VOV4.Êđê - Hluê si Anôk bruă pui kmlă čar Dak Nông, mơ̆ng akŏ thŭn truh kơ ară anei, kluôm anôk bruă mkŏ mjing leh hdră ksiêm dlăng giăm 4.400 čô ba yua pui kmlă lehanăn hmao ƀuh 642 klei ngă soh. Hlăm anăn, 21 klei tlĕ mă yua pui kmlă, 474 klei ngă soh hlăm ênoh čhĭ pui kmlă lehanăn 142 klei ngă soh mkăn.

Ênoh pui kmlă ngă soh brei čiu hnô truh 12.845 kWh, hŏng ênoh prăk giăm 365 êklăk prăk. Anôk bruă jao leh kơ anôk bruă djŏ tuôm msir mghaih 21 boh klei. Truh kơ ară anei, anôk bruă djŏ tuôm hluê ngă leh hdră phat mkra, bi kmhal hŏng 4 klei ngă soh lehanăn ngă hră m’ar bi kmhal 1 boh klei, prăk đŭ truh 12,5 êklăk prăk. Dŭm klei tlĕ mă yua pui kmlă lu jing mkăp kơ klei čiăng yua hlăm klei hdĭp aguah tlam, phung tuê kreh čŏng pô yua klei kap mkŏ hŏng êlan klei pui kmlă leh mtrŭn čiăng ba yua amâo lŏ mkŏ hluê êlan ksiêm yap hnơ̆ng ba yua pui. Čiăng hmao ƀuh klei ngă soh, anôk bruă pui kmlă alŭ wăl kreh čih mkra nanao hdră kčah nao ksiêm dlăng hdră ba yua pui kmlă klă klơ̆ng./.

H Nêč pô mblang