VOV4.Êđê- Tĭng truh kơ 6 mmông aguah 10/5, ala čar Việt Nam lŏ čih yap mâo 80 čô mnuih mâo klei rua klei ruă tưp Covid-19, hlăm anăn mâo 78 čô mnuih mâo klei ruă hlăm yang ƀuôn lehanăn 2 čô mâo klei bi ktlah êjai mŭt hlăm ala čar. Phŭn bruă mdrao mgŭn hâo hưn, mâo 80 čô mnuih mrâo djŏ klei ruă tưp Covid-19, hlăm anăn mâo 2 čô dưi mâo klei bi ktlah êjai dôk mŭt hlăm ala čar ti Đồng Nai lehanăn 78 čô mnuih ruă mkăn dưi čih yap hlăm dŭm anôk msĕ si: Bắc Ninh 27 čô mnuih, Vĩnh Phúc 19 čô mnuih, Đà Nẵng 13 čô mnuih, Bắc Giang 5 čô mnuih, Hà Nội 9 čô mnuih, Hòa Bình 2 čô mnuih, Đắk Lắk 1 čô mnuih, Điện Biên 1 čô mnuih, Lạng Sơn 1 čô mnuih. Tĭng truh kơ 6 mmông aguah hruê 10/05. Ala čar Việt Nam mâo hlăm ƀrô 1.981 čô mnuih mâo klei ruă tưp Covid-19 tưp lar hlăm yang ƀuôn, hlăm anăn mnuih mâo klei ruă mrâo tĭng mơ̆ng hruê 27/04 truh kơ ară anei jing 411 čô mnuih. Bi kơ klei mdrao mgŭn, tui hluê klei hưn mdah mơ̆ng anôk kriê dlăng bruă mdrao klei ruă- phŭn bruă mdrao mgŭn, ênoh mnuih amâo lŏ ƀuh kman gưl tal 1 mâo 25 čô mnuih, ênoh mnuih amâo lŏ ƀuh kman gưl tal 2 mâo 22 čô mnuih, ênoh mnuih amâo lŏ ƀuh kman gưl tal 3 mâo 35 čô mnuih, ênoh mnuih dưi mdrao hlăm mâo 2.602 čô mnuih.

Pô mblang: Y-Khem Niê