Bi lar bruă klam lehanăn bruă ngă mơ̆ng knơ̆ng bruă ngăn prăk mnia mblei hlăm hdră êlan prăk kăk, duh bi liê mđĭ kyar bruă lŏ hma, krĭng ƀuôn sang. Mơ̆ng thŭn 2020 truh kơ ara anei, Agribank dưi mprăp leh êbeh 1.000 êklai prăl čiăng bi hrŏ prăk mnga đru kơ dŭm čô lĭng čan dưi găn klei ruă tưp Covid-19. Mbĭt hŏng anăn lŏ mâo lu hdră êlan brei čan mâo prăk mnga mơ̆ng 2%-2,5% mkă hŏng prăk mnga brei čan yăng đar lehanăn hŏng ênoh 300.000 êklai prăk kơ dŭm knơ̆ng bruă man dưn lehanăn điêt, pô čan ênoh prŏng lehanăn knơ̆ng bruă FDI.

Ti anăp klei dleh dưi ktuê dlăng mơ̆ng klei ruă tưp Covid-19, ngă klei hmăi kơ djăp bruă hlăm klei hdĭp, bruă duh mkra, yang ƀuôn. Čiăng hmao đru kơ dŭm čô lĭng čan dưi hnưm lŏ wĭt ngă bruă, găn klei dleh dlan, Agribank lŏ čŏng bi hrŏ prăk mnga kơ jih jang mnuih lĭng čan lehanăn êpul êya čan hŏng prăk VND ti Agribank.

Klă klơ̆ng, hŏng dŭm klei lĭng čan hlăm hruê 15/7/2021, Agribank lŏ bi hrŏ 10% prăk mnga mkă hŏng prăk nga dôk dưn yua hlăm dŭm klei čan mâo hruê kčah ƀiă mơ̆ng 5%/thŭn lehanăn dŭm klei can mâo hruê kčah man dưn, sui hruê mơ̆ng 7%/ thŭn. Tĭng mkă hŏng bruă lŏ bi hrŏ prăk mnga gưl anei, Agribank dưi mprăp leh hlăm brô 5.500 êklai prăk čiăng đru kơ dŭm čô lĭng čan.

Êngao kơ anăn, Agribank ăt hur har đru ruh mgaih dŭm klei dleh dlan kơ dŭm čô lĭng čan hlăm bruă ngă jăk, mâo boh tŭ dưn hlăm dŭm hdră đru msĕ si: lŏ dlăng wĭt prăk nư phŭn lehanăn prăk mnga, mơĭt prăk amâo mă prăk hlăm ala čar lehanăn đru mguôp êbeh 130 êklai prăk kơ bruă gang mkhư̆ klei ruă tưp Covid-19… Sơnăn, hŏng bruă lŏ hdơ̆ng bi hrŏ prăk mnga brei čan, jing gưl tal 5 ngă bruă klam ba anăp, kjăp ktang mơ̆ng Agribank hlăm bruă hrăm mbĭt hŏng Đảng, lăn čar, knŭk kna ngă bruă klam mdua: gang mkhư̆ klei ruă tưp lehanăn mđĭ kyar bruă duh mkra. Hdră êlan bi hrŏ prăk nga anei srăng dưi ngă truh kơ jih hruê 31/12/2021 lehanăn dưi dưn yua hlăm 2.300 anôk ngă bruă mơ̆ng Agribank hlăm ala čar.