VOV4.Êđê- Hrue anei (10/6), adŭ bruă kƀĭn ala mkŏ mjing klei bi kƀĭn hŏng phung ngă bruă klei mrâo, bi êdah hdră mtrŭn mơ̆ng Êpul gơ̆ng klei ruah khua ala čar kơ ênoh phung djŏ ruah jing pô bi ala bruă kƀĭn ala gưl 15. Khua knơ̆ng čih hră bruă kƀĭn ala, Khua adŭ bruă Êpul gơ̆ng klei ruah khua ala čar Bùi Văn Cường brei thâo, hrue ruah khua 23/5 leh êgao, mâo leh êbeh 69 êklăk čô mnuih hlăm kluôm ala nao ruah phung bi ala bruă kƀĭn ala gưl 15, lehanăn phung bi ala Êpul gơ̆ng bruă ƀuôn sang dŭm gưl wưng păn bruă 2021 – 2026. Anei jing klei ruah khua prŏng êdi mơ̆ng êlâo dih truh kơ ară anei, khădah dôk găn klei ruă tưp covid 19 bluh đĭ ktang. Hnơ̆ng ênoh mnuih nao ruah jing lu hĭn truh 99,60%, bi êdah leh klei thâo săng kơ bruă kđi čar, ai tiê thâo khăp kơ lăn čar, lehanăn klei đăo knang mơ̆ng phung ƀuôn sang hŏng Đảng, hŏng lăn čar. Boh tŭ dưn, dưi mâo ruah leh ênŭm ênoh phung bi ala bruă kƀĭn ala djŏ hŏng klei bhiăn; ruah mâo 99,87% ênoh phung bi ala Êpul gơ̆ng bruă ƀuôn sang gưl čar; 99,81% ênoh phung bi ala Êpul gơ̆ng bruă ƀuôn sang gưl kdriêk, lehanăn 98,91% ênoh phung bi ala Êpul gơ̆ng bruă ƀuôn sang gưl să mkă hŏng ênoh čuăn bi mâo tui si klei kčah mtrŭn./.

Pô mblang: Y-Khem Niê