VOV4.Êđê -  Hruê 29/6, Khua knŭk kna Phạm Minh Chính gĭt gai leh Klei bi kƀĭn knŭk kna kơ bruă mkŏ mjing čih mkra hdră bhiăn mlan 6/2021, hluê anăn srăng pioh 1 hruê čiăng ksiêm dlăng, bi mklă bruă čih mkra lehanăn hluê ngă hdră bhiăn kñăm pral ruh mtlaih klei dleh dlan, gun kpăk kơ klei bhiăn, hdră mtrŭn, đru kơ mnuih ƀuôn sang lehanăn anôk bruă duh mkra jăk hĭn. Anei jing sa hlăm dŭm bruă klam phŭn mơ̆ng knŭk kna. Ti anôk bi kƀĭn, phung bi ala trông čhai, bi mklă leh 8 mta bruă: Klei čih mkra Hdră bhiăn kahan ksiêm bi kdơ̆ng pral, Klei čih mkra mlih – thiăm mbŏ Dŭm mta mâo hlăm bruă bi liê, ksiêm yap ala čar mơ̆ng Mta bruă ksiêm yap, Klei čih mkra Hdră bhiăn mkra mlih, thiăm mbŏ dŭm mta klei hlăm Hdră bhiăn dưn yua klei mĭn mrâo, bruă mkra mlih Hdră bhiăn lăn ala, klei čih mkra Hdră mtrŭn bi mlih Hdră mtrŭn mrô 101 thŭn 2005 mơ̆ng Knŭk kna kơ bruă mkŏ mjing, mkra mđĭ sang dlông tal, ruh mtlaih klei dleh dlan hlăm klei kčah mtrŭn bruă mkŏ dưm kdrăp camera, tĭng mkă boh tŭ čih mkra klei bhiăn, hdră bhiăn 6 mlan akŏ thŭn lehanăn hdră êlan, bruă klam hlăm dŭm mlan knhal jih thŭn.

Dŭm klei năng mđing ti anôk bi kƀĭn jing klei čih mkra Hdră mtrŭn mơ̆ng Knŭk kna kơ klei đru kơ mnuih mă bruă, pô ba yua mnuih mă bruă lehanăn mnuih tuôm hŏng klei dleh dlan kyua klei ruă Covid 19 hŏng ênoh prăk hlăm brô 26 êbâo êklai prăk. Kơ klei anei, Khua knŭk kna Phạm Minh Chính mtă brei ksiêm dlăng klă nik čiăng rơ̆ng dưi mâo hdră mtrŭn djŏ guôp hŏng mnuih dôk čiăng klei đru hlăm anăn thiăm mbŏ mnuih dưi đru jing mnuih hiu mă bruă./.

H Nêč pô mblang