VOV4.Êđê - Nay Phi la, khua knơ̆ng bruă mdrao mgŭn čar Dak Lak brei thâo, truh kơ tlam hruê 4/6, 2 čô mâo klei ruă tưp Covid-19 jing mnuih ruă mrô 3237 lehanăn 3334 hlăm čar mâo leh 3 blư̆ ksiêm mkă kman ƀiădah amâo mâo ƀuh ôh kman SARS-CoV-2. Tui hluê anăn 2 čô mnuih ruă mrô 3237 lehanăn 3334 jing dua čô mnuih ruă dưi hmao ƀuh ti hruê 8 lehanăn 9/5.

Jih dua čô anei dôk hlăm sa boh sang ti êlan điêt 189/1 êlan Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt. Anei jing 2 čô mnuih ruă djŏ tuôm hŏng mnuih bruă ti ƀuôn prŏng Đà Nẵng. jih dua čô anei ară anei dôk mdrao ti sang êa drao hnak lehanăn klei ruă ksŏ čar Dak Lak. Leh 27 hruê mdrao mgŭn, klei suaih pral diñu hriê kơ suaih leh lehanăn mâo leh 3 blư̆ ksiêm mkă kman amâo lŏ ƀuh ôh kman SARS-CoV-2. Năng ai 2 čô anei srăng dưi wĭt kơ sang hlăm hruê kăm kơ anăp.