VOV4.Êđê- Dŭm ala čar êgar Yŭ, hlăm anăn mâo Australia dôk ba yua jih djăp klei găl čiăng ba ƀrư̆ lu mnuih ƀuôn sang leh anăn phung jing ƀuôn sang ala čar tač êngao kbiă mơ̆ng Afghanistan ƀrư̆ hnưm ƀrư̆ jăk. Khădah, klei mbĕ đuê̆ anei hlăk tuôm hŏng lu klei dleh dlan leh boh klei êđăp ênag riêng gah tač êdeh phiơr Hamid Karzai dưi lač jing bŏ hŏng huĭ hyưt. Australia mrâo iêu mthưr mnuih ƀuôn sang amâo nao ôh ti krĭng wăl anei. Hruê 26/8, Khua Knŭk kna Australia Scott Morrison brei thâo, truh ară anei, ala čar ba leh hlăm brô 4000 čô mnuih mâo mnuih ƀuôn sang Australia hŏng phung ƀuôn sang dŭm ala čar mkăn, hlăm anăn mâo mnuih ƀuôn sang Afghanistan kbiă mơ̆ng Kabul, lu hĭn 3 blư̆ mkă hŏng ênoh miưn tĭng êlâo anăn. Khă gơ̆ boh klei êđăp ênag ti krĭng wăl tač êdeh phiơr Hamid Karzai ăt bŏ hŏng huĭ hyưt ƀiădah êpul lĭng kahan Australia ăt lŏ dơ̆ng bi hgŭm hŏng ƀĭng hgŭm, čiăng mbĕ đuê̆ lu mnuih hĭn dưi kbiă mơ̆ng Afghanistan êlâo kơ wưng kčah 31-8.

Pô mblang: H’Zawut Ƀuôn Yă