Ti krĭng Lăn dap kngư, lu alŭ wăl mkŏ mkra leh Sang yang bi hdơr kơ Mtao Hùng. Grăp thŭn, Knăm bi hdơr Hruê djiê kơ Mtao Hùng dưi mâo alŭ wăl mkŏ mjing hŏng klei mpŭ. Mơ̆ng anăn, đru mjuăt bi hriăm kơ knhuah gru “Mnăm êa hdơr kơ akŏ”, hdơr knga kơ Mtao Hùng mâo leh klei đru mguôp prŏng hlăm hdră mkŏ mkra lăn čar lehanăn phung aê aduôn nao êlâo bi kdơ̆ng leh hŏng phung roh plah ala răng mgang kjăp ala čar.

Mơ̆ng hruê 20/4 - 21/4/2021, ti anôk knhuah gru hƀuê ênŭk ala čar Đình Lạc Giao, mrô 67 êlan Phan Bội Châu, buôn prŏng Ƀuôn Ama Thuôt, knơ̆ng bruă dhar kreh, mjuăt asei mlei lehanăn hiu čhư̆n ênguê hrăm mbĭt hŏng bruă sang čư̆ êa ti ƀuôn prŏng lehanăn dŭm anôk bruă djŏ tuôm mkŏ mjing knăm ngă yang bi hdơr hruê djiê mtao Hùng hruê 10 mlan tlâo thŭn Tân Sửu 2021, čiăng mđing truh kơ knăm ngă yang prŏng kơ ala čar Mtao Hùng. Tui hlue lu bruă ngă mơ̆ng knăm ngă yang bi hdơr hruê djiê mtao Hùng, mtrŭt mjhar kơ dŭm gưl mnuih ƀuôn sang hur har hlăm klei mă bruă, dưi ngă leh dŭm bruă klam, bruă kñăm čiăng mđĭ kyar klei duh mkra, dhar kreh lehanăn yang ƀuôn.

Sang Yang Mtao Hùng ti Gia Lai

Bruă anei jing leh klei bhiăn, hlăm hruê 10/3 âm lịch grăp thŭn, lu mnuih ƀuôn sang ti čar Gia Lai lehanăn dŭm čar jĕ giăm nao čuh brui mngưi hlăm sang yang mtao Hùng ti war mnga dhar kreh Đồng Xanh (să An Phú, ƀuôn prŏng Pleiku, čar Gia Lai) hŏng ai tiê mpŭ lehanăn hdơr mnga kơ phŭn agha pô. Sang kkuh mpŭ kơ mtao Hùng ti war mnga dhar kreh Đồng Xanh dưi rŭ mdơ̆ng hŏng knhuah rŭ mdơ̆ng đưm. Čuôr sang roong Lăn Dap Kngư mâo boh dlông 18m, hlăm lam anăn mâo boh rup mtao Hùng hŏng kyâo dlông 6m, boh ktrŏ giăm 3 tôn leh anăn dưi luôm êa mil êa mah, ti anăp sang anăn mâo 18 boh rup Mtao Hùng.

Tui hlue khua gĭt gai knơ̆ng bruă dhar kreh lehanăn hiu čhưn ênguê čar Gia Lai: hlăm hruê 9.3 âm Lịch, anôk bruă mprăp leh điŏ đŭng, bêñ dày, ŭn ăm mdar, mnơ̆ng ngă yang mkăn.. čiăng dưi hmao mprăp kơ hruê 10/3 myơr kơ aduôn aê atâo atiêt leh. Dŭm thŭn giăm anei, bi hdơr hruê djiê mtao Hùng jing leh sa knăm mơ̆ng mnuih ƀuôn sang dŭm djuê ana ti čar Gia Lai. Mâo lu gŏ sang ba anak čô hiu hlăp lêñ, boh nĭk mâo đa đa sang hră mâo klei mkŏ mjing dŭm bruă ngă čiăng kơ phung hđeh thâo hdơr kơ aduôn aê, mâo klei khăp kơ lăn čar lehanăn mâo klei hing ang kơ hƀuê ênuk djuê ana.

Mnuih ƀuôn sang M’Nông nao hlăm knăm hdơr hruê djiê mtao Hùng ti Dak Buk So

Mbĭt hŏng ai êwa tar ala čar, hruê 10/3 âm lịch grăp thŭn, dŭm êpul êya mnuih ƀuôn sang dŭm djuê ana ti să knông lăn Dak Buk So, kdriêk Tuy Đức, čar Dak Nông ăt nao bi kƀĭn ti sang yang kơ Mtao Hùng lehanăn ngă knăm ngă yang bi hdơr hruê djiê mtao Hùng. Mơ̆ng thŭn 2017, dưi rŭ mdơ̆ng sang kkuh kơ Mtao Hùng, mâo klei găl kơ mnuih ƀuôn sang djăp anôk dưi bi êdah klei mpŭ pô hŏng aduôn aê atâo atiêt. Sang yang anăn mâo ênhă 250m², dưi mkŏ mjing hŏng kdrăp mphŭn, êdah klă ti dliê kmrơ̆ng hlăm čư̆ čhiăng Lăn Dap Kngư. Jih jang ênoh prăk rŭ mdơ̆ng sang yang anei dưi mâo mnuih ƀuôn sang bi mguôp duh bi liê lehanăn lăn anôk rŭ mdơ̆ng dưi mâo sa gŏ sang mđup brei.

Nguyễn Đình Lương ti alŭ 6, să Dak Buk So brei thâo, mâo lu mnuih ƀuôn sang ti nei jing mnuih mơ̆ng čar Phú Thọ hriê ti čar Dak Nông mkŏ mjing bruă duh mkra. Kbưi hŏng ƀuôn sang giăm 20 thŭn ară anei, ƀiădah diñu ăt dôk hdơr nanao hruê djiê Mtao Hùng. Jih iang mâo leh klei bi trông, tŭ ư srăng akâo kơ bruă sang čư̆ êa dŭm gưl dưi brei klei rŭ mdơ̆ng sang yang kơ mtao Hùng.

Knăm bi hdơr hruê djiê Mtao Hùng hlăm hruê 10/3 âm lịch grăp thŭn jing leh hruê knăm kơ tar ala čar lehanăn djuê ana. Jing boh kdrŭt dưi mâo klei ktang hlăm klei bi mguôp, dưi găn jih klei dleh dlan, knap mñai mơ̆ng klei bi blah, klei yan adiê ngă… Bi kjăp klei đăo knang kơ yang ƀuôn čiăng hrăm mbĭt đĭng truh klei hdĭp mgi dih, rŭ mdơ̆ng ala čar mdrŏng sah lehanăn jăk siam hĭn.

Pô mblang: Y-Khem Niê