̆ 50 trĭu tŏ Kăng kươk kon pơlei ăn kon pơlei. Rim kang ƀô̆, khul linh hlôi găn hloh tơnap tap vă pơm thoi yơ rim bơngai adoi đei bơ̆ hla bar hanh chĭnh ‘nao, tơjur tơdrong tơhlăk găh tơdrong bơ̆ hla bar, ưh kơ huach jơhngơ̆m vih vơ̆t...  

Anih tơm Kŏng ang hlôi đei pơkăp hơtŏk kang ƀô̆, khul linh atŭm hăm kơmăi kơmŏk, tơmam drăm ‘măn ăn tơdrong bơ̆ Kăng kươk kon pơlei ăn dôm tơring. Atŭm hăm noh Anih tơm hlôi pơgơ̆r Kŏng ang dôm tơring akŏm tơnăp axong bơngai jang, hơtŏk kang ƀô̆ năm pơm jang bơ̆ theh Kăng kươk kon pơlei jang tŏ xĕt jat noh 15 jơ minh năr (đơ̆ng 7 jơ pơgê truh 10 jơ kơmăng); atŭm hăm noh axong pơkăp bơ̆ theh Kăng kươk kon pơlei ăn Kŏng ang dôm tơring kiơ̆ rim năr; hơnơ̆ng pôk bơnê dôm tơring đei trong jang rơgei, keh đang păng yak hloh tơchơ̆t axong bơ̆ theh Kăng kươk kon pơlei. Mă oei tơnap tap, tơdrong jang lơ athei jang lơ̆m tŏ xĕt khei năr, đe kang ƀô̆ linh Kanh sat Vei lăng hanh chĭnh găh xơđơ̆ng tơpôl păng Kŏng ang dôm tơring duh oei adrin kơ ‘nôh măng năr, năm truh rim xăh, phương, truh rim pơlei pơla groi kông, đei dôm tơring tơjê̆ xơlam teh, achon đak dơxĭ păng tơring groi kông vă pơkăp bơ̆ theh Kăng kươk kon pơlei.

Jô̆ truh năr 6/5, jâ̆p teh đak hlôi iŏk đei jê̆ 40 trĭu hô sơ bơ̆ theh Kăng kươk kon pơlei; hlôi đei bơ̆ păng pơdreo ăn tơring 7,4 trĭu theh Kăng kươk kon pơlei. Hăm tơdrong pơ ‘lơ̆ng kơtơ̆ng kơdih po vei xơđơ̆ng “trŏ, tôm, ‘lơ̆ng, yua”, truh dang ei, Anih Kanh sat Vei lăng hanh chĭnh găh xơđơ̆ng tơpôl hlôi drơ̆ng minh chih akŏm lơ̆m anih pơkăp atŭm jê̆ 99 trĭu măt bơngai lơ̆m jâ̆p teh đak Chih akŏm lơ̆m anih vei atŭm kơ teh đak găh tơring oei xa; hlôi pơ ‘lơ̆ng tôm tơdrong chih răk đei pơhlom 42 trĭu tơdrong. Đei lơ tơring jang tơnăp nhen: Nam Định, Hải Dương, Thái Bình, Ninh Bình, Thừa Thiên – Huế, păng Hà Nam… Minh ƀar tơring hlôi tơlĕch tơton păng tơnăp pơtho đơ̆ng Anih tơm găh xơng iŏk hô sơ axong bơ̆ Kăng kươk kon pơlei hăm măt bơngai oei xa noh: Quảng Ninh, Bình Dương, păng plei tơm Hồ Chí Minh.

Thượng tá Trần Thanh Phong, Phŏ kơdră kanh sat vei lăng hanh chĭnh găh xơđơ̆ng tơpôl kŏng ang dêh char Đồng Tháp tơroi thoi âu, vă tơdrong axong bơ̆ theh Kăng kươk kon pơlei kiơ̆ ƀlep pơkăp noh kon pơlei truh bơ̆ hla bar vă bơ̆ theh Kăng kươk kon pơlei athei pơm kiơ̆ tơchơ̆t đơ̆ng Luơ̆t Kăng kươk kon pơlei păng khôi luơ̆t đei tơrĕk: Lơ̆m tơdrong axong bơ̆ Kăng kươk kon pơlei dang ei noh bơ̆n athei pơm kiơ̆ ƀlep tơchơ̆t axong bơ̆ Kăng kươk kon pơlei đei Anih tơm Kŏng ang tơlĕch, tơbang lang xă lơ̆m aloa rapor pơdăh tivi tơpôl păng truh tơring kon pơlei oei xa vă kon pơlei băt hơdăh. Lơ̆m khei năr dang ei, mưh kon pơlei năm bơ̆ Kăng kươk kon pơlei noh athei băt dôm tơdrong nhen tơ̆ hơla: Mă mônh noh athei tơmơ̆ng kiơ̆ nơ̆r tơroi păng pơtơ̆ng đơ̆ng jơnŭm pơgơ̆r tơring ăh jơnŭm pơgơ̆r tơring tơroi tơbăt, pơtruh hla bar hơvơn vă kon pơlei năm truh trŏ anih, trŏ jơ pơkă, khei năr vă bơ̆ Kăng kươk kon pơlei, vei xơđơ̆ng ưh đei hiong jơ păng ƀônh ƀŏ lơ̆m tơdrong mă po chă bơ̆ hla bar. Mă ƀar noh mưh bơngai mă ưh đei ƀôh ‘năr rơneh, khei rơneh lơ̆m hô̆ khẩu duh nhen lơ̆m hla bar chư̆ng minh kon pơlei noh bơ̆n athei năm truh jơnŭm pơgơ̆r tơring, hơdăh noh năm tơjrâ̆m bơngai jang găh tư phap tơ̆ xăh, phương, thĭ trâ̆n anih mă kon pơlei oei xa, vă đei kang ƀô̆ pơtho ăn trong bơ̆ hơmet chih tơbang tơdrong kăl găh ‘năr rơneh, khei rơneh vă ‘măn ăn tơdrong bơ̆ theh Kăng kươk kon pơlei gơh tenh kuăng hloh.

Thoi noh, ăh kon pơlei năm bơ̆ theh Kăng kươk kon pơlei kăl băt dôm tơdrong tơ̆ hơla âu:

- Pơm kiơ̆ pơkăp đơ̆ng Luơ̆t âu păng khôi luơ̆t đei tơrĕk;

- Bơ̆ hla bar axong tơplih, bơ̆ theh Kăng kươk kon pơlei kiơ̆ pơkăp đơ̆ng Luơ̆t âu;

- Tơroi tôm tơdrong, trŏ ƀlep, trŏ khei năr pơkăp, hla bar chih găh tơdrong erih kơdih po vă chih tơmơ̆t lơ̆m Tơdrong chih kăl vei răk kơ teh đak găh tơring oei xa păng Tơdrong chih vei kăng kươk kon pơlei kiơ̆ pơkăp đơ̆ng Luơ̆t âu păng khôi luơ̆t đei tơrĕk;

- Tơbang theh Kăng kươk kon pơlei ƀơ̆t đei anih jang kơpal pơkăl hơlen kiơ̆ pơkăp đơ̆ng khôi luơ̆t;

- Vei lăng theh Kăng kươk kon pơlei hlôi đei axong; ăh hiong noh dăh tơroi tơtom hăm anih jang vei lăng kăng kươk kon pơlei;

- Nôp theh Kăng kươk kon pơlei ăn anih jang kơpal mưh chă tơplih, bơ̆ ‘nao, ƀơm đe vei theh kiơ̆ pơkăp Tơdrong 23 păng Tơdrong 28 lơ̆m Luơ̆t âu.”

Lan chih păng pơre nơ̆r