VOV4.Êđê - Tĭng truh kơ 6 mmông aguah hruê 17/5, tar ala čar lŏ mâo 37 čô mnuih mâo klei ruă tưp Covid-19 hlăm ala čar, hlăm anăn Bắc Giang mâo 22 čô mnuih, Bắc Ninh 11 čô, Vĩnh Phúc 3 čô lehanăn Tuyên Quang 1 čô. Phŭn bruă mdrao mgŭn brei thâo, hlăm 37 čô mnuih mrâo mâo klei ruă tưp Covid-19 anăn, dŭm čô dôk leh ti anôk bi ktlah jing 15 čô, ênoh mnuih dôk hlăm anôk leh čuăl krĭng 22 čô mnuih. Tar ala čar ka lŏ ƀuh ôh anôk mâo klei ruă mrâo. Ênoh mnuih mâo klei ruă mrâo tĭng mơ̆ng hruê 27/4 truh kơ ară anei mâo 1.176 čô mnuih. Tĭng truh 4 mmông tlăm hruê 16/5. Mâo kluôm ênŭm 979.238 hnơ̆ng vaccine klei ruă tưp Covid-19 dưl tlŏ mgang aruăt tal 1 lehanăn tal 2 hlăm dŭm ƀuôn čar, ƀuôn prŏng kơ dŭm čô knuă druh, mnuih mă bruă mdrao mgŭn dôk mdrao kơ dŭm čô mnuih mâo klei ruă tưp Covid-19, dŭm čô mă bruă mdrao mgŭm dôk ngă bruă mă, ksiêm mkă kman, tui duah kman, dŭm čô mnuih hlăm êpul êya Covid-19 hlăm yang ƀuôn, êpul gĭt gai bruă gang mkhư̆ klei ruă tưp, dŭm êpul êya kahan ksiêm, lĭng kahan. Hlăm anăn, 22.561 dưi tlŏ leh ênŭm leh 2 aruăt vaccine.