VOV4.Êđê- Thŭn anei giăm 70 thŭn, H’Rĭt Hmŏk, ti ƀuôn Ki, ƀuôn prŏng Ƀuôn Ama Thuôt, čar Daklak lŏ bi hdơr kơ hrue mơak klei hnŭk êngiê, lehanăn lŏ hdơr kơ hrue mâo mă Ƀuôn Ama Thuôt hrue 10/3/1975. Ñu yăl dliê hlăk anăn ñu mrâo 20 thŭn, ƀuh klei bi blah. Mâo lu phung ƀuôn sang bi đuĕ dăp hlăm ƀăng ñĕ đuĕ kơ boh phao ktuang. Leh hrue mâo klei êngiê, ƀuôn sang ñu lehanăn dŭm boh ƀuôn jŭm wăl krah mâo lu kahan cách mạng mŭt dôk mbĭt hŏng phung ƀuôn sang, răng mgang ƀuôn sang, lehanăn răng mgang boh tŭ dưn cách mạng mâo leh:

“Anăn yơh jing gưl tal êlâo kâo ƀuh, êjai hlăk anăn kâo nao ti pin êa. Snăn ƀuh sa êpul kahan hlăm êlan klông, snăn kâo ñĕ ti djiêu êlan dlăng êpul kahan prŏng ruĕ nao phă yŭ. Hlăm êpul kahan anăn mâo lu mnuih dôk mda asei, hđeh êdam. Leh hrue mâo klei êngiê snăn hlăm ƀuôn mâo kahan cách mạng hriê răng kriê ƀuôn sang, răng mgang boh tŭ dưn leh mâo. Phung lĭng kahan dôk mbĭt huă ƀơ̆ng mbĭt hlăm sa boh sang”./.

Nay Hư̆ djuê ana Jrai brei thâo, ñu nao ngă cách mạng mơ̆ng hlăk thŭn 1972, lehanăn nao hlăm kdrăn mblah ti kdriêk Krông Pa, čar Gialai hlŏng truh kơ hrue lăn čar mâo klei êngiê. Ñu ƀuh lu phung ƀĭng kahan mbĭt êngiă asei čiăng răng mgang klei hnŭk êngiê, klei hluh lir lăn čar. Kyuanăn, hŏng ñu, klei hnŭk ênang, klei êngiê mơ̆ng phung ƀuôn sang pô mâo ară anei jing hŏng ênoh amâo mâo dưi mkă ôh:

“Leh hrue mâo klei êngiê dua kwar Dưr lehanăn Dhŭng mâo klei hluh lir, amâo lŏ mâo klei bi ktlah msĕ si êlâo ôh. Jih jang phung ayŏng amai adei hmei, jih ƀuôn sang hlăk anăn bŏ hŏng klei mơak. Hmei kčưm kơ bruă duh ƀơ̆ng, mđĭ kyar klei hdĭp mda. Cách mạng truh hŏng drei leh, mâo klei hdĭp bi mlih, amâo lŏ adôk ôh ya mta klei leh êgao amâo mâo jăk siam. Đơ phung tui hlue phung roh, đuĕ hlăm dliê, hmei iêu wĭt, mđĭ ai di gơ̆ wĭt hŏng găp djuê, hŏng ƀuôn sang. Cách mạng lehanăn bruă sang čư̆ êa amâo mâo ngă klei dleh ôh, knŏng wĭt duh ƀơ̆ng, lehanăn sa ai mđrăm mbĭt hŏng cách mạng čiăng mâo klei hdĭp jăk yâo hĭn"./.

Ti anăp boh klei ruă tưp hlăk dleh dưi ksiêm dlăng. Knăm mơak klei hnŭk êngiê thŭn anei, phung ƀuôn sang ƀuôn Trĭng, ƀuôn hgŭm An Lạc, wăl krah Ƀuôn Hô, čar Daklak amâo mâo mkŏ mjing prŏng ôh, ƀiădah ai êwa mtluk mtlak mơak mñai hrue mâo klei hnŭk êngiê mkŏ mjing lăn čar ăt êdah hŏng jih jang dŭm hla čhiăm gru mâo kă hlăm djăp êlan klông ƀuôn sang. H’Nưn Mlô, ti ƀuôn Trĭng, ƀuôn hgŭm An Lạc yăl dliê:

“Hlăm hrue 2/9 truh, hrue awa Hô dlăng hra klei hnŭk êngiê mkŏ mjing lăn čar, jing sa gru kruak knal yuôm bhăn kơ lăn čar mâo tlaih mơ̆ng klei hlŭn êđai, klei knap mñai kyua klei bi blah. Kâo ƀuh jing mơak, lehanăn hdơr kơ knga kơ awa, lehanăn Đảng Cộng Sản Việt Nam jing pô kiă kriê gĭt gai hŏng klei mbruă cách mạng Việt Nam. Hmư̆ klei awa mtă, phung ƀuôn sang lăn dap kngư, lehanăn anak Êđê gĭr duh ƀơ̆ng, pla ksŭ bi mâo ktăk, pla kphê bi lu mboh, ba yua klei kreh knhâo pla mjing lehanăn rông mnơ̆ng"./.

Pô mblang: H’Zawut Ƀuôn Yă- Y-Khem Niê