VOV4.Êđê- Aguah hruê 2/6, ti Hà Nội, Êpul hgŭm brei klei pah mni bruă klei mrâo ala čar tal XV thŭn 2020 mphŭn pŏk gưl ksiêm dlăng lehanăn brei puăng dŭm mta klei mrâo ba bi lông. Nao hlăm klei bi lông thŭn anei mâo 114 êpul êya lehanăn 190 čô đmă bruă klei mrâo, nao bi lông ti 11 klei pah mni djŏ si klei kčah mtrŭn. Hŏng 1.823 mta klei mrâo nao bi lông. Anei jing thŭn mâo ênoh mta klei bi lông lu êdi mơ̆ng êlâo adih truh kơ ară anei. Hlăm 2 hruê, hruê 2-3/6, Êpul hgŭm brei klei pah mni bruă klei mrâo ala čar srăng ruah 151 mta klei mrâo êdah kdlưn hĭn čiăng pah brei klei pah mni. Hluê si Thuận Hữu, Khua êpul hgŭm bruă klei mrâo Việt Nam, thŭn anei klei čih dưi hưn lač kơ djăp mta ra klei mơ̆ng bruă duh mkra, kđi čar truh kơ dhar kreh, ala ƀuôn. Boh nik, hưn lač kơ Klei bi kƀĭn bruă Đảng dŭm gưl, Klei bi kƀĭn tal 13 mơ̆ng Đảng, kơ hdră gang mkhư̆ klei ruă Covid 19, hdră kdŏng mblah hŏng klei ƀơ̆ng ngăn, bi liê tia mang, dŭm boh klei amâo jăk dưi hưn lač pral, djŏ guôp. Lu mta klei bi lông dưi thâo ƀuh, hlak mblang kla nik, tŭ dưn yang ƀuôn, mâo klei hmăi, mâo anôk bruă djŏ tuôm mđing hmư̆, ksiêm dlăng lehanăn msir mghaih./.

                                                    Pô mblang: H’Nêč Êñuôl