VOV4.Êđê- Phŭn bruă mdrao mgŭn brei thâo, yap truh kơ 6h aguah hruê mbruê, Việt Nam dưi mdrao hlao leh kơ 89.145 čô mnuih mâo klei ruă tưp Covid-19. Tui si klei mrâo mơ̆ng phŭn bruă mdrao mgŭn, truh kơ ară anei, Việt Nam mâo 246.568 čô mnuih mâo klei ruă tưp, hlăm anăn mâo 2.395 čô mnuih ruă mơ̆ng ala tač êngao lehanăn 244.173 čô mnuih ruă hlăm ala čar. Ênoh mnuih ruă hlăm ala čar mơ̆ng hruê 27/4 truh kơ ară anei jing 242.603 čô, hlăm anăn mâo 86.371 dưi bi mklă hlao leh klei ruă. Mâo 4/62 čar, ƀuôn prŏng êgao leh 14 hruê amâo lŏ mâo ôh mnuih ruă jing čar Quảng Ninh, Bắc Kạn, Tuyên Quang lehanăn Lai Châu. Mâo 8 čar, ƀuôn prŏng ka lŏ mâo klei tưp lar hlăm 14 hruê jing: Lào Cai, Kon Tum, Hà Giang, Quảng Trị, Yên Bái, Thái Bình, Bắc Giang, Hải Phòng. Bi kơ bruă mdrao mgŭn, ênoh mnuih dưi mdrao hlao hlăm ala čar jing 89.145 čô. Ênoh mnuih ruă kjham dôk mdrao hŏng kdrăp ICU mâo 499 lehanăn mâo 4.813 cô mnuih djiê leh.

Pô mblang: Y- Ƀel Êban