VOV4.Êđê - Leh 3 hruê mâo klei mkŏ mjing hŏng lu bruă ngă dhar kreh, mmăt bruê 11/4, ti ƀuôn prŏng Hội An, “Dŭm hruê dhar kreh Hàn Quốc ti čar Quảng Nam, Hội An 2021” mơ̆ng bruă sang čư̆ êa čar Quảng Nam, pô bi ala mơ̆ng ala čar Hàn Quốc, sang bruă dhar kreh Hàn Quốc ti Việt Nam hrăm mbĭt mkŏ mjing klei bi ruê̆. Hŏng lu bruă ngă čiăng tui dlăng dŭm dhar kreh Hàn Quốc msĕ si: bruă hiu čhưn ênguê, mnơ̆ng ƀơ̆ng huă Hàn Quốc, hdră anei dưi brei ƀuh lu klei siam jiă đuôm leh hlăm ai tiê mnuih ti ƀuôn prŏng Hội An leh anăn phung tuê hiu čhưn ênguê.

Dŭm bruă ngă dưi bi jăk klei jĕ giăm 2 ala čar, hyuă kjăp klei bi mguôp, hlăm bruă čiăng mđĭ kyar klei êrô êbat mơ̆ng čar Quảng Nam hŏng dŭm alŭ wăl leh anăn ala čar Hàn Quốc. Wưng anei jing mmông găl čiăng mđĭ lar bruă hiu čhưn ênguê ti 2 ala čar leh dưi găn klei ruă tưp. Ti anăp anei, tơdah dưi ksiêm dlăng klei ruă tưp Covid-19, čar Quảng Nam srăng bi mguôp hŏng dŭm knơ̆ng bruă hiu čhưn ênguê čiăng mtrŭt mjhar kơ dŭm anôk bruă gưl dlông dưi mâo klei brei dŭm klei phiơr hiu dưi ba tuê hiu čhưn ênguê mơ̆ng Hàn Quốc tru kơ čar Quảng Nam.

Y Khem pô mblang