VOV4.Êđê- Truh kơ ară anei, mâo leh 388 anôk bruă bi mguôp mkăp brei boh mnga bruă lŏ hma leh anăn mnơ̆ng ƀơ̆ng huă jing dŭm anôk bruă, êpul bi mguôp, knơ̆ng bruă bi mklă leh. Anăn jing klei bi mklă mơ̆ng êpul ngă bruă mơ̆ng phŭn bruă lŏ hma lehanăn mđĭ kyar krĭng ƀuôn sang ti alŭ wăl krĭng dhŭng. Klă klơ̆ng: mâo 85 anôk mkăp brei djam mtam, 102 anôk mkăp brei boh kroh, 157 anôk mkăp brei kan dang, 24 anôk mkăp brei mnơ̆ng ƀơ̆ng huă, dŭm dôk jing dŭm mta mnơ̆ng dhơ̆ng mkăn. Mĭn tĭng mơ̆ng ară anei truh kơ knhal jih thŭn, djam mtam, boh mnga hlăm dŭm alŭ wă krĭng dhŭng mâo hlăm brô 5,7 êklăk tôn, rơ̆ng djăm kơ klei ba yua. Hlăm 19 čar, ƀuôn prŏng dôk ngă klei bi kbưi yang ƀuôn hlăm sa mlan dưi brei kơ anôk čhĭ mnia 560 êbâo tôn truh kơ 600 êbâo tôn. K’iăng khua phŭn bruă lŏ hma lehanăn mđĭ kyar krĭng ƀuôn sang Phùng Đức Tiến brei thâo, bi hluh klei dŭ mdiăng mnơ̆ng ƀơ̆ng huă kơ bruă hrui êmiêt boh mnga bruă lŏ hma hlăm 19 čar, ƀuôn prŏng alŭ wăl krĭng dhŭng dôk ngă klei bi kbưi yang ƀuôn jing sa hlăm dŭm boh klei mjêč čiăng dưi ruh mgaih, phŭn bruă ăt mâo leh mơh klei kčĕ hŏng phŭn bruă lĭng kahan tiŏ nao lĭng kahan đru kơ mnuih ƀuôn sang dôk tuôm hŏng klei dleh dlan.

 Pô mblang: Y-Ƀel Êban