VOV4.Êđê - Hdră ala čar kñăm mkŏ mkra krĭng ƀuôn sang mrâo jing leh mta bruă lar bra hlăm kluôm ala, hlăm anăn mâo čar Dak Nông. Hdră anei mjing leh boh kdrŭt ktang, iêu mƀĭn klei bi hgŭm mguôp mơ̆ng jih jang mnuih ƀuôn sang hlăm yang ƀuôn, iêu mguôp ai ktang hlăm ai tiê klei mĭn lehanăn mnơ̆ng dhơ̆ng kñăm mkŏ mkra krĭng ƀuôn sang jăk siam, boh nik ti dŭm krĭng dleh dlan lehanăn krĭng mnuih djuê ƀiă:

Khă mâo lu lăn ala, ƀiă dah klei ư̆ êpa, ƀun ƀin ăt dôk nanao hlăm klei hdĭp mơ̆ng gŏ sang Ðiểu Byan (mnuih mnông), ti ƀuôn Điêng Đu, să Dak Ngo, kdriêk Tuy Đức, čar Dak Nông. Boh phŭn klei anei kyua gŏ sang ñu ka thâo bĭt ôh êlan duh ƀơ̆ng, lehanăn dôk ngă bruă msĕ hŏng đưm.

Hdră êlan mkŏ mra krĭng ƀuôn sang mrâo dưi đru kơ Ðiểu Byan thâo bĭt êlan djŏ hlăm bruă mđĭ kyar klei duh mkra lehanăn ktưn truh kơ mdrŏng sah. Leh dưi nao hriăm lu adŭ hriăm kơ bruă lŏ hma, hriăm klei kreh knhâo, gŏ sang ñu jhŏng ngă bruă mlih klei mjing lăn, lehanăn pla ana kñul, ana kphê hlăm 8 ha. Lăn lŏ ba wĭt ai mnuih, dŭm ana kñul lehanăn ana kphê dưi mâo boh mnga lu lehanăn brei kơ gŏ sang ñu truh kơ dŭm êtuh êklăk prăk hlăm sa thŭn. leh dưi tlaih mơ̆ng klei knap mñai, Ðiểu Byan lŏ jhŏng duh bi liê rông mjeh êmô mrâo lehanăn tui hluê bruă pla mjing lu ana boh kroh, lu mnơ̆ng rông čiăng dêč đuê̆ kơ klei amâo jăk lehanăn ênoh ênil amâo hơĭt mơ̆ng dŭm mnơ̆ng dhơ̆ng bruă lŏ hma, kyuanăn, ênoh prăk ba wĭt hlăm gŏ sang mâo klei hơĭt kjăp. Ară anei, grăp thŭn, leh kah kơ jih ênoh prăk duh bi liê, gŏ sang ñu adôk prăk mnga truh kơ êbeh 400 êklăk prăk. amâo djŏ knŏng mâo klei mdrŏng sah kơ pô, Ðiểu Byan lŏ đru kơ dŭm gŏ sang knap mñai hlăm ƀuôn brei rông êmô ana lehanăn mbha êđai, čiăng mâo klei găl bi đru kơ mnuih ƀuôn sang hlăm ƀuôn dưi tlaih klei knap mñai. Mơ̆ng dŭm bruă ngă klă klơ̆ng, yuôm bhăn lehanăn mâo klei tŭ dưn, mrâo anei, Ðiểu Byan dưi mâo klei đăo knang čuăn ruah hlăm bruă Đảng nah gŭ, khua ƀuôn ti ƀuôn Điêng Đu.

Yăl dliê kơ hdră êlan mkŏ mkra krĭng ƀuôn sang mrâo, Ðiểu Byan brei thâo, anei jing hdră êlan mâo boh tŭ dưn jăk, klă mngač hŏng mnuih ƀuôn sang, boh nĭk jing anôk mâo lu klei dleh dlan lehanăn anôk mnuih djuê ƀiă. Kyua mâo hdră êlan anei, mâo leh klei mrâo, mâo klei bi mguôp, bi mlih klei mĭn mnuih ƀuôn sang hlăm bruă mkra mjing nao mbĭt hŏng klei kreh knhâo, mrâo mrang, nao mbĭt hŏng bruă klam mơ̆ng mnuih ƀuôn sang hŏng gŏ sang lehanăn yang ƀuôn, mâo klei bi mguôp hlăm yang ƀuôn.

Mkŏ mkra krĭng ƀuôn sang mrâo ngă bi mlih klei jing hlăm krĭng ƀuôn sang, kơ mnơ̆ng dhơ̆ng, ai tiê lehanăn anak mnuih, ngă klei bi mguôp hlăm ai tiê lehanăn dhar kreh dŭm djuê ana. Ăt tui hluê Ðiểu Byan, mâo klei đăo knang mơ̆ng mnuih ƀuôn sang čuăn ruah jing khua ƀuôn jing klei mơak êdi. Khădah anei ăt jing bruă klam prŏng, ñu pô mâo nanao klei gĭr ngă leh bruă klam čiăng hrăm mbĭt hŏng mnuih ƀuôn sang hlăm ƀuôn ngă leh bruă mkŏ mkra krĭng ƀuôn sang mrâo.

Êlâo kơ hruê mmông tui ngă hdră êlan mkŏ mkra krĭng ƀuôn sang mrâo, ƀuôn Bu Bir, să Quảng Tín, kdriêk Dak R’Lâp, čar Dak Nông mâo 96 gŏ sang, hlăm anăn mâo truh kơ 16 gŏ sang jing ƀun ƀin lehanăn 30 gŏ sang giăm ƀun. Êlan klông amâo jăk jing dŭm bĭt êlan lăn. Truh kơ klei dleh dlan hlăm bruă dŭ mdiăng mnơ̆ng dhơ̆ng, hbâo pruê truh kơ anôk pla mjing, phung khan mnia kreh kpĭ ênoh ênil. Mơ̆ng hruê mkŏ mkra krĭng ƀuôn sang mrâo, dưi mâo klei đru hlăm ênoh prăk mkŏ mkra êlan klông, đru kơ mjeh ana boh kroh, mjeh mnơ̆ng rông, klei kreh knhâo hlăm bruă mkŏ mjing… mnuih ƀuôn sang krĭng anei mâo klei hơ̆k mơak myơr lăn ngă êlan, jhŏng bi mlih ana boh kroh pla mjing lehanăn mâo lu boh mnga, kluôm ƀuôn knŏng dôk 4 gŏ sang ƀun ƀin, 10 gŏ sang giăm ƀun ƀin, hnơ̆ng êlan pêtông hlăm krĭng ƀuôn sang truh kơ 90%...

Truh kơ ară anei, hlăm čar mâo 29 să hlăm 60 să mâo ênŭm hnơ̆ng čuăn jing krĭng ƀuôn sang mrâo. Bi kơ 12 să dôk hlăm klei dleh dlan ti 2 kdriêk 30a jing Tuy Đức lehanăn Dak Glong truh kơ ară anei mâo leh êbeh 10 hnơ̆ng čuăn sơăi. Bruă mkŏ mkra hlăm bruă duh mkra - ala ƀuôn krĭng ƀuôn sang dôk hlăm klei dleh dlan, boh nik anôk mnuih djuê ƀiă dưi mâo klei uêñ mĭn hĭn.

Khua êpul đru čung ba mnuih ƀuôn sang bruă Đảng čar Dak Nông Hà Thị Hạnh brei thâo, bi kơ mnuih djuê ƀiă čar Dak Nông, boh nik jing mnuih djuê ƀiă dôk ti nei mơ̆ng đưm, êpul kmeh gơ̆ng jing dŭm čô khua mduôn, khua ƀuôn, pô mâo klei đăo knang lehanăn đảng viên hlăm dŭm hruê mmông leh êgao, dưi bi lar leh klei bi hmô hlăm bruă tui ngă hdră êlan mơ̆ng Đảng, hdră mtrŭn, klei bhiăn ala čar, đru kơ bruă mkŏ mkra hlăm ƀuôn, knư̆ hruê knư̆ mdrŏng sah. Hlăm anăn, lu mnuih mâo leh klei mĭn, bruă ngă mâo klei kreh knhâo hlăm bruă mkŏ mjing dŭm klei bi hmô hlăm bruă duh mkra pla mjing, mnia mblei mâo prăk mnga lu, mkŏ mjing lu bruă ngă bi lông hlăm klei mă bruă knuă hlăm alŭ wăl krĭng ƀuôn sang, anôk dôk mnuih djuê ƀiă, mâo lu mnuih dưi mâo klei pah mni mơ̆ng gưl bruă Đảng nah gŭ, bruă sang čư̆ êa lehanăn mâo klei đăo knang mơ̆ng mnuih ƀuôn sang čuăn ruah jing êpul kmeh gơ̆ng hlăm alŭ wăl, jing pô djă bruă kđi čar anôk pô dôk./.