VOV4.Êđê- Lŏ čuê hdră êlan klei kƀĭn tal 58, aguah anei, dhar bruă gĭt gai bruă kƀĭn ala mâo leh boh blŭ kơ klei kƀĭn tal 1, bruă kƀĭn ala gưl 15. Tui si mta phŭn hlăm hdră êlan klei kƀĭn tal 57 mơ̆ng dhar bruă gĭt gai bruă kƀĭn ala, mĭn tĭng hruê mmông ngă klei kƀĭn tal 1, bruă kƀĭn ala gưl 15 jing 11 hruê mkrah. Hlăm anăn, srăng mâo lu hruê mmông kñăm kơ klei dăp mnuih mă bruă. Hlăm klei kƀĭn tal 1, bruă kƀĭn ala gưl 15, bruă kƀĭn ala srăng ngă klei ruah khua lăn čar, khua knŭk kna, khua bruă kƀĭn ala mrâo. Dŭm klei pŏk kčưm lehanăn bi ruê̆, bi trông kơ bruă duh mkra - ala ƀuôn, ngăn prăk ala čar 6 mlan akŏ thŭn, hdră êlan mđĭ kyar bruă duh mkra - ala ƀuôn wưng 5 thŭn, bruă ngă klei mkiêt mkriêm, gang mkhư̆ klei bi luič ti mang thŭn 2020 srăng dưi mđung asăp blŭ, mđung rup mmông anăn mtam čiăng kơ jih jang mnuih dưi ktuê dlăng. Hŏng klei jing kơ mta phŭn klei kƀĭn, bruă kƀĭn ala čiăng bi kƀĭn ti sang bruă kƀĭn ala. Adŭ bruă kƀĭn ala bi mguôp leh hŏng dŭm anôk bruă ngă klei mprăp jăk čiăng đru kơ klei kƀĭn anei mâo klei jăk hĭn. 

Pô mblang: Y-Ƀel Êban