VOV4.Êđê- Klei bi lông bi ruê̆ klei hriăm gưl 3 thŭn 2021 gưl tal 1 dưi bi ruê̆ ti tlam mbruê (8/7) leh 2 hruê ngă klei bi lông. Anei jing klei bi lông mâo klei mdê hĭn kyua dưi mkŏ mjing hlăm wưng klei ruă tưp Covid-19 dôk dleh dưi ktuê dlăng. Mâo lu alŭ wăl msĕ hŏng ƀuôn prŏng Hồ Chí Minh, Bắc Giang, Bình Dương, Phú Yên, Hà Nội… lŏ mâo mnuih ruă mrâo. Kyuanăn, 63 alŭ wăl čŏng ngă leh dŭm hdră êlan lehanăn mâo klei nao hgŭm mơ̆ng dŭm êpul êya, ngă leh klei găl dưi bi leh klei bi lông kơ dŭm čô hđeh sang hră.

Hlăm klei bi lông ăt mâo dŭm boh klei djŏ tuôm kyua klei ruă tưp lehanăn jing klei hriăm kơ dŭm alŭ wăl mkŏ mjing klei bi lông gưl êdei. Leh ruê̆ 2 hruê ngă klei bi lông, ăt dôk mâo êbeh 23 êbâo čô hđeh hlăm dŭm čar, ƀuôn prŏng amâo dưi nao ngă klei bi lông kyua klei hmăi mơ̆ng klei ruă tưp Covid-19 lehanăn srăng lŏ nao hlăm klei bi lông gưl tal 2. Lu mnuih ƀuôn sang hmăng hmưi, dŭm alŭ wăl mâo klei hriăm čiăng mkŏ mjing klei bi lông gưl êdei mâo klei êđăp ênang hĭn.

Pô mblang: Y-Ƀel Êban