VOV4.Êđê- Kñăm đru kơ mnuih ƀuôn sang mâo klei hdĭp dleh dlan kyua hmăi mơ̆ng klei ruă Covid 19, Êpul hgŭm phung mă bruă duh mkra mda asei čar Dak Nông mkŏ mjing leh “ATM braih amâo liê prăk” mkăp dŭm pluh ton braih amâo mă prăk đru kơ mnuih ƀuôn sang. Dŭm ATM braih anei dôk pŏk mlar truh kơ dŭm alŭ wăl hmăi mơ̆ng klei ruă Covid 19 ti čar.

Mrâo mă 3 kg braih mơ̆ng “ATM braih hŏng ênoh 0 prăk”, Aduôn Trần Thị An, dôk ti ƀuôn hgŭm Nghĩa Tân, ƀuôn prŏng Gia Nghĩa, čar Dak Nông brei thâo, ƀuôn phŭn ñu ăt yăng ti Cần Thơ, gŏ sang ñu dôk tuôm hŏng klei dleh dlan êdi, ƀuôn phŭn ñu pô ti Cần Thơ ăt dôk găn klei ruă tưp msĕ mơh, mâo dưi mơĭt mnơ̆ng đru kơ diñu ôh. Hruê anei, hmư̆ hĭng mâo anôk mbha braih, kyuanăn ñu hriê mă mơh.

“Kâo mơ̆ng Cần Thơ hriê kơ nei ăt nao mưn sang jưh lehanăn duah hiu duiñ djah djâo, dŭm hruê anei klei ruă tưp bluh đĭ amâo lŏ dưi nao ôh. mâo diñu brei braih kâo ăt dưi huă mâo dŭm hruê, kâo lač jăk lu êdimi.”

ATM braih amâo mă prăk kyua Êpul hgŭm phung mnia blei mda asei Dak Nông mkŏ mjing đru kơ phung dleh dlan

Ăt msĕ sơnăn mơh: Amai H’Nhung ti ƀuôn Dak Nur, ƀuôn hgŭm Nghĩa Đức, ƀuôn prŏng Gia Nghĩa brei thâo, hlăm gŏ sang mâo 8 čô, kyua hmăi mơ̆ng klei ruă tưp Covid-19, jih jang amâo thâo nao mă bruă knuă ôh. êngao kơ anăn, dŭm mta boh kroh msĕ si boh ƀơr, durian kăn thâo bĭt anôk ba čhĭ lei, ngă truh kơ klei hdĭp mâo lu klei dleh dlan. Kyuanăn, khă dah knŏng 3 kg braih mơ̆ng “ATM braih hŏng ênoh 0 prăk” ăt ngă kơ amai mâo klei mđao hlăm ai tiê.

“Gŏ sang knŏng ngă bruă lŏ hma, kyua boh mnga lehanăn dŭm mta mkăn mâo ênoh trŭn êdi ngă kơ klei hdĭp tuôm hŏng lu klei dleh dlan. Kyua mâo Đảng, knŭk kna lehanăn dŭm êpul êya uêñ mĭn mkŏ mjing hdră “ATM hŏng ênoh 0 prăk” dưi đru mnơ̆ng ƀơ̆ng huă grăp hruê, bi mdul ƀiă klei dleh dlan grăp hruê truăn mĭn na nao kơ prăk blei braih, mnuih ƀuôn sang mâo klei mơak sơnăk.”

 Grăp čô mnuih hluê ngă jăk hdră gang mkhư̆ klei ruă Covid-19 sĭt nao mă braih

Hŏng hdră ngă bruă hlei mâo hriê brei, hlei dleh hriê mă “ATM braih hŏng ênoh 0 prăk” mơ̆ng êpul hđeh êdam êra bruă mnia mblei čar Dak Nông mkŏ mjing leh 4 hruê, dưi ba mbha leh 6 tôn braih kơ êbeh 2.000 čô mnuih ƀuôn sang mâo klei dleh dlan ti ƀuôn prŏng Gia Nghĩa. Tui hluê Ayŏng Nguyễn Ngọc Chính, khua kiă kriê êpul hđeh êdam êra bruă mnia mblei čar Dak Nông, êngao kơ bruă mbha braih ti ƀuôn prŏng Gia Nghĩa, ATM braih hŏng ênoh 0 prăk ăt dưi lŏ mkŏ mjing čiăng mbha braih kơ mnuih ƀuôn sang dôk dleh dlan ti kdriêk Dak R’Lâp, Tuy Đức lehanăn Dak G’Long.

“Êpul ngă bruă dưi iêo mthưr leh klei bi mkrum 30 tôn braih hŏng ênoh 450 êklăk prăk čiăng nao mbha kơ 4 anôk, đru kơ mnuih ƀuôn sang dleh dlan dưi rơ̆ng klei hdĭp hlăm wưng klei ruă tưp. Êngao kơ 30 tôn braih anei, đăo knăl tui si klei mĭn tĭng hmei srăng lŏ dưi mbi mkrum thiăm 30 tôn braih lehanăn mâo kluôm ênŭm 60 tôn braih nao mbha kơ mnuih ƀuôn sang dŭm alŭ wăl.”

Pô mblang: Y-Ƀel Êban