VOV4.Êđê- Ti anăp klei mâo dleh dưi ksiêm dlăng mơ̆ng klei ruă tưp, mơ̆ng thŭn 2020, Anôk bruă pui kmlă Dak Lak mkŏ mjing leh mã QR Code mŭt hlăm êlan online Internet mkŏ truh kơ dŭm Anôk kriê dlăng mnuih mkŏ yua pui, Mbah anôk bruă knŭk kna ala čar, mbah anôk bruă knŭk kna mơ̆ng čar Dak Lak, đru kơ mnuih ba yua pui dôk ti sang ăt dưi hluê ngă dŭm hdră tĭng tla, ngă bruă hŏng anôk bruă pui kmlă. Mơ̆ng anăn, mơ̆ng akŏ thŭn 2021 truh kơ ară anei, anôk bruă tŭ mă lehanăn msir mghaih êbeh 56 êbâo klei hưn mdah djŏ tuôm kơ bruă pui kmlă hluê hdră online mâo: Mkăp pui kmlă mrâo, bi mlih hnơ̆ng ba yua pui, mta kñăm ba yua pui, bi mlih công tơ pui, bi mlih kdrăp tĭng mkă ba yua pui, bi mklă hdră tĭng tla prăk pui...

Hŏng dŭm bruă mâo klei tĭng tla, êpul êya ktrâo lač leh kơ phung tuê ba yua pui hluê ngă hdră tĭng tla online ti gưl 4. Hluê anăn, bruă tĭng tla prăk hluê hdră online mơ̆ng kdrăp ZaloPay, Momo, Payoo, Vimo amâo dah ba yua hdră tĭng tla hluê knơ̆ng prăk hŏng mta QR-Code, Mbah tĭng tla VNPay. Ênoh prăk mâo tĭng tla hluê hdră anei hlăm 8 mlan êgao truh 2 êklai 100 êklăk prăk./.

Pô mblang: H’Nêč Êñuôl