VOV4.Êđê - Truh kơ hruê mbruê 22/11, čar Lâm Đồng mđĭ leh hnơ̆ng mâo tlŏ mgang aruăt tal 2 vaccine kơ mnuih mơ̆ng 18 thŭn kơ dlông êbeh 80%. Ară anei čar Lâm Đồng ngă leh klei tlŏ mgang 1 êklăk 713 êbâo 851 aruăt vaccine gang mkhư̆ klei ruă tưp Covid-19 kơ mnuih ƀuôn sang. Hlăm anăn mâo êbeh 946.000 hnơ̆ng jing aruăt tal 1 leh anăn mâo ênŭm 2 aruăt jing 80,35% kơ mnuih mơ̆ng 18 thŭn kơ dlông. Ară anei čar Lâm Đồng dôk gĭr ktưn mtrŭt mđĭ bruă tlŏ mgang truh kơ 100% ênoh mnuih ƀuôn sang mơ̆ng 18 thŭn kơ dlông mâo tlŏ aruăt tal 1 ti knhal jih mlan 11 anei. Êngao kơ anăn, čar Lâm Đồng mâo leh hdră êlan tlŏ mgang vaccine kơ phung hđeh mơ̆ng 16 truh kơ 18 thŭn hlăm hruê kăm anei. Ti anăp srăng ngă bruă tlŏ mgang 21.300 hnơ̆ng vaccine kơ hđeh sang hră ti 38 bĭt sang hră gưl 3 leh anăn sang hră mtô mjuăt klei mă bruă hlăm 5 kdriêk, ƀuôn prŏng ti čar Lâm Đồng.

Y-Ƀel pô mblang