VOV4.Êđê - Aguah anei 18-6 ti Hà Nội, Phŭn bruă lŏ hma leh anăn mđĭ kyar krĭng ƀuôn sang leh anăn Phŭn bruă hâo hưn mtô mblang hrăm mbĭt gĭt gai klei bi kƀĭn online kơ “Klei bi mlih mrô hlăm bruă lŏ hma leh anăn mđĭ kyar krĭng ƀuôn sang”. Hluê si Hdră mtrŭn mơ̆ng Khua knŭk kna kơ Hdră ba yua mrô ala čar truh thŭn 2025, tă hdră truh thŭn 2030, ba yua mrô hlăm bruă lŏ hma kñăm mjing wăl ngă bruă ba yua mrô hlăm lŏ hma jing tur knơ̆ng, mjing klei bhiăn, mđĭ kyar bi mlih mơ̆ng bruă lŏ hma jing bruă duh mkra lŏ hma; mđĭ kyar bruă lŏ ham ba yua kdrăp mrâo mrang hluê hdră mđing kơ bruă lŏ hma thâo mĭn, bruă lŏ hma djŏ klă, mđĭ hnơ̆ng bruă lŏ hma ba yua kdrăp mrô hlăm bruă duh mkra. Hluê si Hdră bi mlih mtô ala čar Việt Nam, bruă lŏ hma dưi bi mklă jing 1 hlăm 8 mta bruă brei mđing mlih mtô. Čiăng bi mlih mrô tŭ jing hlăm bruă lŏ hma, brei ba yua kdrăp mrâo mrang hlăm grăp bruă mkra mjing, răng kriê, dŭ mdiăng, mnia blei.

H Zawut pô mblang