VOV4.Êđê - Phŭn bruă mdrao mgŭn mtă kơ Knơ̆ng bruă mdrao mgŭn dŭm alŭ wăl đru kơ mnuih ƀuôn sang ti alŭ wăl dŭm hdră gang mkhư̆ klei ruă tưp hluê si hdră kčah, ñĕ kơ bruă čŏng mdrao ti sang amâo hluê si klei ktrâo lač mơ̆ng bruă mdrao mgŭn. Knơ̆ng bruă mdrao mgŭn dŭm alŭ wăl brei hưn mdah, mrô đĭng blŭ mjêč, čiăng tŭ mă, leh anăn msir mgaih klei hâo hưn, klei tŭ čŏng ksiêm mkă pral mta klei ruă mơ̆ng dŭm anôk bruă leh anăn mnuih ƀuôn sang ti alŭ wăl. Anei jing klei Phŭn bruă mdrao mgŭn mtă, ti anăp boh klei mâo đa đa phung F0 čŏng nao ti dŭm sang êa drao leh čŏng ksiêm mkă pral kman klei ruă, klei tŭ djŏ klei ruă ƀiădah amâo hưn mthâo ôh kơ anôk bruă mdrao mgŭn ti alŭ wăl. Bruă anei srăng ba truh klei tưp lar hlăm lu anôk. Dŭm čar brei mđĭ ktang bruă hâo hưn, ktrâo lač kơ mnuih ƀuôn sang, anôk bruă ti alŭ wăl hluê ngă jăk dŭm klei kčah mtrŭn gang mkhư̆ klei ruă tưp, boh nik hŏng bruă pŏk ngă klei čŏng ksiêm mkă, đru thâo ƀuh hnưm phung đing djŏ klei ruă, hmao ksiêk, čuăl krĭng leh anăn mkhư̆ klei ruă tưp, mbĭt anăn mkhư̆ bruă tưp lar kơ êpul êya.

H’Zawut pô mblang