VOV4.Êđê-  Tlam hruê 2/6, ti anôk bruă knŭk kna, gĭt gai Klei bi kƀĭn trực tuyến Anôk gĭt gai hdră gang mkhư̆ klei ruă Covid 19 hŏng Knơ̆ng bruă mdrao mgŭn lehanăn Knơ̆ng bruă Pasteur ƀuôn prŏng Hồ Chí Minh, K’iăng khua knŭk kna Vũ Đức Đam, Khua anôk bruă gĭt gai ala čar mtă kơ ƀuôn prŏng Hồ Chí Minh lŏ dơ̆ng ksiêm dlăng hlăm êpul êya, mă mta ksiêm dlăng bi mklă kman ti dŭm krĭng huĭ hyưt, mbĭt anăn ba yua wăt robot điện tử nao ksiêm dlăng klei suaih pral čiăng kơ jih jang mnuih hưn mthâo klei suaih pral, mơ̆ng anăn nao truh kơ grăp boh sang mă mta ksiêm dlăng hŏng dŭm čô mâo klei bi êdah mơ̆ng klei ruă amâo dah mnuih huĭ srăng mâo klei ruă. Čih yap hdră gang mkhư̆ klei ruă mơ̆ng ƀuôn prŏng Hồ Chí Minh, K’iăng khua knŭk kna Vũ Đức Đam mtă kơ Anôk bruă gĭt gai mơ̆ng ƀuôn prŏng lŏ dơ̆ng hluê ngă hdră ksiêm dlăng kman čiăng pral hmao ƀuh anôk bluh mâo klei ruă hlăm êpul êya. K’iăng khua knŭk kna Vũ Đức Đam mtă kơ phung khua kiă kriê ƀuôn prŏng, tơdah bluh mâo klei ruă tưp hlăm wăl tuh tia mkra mjing, bruă čuăl krĭng, bi ktlah brei hluê ngă kjăp, đăm lui klei ruă anei tưp lar ti lu anôk./.

                                                    Pô mblang: H’Nêč Êñuôl