VOV4.Êđê- Sang hră gưl dua, gưl tlâo čiêm rông hđeh mnuih djuê ana ƀiă Krong ti kdriêk krĭng taih kbưi Krong, kdriêk Kbang, čar Gia Lai. Mbĭt hŏng bruă mtô bi hriăm, phung nai mtô hŏng klei khăp m’ai mơ̆ng pô čiăng lŏ mtrŭt mjhar phung hđeh mnuih djuê ana ƀiă nao sang hră.

Čang rang aguah ưn knăm sa akŏ hrue kăm, phung nai mtô ti sang hră knŭk kna čiêm rông hđeh djuê ƀiă gưl 2 Krong kgŭ leh hơô ao mđao, lŏ dơ̆ng hơô ao hjan čiăng nao truh kơ ƀuôn Tung Gŭt, kbưi hhŏng sang hră hlăm brô 10km, iêo phung hđeh nao sang hră. Truh kơ gah ƀuôn, Đinh Uýt, khua ƀuôn Tung Gŭt dôk guôn leh kơ anăn, mbĭt hŏng phung nai mbha nao truh hlăm grăp boh sang phung hđeh iêo digơ̆ lŏ nao sang hră mơar. Giăm 7h aguah, mâo leh 6 čô hđeh hlăm kngan djă bai čhum ao đĭ ti tluôn êdeh phung nai lŏ wĭt kơ sang hră, Khua ƀuôn Đinh Uýt, lač:

“Gưl anei jing gưl tal dua leh bi mguôp hŏng phung nai čiăng atăt phung hđeh lŏ nao sang hră mơar, tăp năng bi mguôp hŏng dŭm êpul bruă, êdam êra, đảng viên hlăm ƀuôn bi đru atăt phung hđeh lŏ nao sang hră mơar. Mâo mmông mtă mtăn kơ ƀuôn sang, mâo mmông bi mguôp hŏng amĭ ama hđeh mtă brei anak aneh pô bi nao sang hră mơar, dŭm mta klei hriăm mrâo srăng đru kơ hđeh kơ klei hdĭp mgi dih”.

Phung nai iêu jak hđeh nao sang hră mơ̆ng aguah ưm

Jing sa hlăm phung nai mda asei hĭn hlăm sang hră, nai mtô Nguyễn Quốc Triều yăl dliê, lu blư̆ ñu lehanăn jih jang phung nai mtô jhat êdeh hlăm êlan, đa lĕ buh hlăm êlan, čhum ao čhŏ jih lŭ lăn.

“Hlăm wưng dôk mă bruă mâo leh 4 thŭn, snăn hlăm gưl tal êlâo jing suăi êmăn snăk, êlan klông dleh dlan. Kâo bi mĭn kơ phung hđeh hriăm hră pô čiăng kơ digơ̆ thâo hră snăn bi gĭr đru čiăng kơ phung hđeh hlăm krĭng taih kbưi anei mâo hriăm hră, dưi mâo klei thâo săng snăn kơh mgi dih thâo hdĭp mda duah ƀơ̆ng”.

Kbưi hŏng wăl krah kdriêk Kbang êbeh 40km, sang hră knŭk kna čiêm rông hđeh mnuih djuê ƀiă gưl dua Krong dôk pluă hlăm krah čư̆ dliê. Sang hră mâo mdơ̆ng êbeh leh 17 thŭn, ară anei mâo 14 čô nai mtô, hŏng 322 čô hđeh hriăm hraư, lu jing mnuih djuê ana Bahnar. Nai mtô Phan Danh, k’iăng khua sang hră brei thâo, wưng leh êgao, hlăk klei ruă tưp covid 19 dôk bluh đĭ, phung hđeh amâo mâo djăp klei găl dưi hriăm online ôh, phung nai čih mkra hdră hriăm mơĭt truh kơ phung hđeh hlăm grăp boh ƀuôn.

Êlan phung nai nao sang hră dleh dlan

Mơ̆ng krah mlan 11 truh kơ ară anei, phung hđeh dưi lŏ wĭt nao hriăm ti sang hră leh. Ƀiădah ênoh phung hđeh hlŏng mdei sang hră jing lu, phung nai lŏ nao mtrŭt mjhar, iêo jak phung hđeh lŏ nao sang hră. Grăp blư̆ nao iêo jak phung hđeh jing sa blư̆ suăi êmăn. Nai Phan Danh lač:

“Klei čŏng čiăng hlăm klei hriăm hră mơar hlăm phung hđeh ka sĭt êmĭt ôh, wăt phung amĭ ama hđeh ăt kăn čiăng brei lei anak pô nao sang hră, kyua ară anei phung hđeh gơl dua prŏng leh, thâo mă bruă đru amĭ ama leh, brei diñu đru mă bruă hlăm sang. Mâo đa đa amĭ ama tlaih brei anak nao sang hră mtam. Mâo blư̆ phung ayŏng adei nao mtrŭt mjhar, tuôm hŏng phung amĭ ama hđeh ăl lehanăn lehanăn suôt phung nai, snăn bruă iêo jak hđeh nao sang hră bŏ hŏng klei dleh dlan. Tơdah ƀuh phung hđeh lŏ dơ̆ng nao sang hră mơar, ka ênŭm ôh, snăn sang hră lŏ iêo phung nai mơ̆ng tlam knăm 7 mtam, lehanăn aguah knăm sa phung nai bi nao iêo jak yơh hđeh lŏ wĭt kơ sang hră”.

        Găn hlăm lu klei dleh dlan, phung nai mtô ti sang hră rông ba hđeh mnuih djuê ƀiă gưl 2 Krong ăt jih ai tiê thâo khăp kơ hđeh hriăm hră, hur har hlăm bruă knuă. Năng ai klei mơak prŏng hĭn hŏng phung nai mtô kơ anei jing phung hđeh hriăm hră pô amâo mâo kbiă sang hră ôh, amâo mâo lui sang hră ôh, čiăng kơ klei hdĭp mgi dih amâo mâo lŏ wĭr wĭr hlăm klei ư̆ êpa ƀun ƀin ôh./.

         Pô mblang: Y-Khem Niê