VOV4.Êđê- Aguah hruê 15-6, ti Hà Nội, Phŭn bruă lŏ hma leh anăn mđĭ kyar krĭng ƀuôn sang bi hgŭm hŏng dŭm Phŭn, Dhar bruă, bruă mdrao mgŭn, ngăn dŏ, wăl hdĭp mda, bruă tuh tia mkra mjing, hdră kčah leh anăn duh bi liê, Liên hợp quốc ti Việt Nam leh anăn dŭm ƀĭng hgŭm quốc tế, dŭm anôk bruă ksiêm hriăm, sang hră gưl prŏng, anôk bruă mnia blei leh anăn dŭm tĭng djŏ tuôm mkŏ mjing klei bi hriăm tal 1 ti Hà Nội. Anei jing klei bi kƀĭn yuôm bhăn kñăm mprăp kơ Việt Nam nao hlăm klei bi kƀĭn gưl dlông kơ hdră bruă mnơ̆ng ƀơ̆ng huă mơ̆ng Liên hợp quốc mkŏ mjing hlăm mlan 9 thŭn anei. Klei bi kƀĭn gưl dlông thŭn 2021 mơ̆ng Liên hợp quốc kñăm tă hdră kơ bruă mnơ̆ng ƀơ̆ng huă dưi đĭ kyar kjăp hĭn, kluôm ênŭm hĭn leh anăn mâo klei dưi mdrơ̆ng jăk hĭn, mjing klei hmaĭ lu tĭng čiăng dưi mâo hdră kñăm hơĭt kjăp hlăm thŭn 2030. Klei bi kƀĭn đru mguôp klei blŭ hlăm hdră kñăm ngă bruă mâo: rơ̆ng klei dưi mâo mnơ̆ng ƀơ̆ng huă djăp leh anăn bi kna mnơ̆ng tŭ jăk kơ grăp čô mnuih; bi mlih hdră ba yua hluê hdră jăk leh anăn hơĭt kjăp; mđĭ kyar mkra mjing jăk kơ wăl hdĭp mda; mđĭ ktang klei mtăp mđơr hlăm klei mbha ênoh yuôm leh anăn hdră duh ƀơ̆ng, mkŏ mjing klei dưi mdrơ̆ng hŏng klei kpĕ êka leh anăn rŭng răng.

Pô mblang: H’Zawut Ƀuôn Yă